توقاەۆ گرۋزيا پرەمەر-مينيسترىمەن كەزدەستى

مەملەكەت باسشىسى گرۋزيانىڭ پرەمەر-ءمينيسترى يراكلي گاريباشۆيليمەن كەزدەستى دەپ حابارلادى turkystan.kz اقورداعا سىلتەمە جاساپ.

قاسىم-جومارت توقاەۆ قاتار ەكونوميكالىق فورۋمى اياسىندا گرۋزيانىڭ پرەمەر-ءمينيسترى يراكلي گاريباشۆيليمەن كەزدەسۋ وتكىزدى.

كەزدەسۋدە ەكىجاقتى ىقپالداستىقتىڭ وزەكتى ماسەلەلەرى تالقىلاندى.

«ءسىزدىڭ نازارىڭىزدى مىناداي باعىتتارداعى ىنتىماقتاستىقتى دامىتۋ پەرسپەكتيۆالارىنا اۋدارعىم كەلەدى. اتاپ ايتقاندا، ءوزارا ساۋدا كولەمىن ۇلعايتۋ. مەنىڭ ويىمشا، ءبىز ونىمدەردى ءوزارا جەتكىزۋدى ارتتىرا الامىز. قازاقستانعا جانە ورتالىق ازيانىڭ باسقا دا ەلدەرىنە تاۋار جەتكىزۋ جاعىنان گرۋزيانىڭ ۇلكەن قورى بار. وسى باعىتتا تىعىز جۇمىس ىستەۋگە دايىنبىز»، – دەدى قاسىم-جومارت توقاەۆ.

مەملەكەت باسشىسى كولىك-لوگيستيكا سالاسىندا، اتاپ ايتقاندا قازاقستاننىڭ اقتاۋ جانە قۇرىق ايلاقتارىنىڭ، سونداي-اق باتۋمي تەڭىز ايلاعىنىڭ الەۋەتىن پايدالانا وتىرىپ، ەكى ەل اراسىنداعى جۇك تاسىمالىن بىرلەسىپ جۇزەگە اسىرۋدىڭ ماڭىزدى ەكەنىن اتاپ ءوتتى.

ءوز كەزەگىندە يراكلي گاريباشۆيلي دوحادا كەزدەسۋگە ۋاقىت بولگەنى ءۇشىن قاسىم-جومارت توقاەۆقا العىس ءبىلدىرىپ، گرۋزيانىڭ قازاقستانمەن اراداعى كوپجاقتى ءارى ءوزارا ءتيىمدى ىنتىماقتاستىقتى ودان ءارى دامىتۋعا ءازىر ەكەنىن راستادى. گرۋزيانىڭ پرەمەر-ءمينيسترى كەلەسى ايدىڭ اياعىندا قازاقستانعا كەلۋدى جوسپارلاپ وتىر.

ۇقساس جاڭالىقتار

Back to top button