«اتقارعان جۇمىستارىم تۋرالى ماقتانىپ ايتقىم كەلمەيدى» - جانسۇلتان ساپارباەۆ (ۆيدەو)

بۇرىنعى جامبىل وبلىسىنىڭ اكىمى، بەلگىلى ساياساتكەر بەردىبەك ساپارباەۆتىڭ ۇلى، كولىك جانە جول-كولىك ينفراقۇرىلىمى باسقارماسىنىڭ باسشىسى جانسۇلتان ساپارباەۆ El-Orda YouTube ارناسىنا بەرگەن سۇحباتىندا جەكە باسىنا قاتىستى سۇراقتارعا جاۋاپ بەردى دەپ حابارلادى turkystan.kz.

جۋرناليست سۇحبات بارىسىندا ساپارباەۆتان بەلگىلى ساياساتكەردىڭ ۇلى بولا تۇرا مەملەكەتتىك قۇرىلىمدا جۇمىس ىستەۋ قالاي ەكەنىن سۇرادى.

«وتباسىمدا ماعان ارتىلعان جاۋاپكەرشىلىك پەن قويىلاتىن تالاپ جوعارى. ەلدىڭ الدىندا جۇرگەن ادامنىڭ ۇلى بولعان سوڭ قوعامنىڭ ءجىتى نازارىندا بولاسىڭ. ءار قادامىڭدى اڭداپ باساسىڭ. قاتارداعى قاراپايىم بالا بولسام، مۇنشالىقتى قيىن بولماس ەدى»، – دەدى جانسۇلتان ساپارباەۆ.

سونىمەن قاتار جاس شەنەۋنىك قوعام نازارىنان تىس جۇرەتىنىنە قاتىستى سۇراققا دا جاۋاپ بەردى. ايتۋىنشا، ول جۋرناليستەرگە كوپ سۇحبات بەرمەيتىنىن جانە  كوپشىلىك الدىنا ءجيى شىعا بەرمەيتىنىن جەتكىزدى.

«مەن ءوزىمنىڭ اتقارعان جۇمىستارىم تۋرالى ماقتانىپ ايتىپ، جازىپ جۇرەتىن ادامدار قاتارىنان ەمەسپىن. كەرىسىنشە، قىزمەتىمدى بارىنشا جاقسى اتقارۋعا تىرىسامىن»، – دەپ جاۋاپ بەردى ج.بەردىبەك ۇلى.

سونداي-اق اقسۇلۋ سانعالي سۇحباتتاسۋشىدان مەكتەپ بىتىرگەن سوڭ شەتەلدىك ۋنيۆەرسيتەتكە بارماي، نەگە وتاندىق وقۋ ورنىنا ءتۇستىڭىز دەگەن سۇراق قويدى.

«مەن مەكتەپتى ەلوردادا ءبىتىردىم. ودان ءارى ءبىلىم الۋ ماسەلەسى تۋرالى ءسوز بولعاندا، اكەم ماعان: «بالام، توپاس بولساڭ، گارۆارد تا ساعان كومەكتەسپەيدى. ال باسىڭدا مي بولسا، كەز كەلگەن جەردە وقي الاسىڭ» دەدى. سوندىقتان تاڭداۋىم ەۋرازيا ۇلتتىق ۋنيۆەرسيتەتىنە ءتۇستى.  ال مەن بۇعان مۇلدەم وكىنبەيمىن»، – دەدى ول.

ۇقساس جاڭالىقتار

Back to top button