الماتىدا ءتىرى ادامدى قايتىس بولعاندار تىزىمىنە قوسىپ قويعان

الماتى تۇرعىنى ءبىر جىل بويى قايتىس بولعاندار تىزىمىندە جۇرگەن دەپ حابارلادى turkystan.kz.

قالالىق پروكۋراتۋرا مالىمەتىنشە، 2019 جىلى ب. ەسىمدى ايەل جالعان قۇجات جاساعان. ول ءوز قۇربىسى ا-نىڭ جەكە كۋالىگىنە ءوز سۋرەتىن جاپسىرىپ العان. 2021 جىلدىڭ قىركۇيەگىندە ب. اۋرۋحانادا كوز جۇمادى. وسىدان كەيىن تۇركسىب اۋدانىنىڭ احات ءبولىمى ونىڭ دەرەكتەرىن «قايتىس بولدى» دەگەن بازاعا ەنگىزگەن.

«وسى كەزدەن باستاپ ايەل ادام مەملەكەتتىك قىزمەتتەردى، كەپىلدەندىرىلگەن تەگىن مەديتسينالىق كومەكتى پايدالانۋعا مۇمكىندىگىنەن ايىرىلعان. ويتكەنى ول بارلىق ورگاندا قايتىس بولعاندار تىزىمىندە جۇرگەن»، – دەدى ۆەدومستۆونىڭ ءباسپاسوز قىزمەتى وكىلدەرى.

وسىدان كەيىن ازاماتشا پروكۋراتۋراعا جۇگىنىپ، بارلىق ءمان-جايدى تەكسەرۋلەرىن وتىنگەن.

«سوتقا ءوز بەتىنشە جۇگىنۋ مۇمكىن ەمەسىن ەسكەرە وتىرىپ، تۇركسىب اۋدانىنىڭ پروكۋراتۋراسى ارىزدانۋشىنىڭ مۇددەسىن كوزدەپ، قايتىس بولعانى تۋرالى جازبانىڭ كۇشىن جويۋ تۋرالى ارىزدى سوتقا جولدادى. احات تالاپ ارىزدى مويىندادى جانە ءولىم تۋرالى جازبانى جويدى»، – دەپ تولىقتىردى ۆەدومستۆو وكىلدەرى.

ناتيجەسىندە، قۇجاتتى قولدان جاساۋ فاكتىسى بويىنشا پوليتسيا سوتالدى تەرگەۋدى باستادى.

ۇقساس جاڭالىقتار

Back to top button