رامزان قادىروۆ قازاق حالقىنا ۆيدەوۇندەۋ جولدادى

بۇعان دەيىن رەسەيدىڭ قازاقستاندى قۇتقارعانىن مالىمدەگەن شەشەنستاننىڭ باسشىسى رامزان قادىروۆ قازاق حالقىنا بەينەۇندەۋ جولدادى. ول ۆيدەوداعى سوزدەرىن ارانداتۋشىلار بۇرمالاپ جەتكىزگەنىن جانە قازاق حالقىن ەرەكشە قۇرمەتتەيتىنىن ايتتى دەپ حابارلادى turkystan.kz.

بۇل تۋرالى قادىروۆ Telegram كانالىندا جاريالاعان ۆيدەوسىندا مالىمدەدى.

«مەن دە قازاقپىن. مەنىڭ اكەم قازاقستاندا دۇنيەگە كەلگەن، اتام قازاقستاندا جۇمىس ىستەگەن، اتامنىڭ اعاسى قازاقستاندا جەرلەنگەن. مەن ومىرىمدە ەشقاشان قازاق حالقى تۋرالى جامان ءسوز ايتقان ەمەسپىن. تەك جالپى ساياسات تۋرالى ايتتىم.

قازاقستان 1944 جىلى شەشەندەرگە سوڭعى نانىن ءۇزىپ بەرگەن. سوندىقتان قازاقتار تۋرالى جامان ءسوز ايتپايمىن جانە باسقاعا دا ايتۋعا جول بەرمەيمىن. ءوزىن قۇرمەتتەيتىن كەز كەلگەن شەشەن ازاماتى دا وسىنداي پىكىردە… وداندا ءبىزدىڭ قارىم-قاتىناسىمىزعا ىرىتكى سالاتىن ارانداتۋشىلاردى انىقتاۋعا كەڭەس بەرەمىن»، – دەدى رامزان قادىروۆ.

شەشەنستان باسشىسى حايپ قۋاتىن بلوگەرلەرگە دە جاۋاپ بەردى.

«حايپ جاسايتىن بلوگەرلەر مەنى قاتتى رەنجىتتى. مەنىڭ ۆيدەو ۇندەۋىمدەگى اڭگىمە ساياسات تۋرالى بولدى، ياعني ۇقشۇ مەن مەملەكەتتىڭ ساياسي پوزيتسياسى تۋرالى بولىپ وتىرعانىن اتاپ ءوتتىم.

مەن قازاق حالقىن وتە جاقسى كورەمىن. مەن وتە ريزامىن. مەن عانا ەمەس، بارلىق شەشەندەر، ءبىزدىڭ ومىردەن وتكەن اتا-بابالارىمىز. ولار قازاق حالقى ءۇشىن قاشاندا ريزا بولىپ، دۇعا ەتكەن. ءبىر-بىرىمىزگە العىس ايتىپ، باۋىرلاس بولىپ قالا بەرەيىك. ءبىزدىڭ ارامىزدا وت سالاتىندار بولماي-اق قويسىن. ەگەر قازاقستانعا كومەك قاجەت بولسا، مەن قازاق حالقىنىڭ قاسىندا ءبىرىنشى بولىپ تۇرامىن»، – دەدى قادىروۆ.

ەسكە سالساق، بۇعان دەيىن رامزان قادىروۆ ۇقشۇ ەلدەرىنە جولداعان ۆيدەوسىن جاريالاعان ەدى.

«رەسەي قازاقستاندى قۇتقاردى. ارمەنيا مەن ءازىربايجان اراسىندا سوعىس بولعان كەزدە پۋتين باستى ءرول اتقاردى. قازاقستان ەگەمەندىگىنەن ايىرىلا باستاعان كەزدە كىم كومەكتەستى؟ رەسەي. ەشكىمنەن قورىقپادى. نەلىكتەن ءبىزدىڭ اتا-بابالارىمىزدى ولتىرگەن باندەرلەرگە، ناتسيستەرگە جانە فاشيستەرگە قارسى ۇستانىمىڭىز جوق؟» – دەگەن ەدى ول.

ۇقساس جاڭالىقتار

Back to top button