الماتىدا جوعالعان ءجاسوسپىرىم ءولى تابىلدى

الماتىدا جوعالىپ كەتكەن 15 جاستاعى ءجاسوسپىرىمنىڭ دەنەسى تابىلدى دەپ حابارلادى turkystan.kz.

الماتى قالالىق پوليتسيا دەپارتامەنتىنىڭ مالىمەتىنشە، مەدەۋ اۋداندىق پوليتسيا باسقارماسىنا 2007 جىلى تۋعان بالانىڭ جوعالعانى تۋرالى اقپارات 23 ماۋسىم كۇنى تۇسكەن.

«تەرگەۋ توبى بۇگىن قالاداعى باۋ-باقشالاردىڭ بىرىنەن دەنەسىندە زورلىق-زومبىلىق بەلگىلەرى بار بالانىڭ ءولى دەنەسىن تاپتى» دەپ حابارلادى پوليتسيادان.

پوليتسەيلەر 16 جاستاعى ءجاسوسپىرىمدى ۇستادى. كۇدىكتى اراداعى جانجالدان كەيىن دوسىن ولتىرگەنىن مويىندادى.

«سوتقا دەيىنگى تەرگەۋ جالعاسىپ جاتىر. قاجەتتى سوت-مەديتسينالىق ساراپتاما تاعايىندالدى» دەپ اتاپ ءوتتى ۆەدومستۆونىڭ ءباسپاسوز قىزمەتى.

ۇقساس جاڭالىقتار

Back to top button