شاتۋنوۆتىڭ «اناسى» ءباتيما تازەكەنوۆا تۋرالى دەرەكتەر جاريالاندى (ۆيدەو)

23 ماۋسىمدا ومىردەن وتكەن رەسەيلىك تانىمال ءانشى يۋري شاتۋنوۆتى بالالار ۇيىندە باۋىرىنا باسقان وكىل اناسى تۋرالى دەرەك جاريالاندى دەپ حابارلادى turkystan.kz.

بۇل جونىندە قازاقستاندىق جۋرناليست اينۇر مۇراتوۆا Facebook-تەگى پاراقشاسىندا جازدى.

«بەلگىلى مۋزىكانت يۋرا شاتۋنوۆ قايتىس بولىپتى. بالا كەزىمنەن اندەرىن جاقسى كورۋشى ەم. «لاسكوۆىي مايدىڭ» اندەرىمەن وستىك دەسەم دە بولادى. جاقسى كورگەن ادامىڭدى ۇلتىڭا جاقىنداتقىڭ كەپ تۇرادى عوي. مەنىڭ تاپقانىم، شاتۋنوۆتى تاربيەلەگەن، تالانتىن تاپ باسىپ، دۇرىس جولدى تاڭداۋىنا دانەكەر بولعان جاننىڭ قازاق ايەلى بولعانى ەدى…» دەپ جازدى ول.

جۋرناليست 2021 جىلى ءانشىنىڭ سۇحباتىنان اناسىنداي بولىپ كەتكەن ۇستازى ۆالەنتينا نيكولاەۆنا تازەكەنوۆا تۋرالى ايتقانىن تىڭداپ، تەگى قازاققا ۇقسايتىنىن بايقاعان. كەيىن ول تۋرالى دەرەكتەر ىزدەستىرىپ، عالامتوردان شىن اتى-ءجونىن انىقتاپتى.

«Wikipedia-دان «ۆالەنتينا نيكولاەۆنا تازەكەنوۆا – ءباتيما بولەسىمقىزى تازەكەنوۆا. ورىنبورداعى بالالار ۇيىنە باسشىلىق جاساعان ارداقتى ۇستاز. رەسەيدىڭ ەڭبەك سىڭىرگەن مۇعالىمى، پەداگوگيكا عىلىمدارىنىڭ كانديداتى، لۋنچارسكي اتىنداعى سىيلىقتىڭ لاۋرەاتى. «2-دارەجەلى وتان الدىنداعى قاجىرلى ەڭبەگى ءۇشىن» مەدالىنىڭ ەكى مارتە يەگەرى» دەگەن مالىمەت وقىدىم. بىراق ۇلتى تۋرالى اقپارات كەزدەستىرمەدىم. «ەسىمى ءباتيما، دەمەك، قازاق» دەگەن ويىما بەكي ءتۇستىم.

عالامتور اقتارىپ وتىرىپ، «2015 جىلى 21 قاڭتاردا ۇزاققا سوزىلعان دەرتتەن قايتىس بولدى» دەگەن اقپاراتپەن قوسا، قانشاما شاكىرتتەرىنىڭ قيماستىقپەن جازعان قوشتاسۋلارى ول كىسىنىڭ ءومىرى مەن تاعدىرى تۋرالى تەرەڭىرەك بىلۋگە جەتەلەدى»، – دەپ جازدى ا.مۇراتوۆا.

ول تازەكەنوۆانىڭ بۇرىن بەرگەن سۇحباتتارىن تاۋىپ، يۋري شاتۋنوۆقا قاتىستى ايتقان سوزدەرىن جاريالادى.

«مەن 32 جىلدان بەرى جەتىم بالالاردى تاربيەلەپ كەلەمىن. بىردە-ءبىر شاكىرتىم ميليتسيانىڭ ەسەبىندە تۇرمادى. بارلىق تۇلەكتەر عىلىم-ءبىلىم، ونەر، سپورتقا قۇشتارلىعىمەن ەرەكشەلەندى. ءۇش تۇلەگىمىز ماسكەۋ مەملەكەتتىك ۋنيۆەرسيتەتىن ءتامامداسا، تاعى ءبىر تۇلەگىمىز يۋرا شاتۋنوۆ – حالىقتىڭ ىستىق ىقىلاسىنا بولەنگەن تانىمال ءانشى»، – دەپ ايتقان ءباتيما بولەسىمقىزى.

