توقاەۆ باق قىزمەتكەرلەرىن كاسىبي مەرەكەسىمەن قۇتتىقتادى

پرەزيدەنت قاسىم-جومارت توقاەۆ بۇقارالىق اقپارات قۇرالدارى (باق) قىزمەتكەرلەرىن  قۇتتىقتادى دەپ حابارلادى turkystan.kz.

«قۇرمەتتى جۋرناليستەر! بۇقارالىق اقپارات قۇرالدارىنىڭ قىزمەتكەرلەرى! سىزدەردى كاسىبي مەرەكەلەرىڭىزبەن شىن جۇرەكتەن قۇتتىقتايمىن! اقپارات سالاسىندا جۇمىس ىستەۋ – ۇلكەن مارتەبە ءارى زور جاۋاپكەرشىلىك. وتاندىق ءباسپاسوز ەلىمىزدىڭ تۇتاستىعى مەن تاتۋلىعىن نىعايتۋ جولىندا ەلەۋلى ءرول اتقارادى. ءسوز ونەرىن قاسيەت تۇتىپ، ابىروي بيىگىنەن كورىنىپ جۇرگەن كاسىبي جۋرناليستەرىمىز از ەمەس. ولار ەسەلى ەڭبەگىمەن وقىرماننىڭ، كورەرمەننىڭ العىسىنا بولەنۋدە. بۇل – ەل يگىلىگى جولىنداعى ادال ءارى قاجىرلى ەڭبەكتەرىڭىزگە بەرىلگەن باعا.  بۇگىندە الەۋمەتتىك جەلىلەردە، ينتەرنەتتە جالعان اقپارات كوبەيىپ كەتكەنىن كورىپ وتىرمىز. وسىنداي كۇردەلى جاعدايدا سىزدەردىڭ شىنايى ءارى سىني كوزقاراستارىڭىز ءتۇرلى كەلەڭسىزدىككە توسقاۋىل بولار ەدى» – دەدى مەملەكەت باسشىسى.

سونداي-اق قازىر قوعامداعى باسىمدىقتار وزگەرىپ، كاسىبي جۋرناليستەر قىزمەتىنىڭ ماڭىزى ارتا تۇسكەنىن ايتتى.

«ءبىز جاڭا، ادىلەتتى قازاقستاندى قۇرۋعا كىرىستىك. بۇل – بارشا وتانداسىمىزدىڭ الدىندا تۇرعان ماڭىزدى مىندەت. سىزدەردىڭ ماقالالارىڭىز بەن سيۋجەتتەرىڭىز، جۋرناليستىك زەرتتەۋلەرىڭىز وسى باستاماعا ۇلەس قوسارى ءسوزسىز. سوندىقتان ناعىز كاسىبي مامانداردىڭ ەڭبەگىن لايىقتى باعالاۋدىڭ سيمۆولدىق ءمانى بار. مىرجاقىپ دۋلات ۇلىنىڭ «قاي جۇرتتىڭ ءباسپاسوزى مىقتى بولسا، سول ەلدىڭ ءوزى دە كۇشتى» دەگەن تۇجىرىمى بۇگىن دە بارىنشا وزەكتى. ەلىمىزدىڭ اقپاراتتىق قاۋىپسىزدىگى مەن يدەولوگيالىق دەربەستىگىن ساقتاۋ ءۇشىن وتاندىق جۋرناليستەردىڭ قازاقستاندا جانە الەمدە بولىپ جاتقان ۇدەرىستەر تۋرالى ءوز كوزقاراسى بولۋى كەرەك. ءبىز قوعامعا ۇلگى-ونەگە كورسەتىپ، مەملەكەت ءىسىن ىلگەرىلەتۋگە اتسالىسۋىمىز قاجەت. ويتكەنى حالىقتىڭ سەنىمىن اقتاۋ – ازاماتتىق بورىشىمىز. ءبىز تاتۋلىق پەن بىرلىكتى ساقتاي وتىرىپ، جاڭا قازاقستاندى قۇرۋ جولىندا جاڭا بەلەستەردى بىرگە باعىندىراتىنىمىزعا سەنەمىن. بارشاڭىزعا شىعارماشىلىق شابىت، تولاعاي تابىس تىلەيمىن!»، – دەلىنگەن پرەزيدەنتتىڭ قۇتتىقتاۋىندا.

ۇقساس جاڭالىقتار

Back to top button