ەلىمىزدە بالالار اياق كيىمى 14% قىمباتتادى

ەnergyprom.kz مالىمەتىنە قاراعاندا، ءبىر جىل ىشىندە قازاقستاندا اياق كيىم باعاسى 10%-عا قىمباتتاعان دەپ حابارلادى turkystan.kz.

2022 جىلدىڭ قاڭتار-مامىر ايلارىندا قازاقستاندا 546 مىڭ جۇپ اياق كيىم شىعارىلعان. بۇل بىلتىرعى كورسەتكىشتەن 13،3% از.

وڭىرلەر بولىنىسىندە بۇل كورسەتكىش بويىنشا الماتى قالاسى الدا تۇر. مۇندا 253،3 مىڭ جۇپ اياق كيىم وندىرىلگەن. ودان كەيىن جامبىل (73،4 مىڭ جۇپ) جانە الماتى (57،9 مىڭ جۇپ) وبلىستارى تۇر.

«2022 جىلدىڭ ءبىرىنشى توقسانىندا وتاندىق وندىرۋشىلەر حالىق سۇرانىسىنىڭ تەك 4،2%-ىن عانا قاناعاتتاندىرعان. ياعني، بۇكىل نارىق يمپورتقا تاۋەلدى دەۋگە بولادى. قاڭتار-ناۋرىز ارالىعىندا ەلگە سىرتتان 6،9 ملن جۇپ اياق كيىم اكەلىنگەن. ءبىر قۋانتارلىعى، بۇل كورسەتكىش 2021 جىلعىدان 2،6 ەسە از»، دەلىنگەن اقپاراتتا.

2022 جىلدىڭ مامىر ايىنداعى قورىتىندىسى بويىنشا، اياقكيىم باعاسى 9،7%-عا وسكەن.

وڭىرلەردەگى قىمباتتاۋ دەڭگەيى ءارتۇرلى. قوستاناي وبلىسىندا 4،9% بولسا، ماڭعىستاۋ وبلىسىندا 19،5% وسكەن. ءبىر جىل ىشىندە بالالار اياق كيىمى 14،2%-عا، ايەلدەر اياق كيىمى 8،8%-عا، ەرلەر اياق كيىمى 7،9%-عا قىمباتتادى.

ۇقساس جاڭالىقتار

Back to top button