ءجۋرناليستىڭ سوزىنشە، ءانشى گەرمانيادا تۇرعان كەزىندە رەسەيگە گاسترولدىك ساپارلارى بارىسىندا ارنايى ورىنبور قالاسىنداعى بالالار ۇيىنە بارىپ، ءباتيما بولەسىمقىزىمەن بالالىق شاعى مەن بالالاردىڭ بولاشاعى تۋرالى اڭگىمەلەسىپ، ءتۇرلى كەزدەسۋلەر دە وتكىزگەن.

سونىمەن قاتار ءيۋريدىڭ سۇحباتتارىنان دا اناسىنداي بولعان تازەكەنوۆاعا قاتىستى پىكىرى كەلتىرىلگەن.

«ءباتيما بولەسىمقىزى مەن ءۇشىن ورنى بولەك ادام ەدى. ول ماعان جىلۋلىق پەن انا ماحابباتىن سىيلاعان جان. ارامىزدا ەندى جوق دەگەندى ويلاۋدىڭ ءوزى جانىمدى اۋىرتادى. ول وتە مەيىرىمدى، ادال دا تازا، تەڭدەسى جوق جان ەدى. ءباتيما بولەسىمقىزىنىڭ جاساعان جاقسىلىقتارىن سوزبەن ايتىپ جەتكىزۋ مۇمكىن ەمەس. مەن ءۇشىن ورنى تولماس قازا. مەن ءباتيما بولەسىمقىزىن ماڭگى ەسىمدە ساقتايمىن»، – دەيدى ءباتيما انانى جانىنا ەڭ جاقىن ساناعان شاكىرتى يۋرا شاتۋنوۆ.

شىن مانىندە شاتۋنوۆتى ءومىرىنىڭ قيىن كەزەڭىندە باۋىرىنا باسىپ، قامقورلىعىنا الىپ، تاعدىرىن جاقسى ارناعا بۇرعان ءباتيما بولەسىمقىزى ونىڭ تۋعان اناسىنداي بولعان. يۋري شاتۋنوۆ سۇحباتتارىندا بالالار ۇيىندەگى انام دەپ ءجيى ايتادى.

ءجۋرناليستىڭ اقپاراتىنشا، 1986-1991 جىلدار ارالىعىندا بۇكىل كسرو حالقىن ەلەڭ ەتكىزىپ، انىمەن ەلىتكەن «لاسكوۆىي ماي» توبىنىڭ دا باسىندا ءباتيما بولەسىمقىزى تۇرعان. 1985 جىلى اناسى قايتىس بولىپ، اكەسى قامقورلىعىنا الماي جەتىم قالعان 11 جاسار يۋرا شاتۋنوۆتى دالادا قاڭعىپ جۇرگەن جەرىنەن قۇزىرلى ورىندار ۇستاپ الىپتى. ءبىلىم سالاسى باسشىلارى، قۇقىق قورعاۋ ورىندارى قاڭعىباس عۇمىر كەشكەن جەتكىنشەكتىڭ تاعدىرىن تالقىلاپ جاتقان كەزدە ءباتيما بولەسىمقىزى ءوزى باسقاراتىن بالالار ۇيىنە تاربيەلەۋگە ۇسىنىس جاسايدى. سول ساتتەن باستاپ، دالا كەزگەن سوتقار بالانى ەرەكشە قامقورلىعىنا الىپ، انالىق مەيىرىممەن جۇرەگىنە جول تاپقان. شاتۋنوۆتى بالالار ءۇيىنىڭ قابىرعاسىنداعى حوككەي ۇيىرمەسىنە قاتىستىرىپ، ومىرگە دەگەن كوزقاراسىن وزگەرتۋگە سەبەپشى بولادى دەيدى. وعان قوسا، گيتارا تارتىپ، ءان ايتۋعا قۇمارلىعىن بايقاپ، ونەرگە باۋليدى. بەلگىلى كومپوزيتور سەرگەي كۋزنەتسوۆكە تابىستاپ، يۋرا كومپوزيتوردىڭ سۇيەمەلدەۋىمەن ەڭ العاشقى ءانىن بالالار ءۇيىنىڭ اكت زالىندا ورىنداعان ەكەن. سونداي-اق تازەكەنوۆا يۋرا شاتۋنوۆقا عانا ەمەس، بالالار ۇيىندە تاربيەلەنگەن قانشاما بالاعا انا بولعان قازاقتىڭ قاراپايىم ايەلى.

شاتۋنوۆتىڭ «اناسى» ءباتيما تازەكەنوۆا تۋرالى دەرەكتەر جاريالاندى (ۆيدەو)

ۇقساس جاڭالىقتار

Back to top button