ەلوردادا احمەت بايتۇرسىن ۇلىنىڭ 150 جىلدىعىنا وراي عىلىمي كونفەرەنتسيا ءوتتى

24 ماۋسىمدا نۇر-سۇلتان قالاسىندا بەلگىلى تۇركىتانۋشى، قازاق ءتىل ءبىلىمى جانە ادەبيەتتانۋ عىلىمدارىنىڭ نەگىزىن سالۋشى عالىم، ۇلتتىق جازۋدىڭ رەفورماتورى،  الاشتىڭ رۋحاني كوسەمى احمەت بايتۇرسىن ۇلىنىڭ 150 جىلدىق مەرەيتويىنا ورايلاستىرىلعان عىلىمي كونفەرەنتسيا ءوتتى دەپ حابارلادى turkystan.kz.

كونفەرەنتسيادا بارىسىندا ءسوز العان ازەربايجان رەسپۋبليكاسىنىڭ ءبىلىم ءمينيسترى ەمين امرۋللاەۆ: «قازاق حالقىنىڭ قوعامدىق جانە مادەني ويانۋىنا قىزمەت ەتكەن كورنەكتى قوعام قايراتكەرى، اعارتۋشى جانە لينگۆيست ا. بايتۇرسىن ۇلىنىڭ قىزمەتى تۇركى الەمىنىڭ باي مۇراسىنىڭ جارقىن ۇلگىسى بولىپ تابىلادى»،- دەدى.

ەلوردادا احمەت بايتۇرسىن ۇلىنىڭ 150 جىلدىعىنا وراي عىلىمي كونفەرەنتسيا ءوتتى

عىلىم جانە جوعارى ءبىلىم ءمينيسترى س.نۇربەك ءوزىنىڭ قۇتتىقتاۋ سوزىندە: «ءتىل ءبىلىمىنىڭ، ادەبيەتتانۋدىڭ جانە وقىتۋ ادىستەمەسىنىڭ باستاپقى مازمۇنى احمەت بايتۇرسىن ۇلىنىڭ ەڭبەكتەرىندە. ونىڭ سول ەڭبەكتەردەگى عىلىمي تۇجىرىمدارى مەن قورىتىندىلارى ءالى كۇنگە دەيىن وقىتۋ ۇدەرىسىندە دە، عىلىمي باعىتتا دا كەڭىنەن قولدانىلۋدا. قازىرگى كەزدە ءالىپبي تۇزۋدە، تەرمينجاسامدا  نەمەسە ءتىل ۇيرەتۋ ۇدەرىسىندە ءبىز ونىڭ ەڭبەكتەرىنە سوقپاي كەتە المايمىز. ويتكەنى ول نەگىزدەردىڭ نەگىزىن جاساعان اسا كورنەكتى وقىمىستى، اعارتۋشى عالىم»، – دەپ اتاپ ءوتتى.

قىرعىز رەسپۋبليكاسىنىڭ ءبىلىم جانە عىلىم ءمينيسترى المازبەك بەيشەناليەۆ ءوز سوزىندە: «ا. بايتۇرسىن ۇلىنىڭ مەرەيتويى بىزگە تاريح الدىنداعى اسىل جاۋاپكەرشىلىگىمىزدى، حالىققا قىزمەت ەتۋدىڭ قاسيەتتى ءداستۇرىن ەسكە سالادى»، – دەدى.

ەلوردادا احمەت بايتۇرسىن ۇلىنىڭ 150 جىلدىعىنا وراي عىلىمي كونفەرەنتسيا ءوتتى

ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ە. سىدىقوۆ: «احمەت بايتۇرسىن ۇلىنداي  ءبىرتۋار تۇلعا مۇراسى مەن مۇراتىنىڭ جاڭا كوزقاراستاعى تەوريالىق تۇجىرىمدار ارناسىندا زەردەلەنۋى ەل بىرلىگىن نىعايتۋدىڭ، جاڭارعان قوعامدىق سانانىڭ ورەلى ىستەرىنە تەمىرقازىق بولارى ءسوزسىز»، – دەدى.

نازارباەۆ ۋنيۆەرسيتەتىنىڭ ۆيتسە-پرەزيدەنتى ق. دايروۆا: «الاش ارىستارىنىڭ يدەياسى ءدال بۇگىن جاڭا قازاقستانعا قاجەت بولىپ تۇر. الاش يدەياسى – قازاق يدەياسى، احمەت بايتۇرسىن ۇلى ءدال بۇگىن دە ۇلتىمىزدىڭ رۋحاني كوسەمى»، – دەپ اتاپ ءوتتى.

كونفەرەنتسيادا وتاندىق جانە شەتەلدىك تۇركىتانۋشى، احمەتتانۋشى عالىمدار، اتاپ ايتقاندا، ازەربايجان رەسپۋبليكاسى ۇلتتىق عىلىم اكادەمياسى ناسيمي اتىنداعى ءتىل ءبىلىمى ينستيتۋتى تۇرىك ءتىلى ءبولىمىنىڭ مەڭگەرۋشىسى، فيلولوگيا عىلىمدارىنىڭ دوكتورى ەلچين يبراحيموۆ، تۇرىك رەسپۋبليكاسى  پامۋككالە ۋنيۆەرسيتەتىنىڭ پروفەسسورى، دوكتور  نەرگيز بيراي، اكادەميك ش.قۇرمانباي ۇلى، تۇركىتانۋ جانە التايتانۋ عىلىمي-زەرتتەۋ ينستيتۋتىنىڭ ديرەكتورى ق.سارتقوجا ۇلى، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى ب.ءابدۋالي ۇلى، ل.ن. گۋميلەۆ اتىنداعى ەۋرازيا ۋنيۆەرسيتەتىنىڭ دوتسەنتى ق.كەمەڭگەر بايانداما جاساپ، ۇلت ۇستازى،  ۇلى رەفورماتور، الاش قوزعالىسى قايراتكەرىنىڭ عالىمدىق قىزمەتىنە  جانە عىلىمي ەڭبەكتەرىنە جان-جاقتى توقتالدى.

ەلوردادا احمەت بايتۇرسىن ۇلىنىڭ 150 جىلدىعىنا وراي عىلىمي كونفەرەنتسيا ءوتتى

كونفەرەنتسيا اياسىندا حالىقارالىق تۇركى اكادەمياسىنىڭ ازىرلەگەن «تۇركىستان – تۇرك ەلى ەنتسيكلوپەدياسى»، «تۇركى الەمىنىڭ تۇعىرلى تۇلعالارى»، «احمەت بايتۇرسىن ۇلى جانە الاش» كىتاپتارىنىڭ تۇساۋكەسەرى وتكىزىلدى.

 

 

ۇقساس جاڭالىقتار

Back to top button