ەنەرگەتيكا ءمينيسترى جانار-جاعارمايدىڭ جاڭا شەكتى باعالارىن بەلگىلەدى

ەنەرگەتيكا ءمينيسترى ارنايى بۇيرىققا قول قويدى دەپ حابارلادى turkystan.kz ۆەدومستۆونىڭ ءباسپاسوز قىزمەتىنە سىلتەمە جاساپ.

«باعالارىنا مەملەكەتتىك رەتتەۋ بەلگىلەنگەن بولشەك ساۋدادا وتكىزىلەتىن مۇناي ونىمدەرىنە شەكتى باعالاردى بەلگىلەۋ تۋرالى» قازاقستان رەسپۋبليكاسى ەنەرگەتيكا ءمينيسترىنىڭ 2015 جىلعى 19 مامىرداعى № 361 بۇيرىعىنا وزگەرىستەر ەنگىزىلدى. بۇيرىق جوباسى رەسمي ينتەرنەت-رەسۋرستا جانە «اشىق نقا» ينتەرنەت-پورتالىندا ورنالاستىرىلعان.

سىلتەمە: https://www.gov.kz/memleket/entities/energo/documents/details/318993?lang=kk

جاڭا قۇجاتقا سايكەس، قازاقستاننىڭ بارلىق ايماعىندا جانارماي مەن ديزەل وتىنىنىڭ شەكتى باعاسى وزگەرەدى.

اتاپ ايتقاندا:

1) اي-80-ءنىڭ شەكتى باعاسى ليترىنە 89 تەڭگەنى قۇرايدى;

2) اي-92 جانە اي-93:

قوستاناي، سولتۇستىك قازاقستان وبلىستارىندا – ليترىنە 187 تەڭگە;

نۇر-سۇلتان، الماتى، شىمكەنت قالالارىندا، اقمولا، اقتوبە، شىعىس قازاقستان، باتىس قازاقستان، الماتى، اتىراۋ، جامبىل، قاراعاندى، قىزىلوردا، پاۆلودار، تۇركىستان، ماڭعىستاۋ، اباي، جەتىسۋ، ۇلىتاۋ وبلىستارىندا – ءليترى 182 تەڭگە;

3) ديزەل وتىنى (جازعى، ماۋسىمارالىق):

اقمولا، اقتوبە، شىعىس قازاقستان، باتىس قازاقستان، قوستاناي، سولتۇستىك قازاقستان وبلىستارىندا، سونداي-اق اباي وبلىسىندا – ليترىنە 260 تەڭگە;

نۇر-سۇلتان، الماتى، شىمكەنت قالالارىندا، الماتى، اتىراۋ، جامبىل، قاراعاندى، قىزىلوردا، پاۆلودار، تۇركىستان، ماڭعىستاۋ، سونداي-اق جەتىسۋ، ۇلىتاۋ وبلىستارىندا – ءليترى 230 تەڭگەدەن.

بۇل رەتتە اي-95 جانە قىسقى ديزەل وتىنىنىڭ باعاسىن رەتتەۋ قولدانىلمايدى.

وسى بۇيرىق العاشقى رەسمي جاريالانعان كۇنىنەن باستاپ قولدانىسقا ەنگىزىلەدى جانە كۇنتىزبەلىك 180 كۇن ىشىندە قولدانىلادى. ياعني، مۇنداي باعالار 2023 جىلدىڭ قاڭتار ايىنىڭ باسىنا دەيىن بەكىتىلەدى.

قۇجاتتا مۇناي ونىمدەرىن بولشەك ساۋدادا وتكىزۋ كورسەتكىشى مۇناي مەن مۇناي ونىمدەرىنىڭ الەمدىك باعاسى، ەۋروپالىق نارىقتارعا تاسىمالداۋ شىعىندارى، اكتسيزدەر، وپەراتسيالىق جانە باسقا دا شىعىستار ەسكەرىلەتىن فورمۋلا بويىنشا ايقىندالاتىنى اتاپ وتىلگەن.

ماسەلەن، «قارا التىننىڭ» باررەلىنە 130 دوللار قۇنىن ەسەپتەگەندە شەكتى بولشەك ساۋدا باعاسى: اي-92 ماركالى بەنزين – ليترىنە 236 تەڭگە، ديزەل وتىنى – ليترىنە 420 تەڭگە بولادى.

اي-92 ماركالى بەنزين باعاسىنىڭ 54 تەڭگەگە كۇرت ءوسۋى حالىققا سالماق سالاتىنىن ەسكەرە وتىرىپ، 2025 جىلعا دەيىن اي-92 جانە اي-93 جانارمايىنىڭ بولشەك ساۋداداعى شەكتى باعاسىن بىرتىندەپ ءوسىرۋ ۇسىنىلدى.

ۇقساس جاڭالىقتار

Back to top button