اقتوبە وبلىسىندا 130 اۋىل اكىمى ءبىلىمىن جەتىلدىرۋدە

حالىقتىڭ ەكونوميكالىق بەلسەندىلىگىن ارتتىرۋ باعىتىندا اقتوبە وبلىسىنان 100-دەن استام اۋىل اكىمى ءبىلىمىن جەتىلدىردى. قازىر قاتىسۋشىلاردىڭ سوڭعى لەگى وقىتىلۋدا دەپ حابارلادى turkystan.kz.

«AMANAT» پارتياسىنىڭ ساياسي مەنەدجمەنت اكادەمياسى ۇيىمداستىرعان سەمينارعا اكادەميا ديرەكتورى دانيار مۇقيتانوۆ، وبلىس اكىمىنىڭ ورىنباسارى ەرمەك كەنجەحان ۇلى، پارتيانىڭ وبلىستىق فيليالى اتقارۋشى حاتشىسى ەربول داناعۇلوۆ ارنايى قاتىستى.

اقتوبە وبلىسىندا 130 اۋىل اكىمى ءبىلىمىن جەتىلدىرۋدە

ساياسي مەنەدجمەنت اكادەمياسىنىڭ ديرەكتورى دانيار مۇقيتانوۆ پارتيا، اسىرەسە، اۋىلدىق جەرلەردە حالىقتىڭ تابىسىن ارتتىرۋ ماسەلەلەرىنە ەرەكشە نازار اۋدارىپ وتىرعانىن اتاپ ءوتتى.

«قازىر ءبىز اقمولا، قىزىلوردا جانە اقتوبە وبلىستارىنىڭ اۋىل اكىمدەرىن وقىتىپ جاتىرمىز. بارلىعى 535 ادام قامتىلادى. ساباقتار 22 ماۋسىمدا اياقتالادى. حالىقتىڭ تابىس ماسەلەسى قازاقستاندا، اسىرەسە حالىقتىڭ 40 پايىزدان استامى تۇراتىن اۋىلداردا وتە وزەكتى ەكەنى جاسىرىن ەمەس. ءبىز ولاردى اۋىل سكرينينگىن قالاي جۇرگىزۋ، ناقتى اۋىلدىق وكرۋگتە ەكونوميكانى كوتەرۋدىڭ پەرسپەكتيۆالىق باعىتتارىن انىقتاۋدى، جۇمىس ورىندارىن قۇرۋدى كوزدەيتىن بيزنەس جوبانى قالاي جاساۋعا بولاتىنىن ۇيرەتەمىز»، – دەدى دانيار مۇقيتانوۆ.

پيلوتتىق جوبا نەگىزىندە باعدارلاما جەتىلدىرىلىپ، جىل سوڭىنا دەيىن بۇكىل قازاقستان بويىنشا ىسكە قوسىلادى.

اقتوبە وبلىسىندا 130 اۋىل اكىمى ءبىلىمىن جەتىلدىرۋدە

وبلىس اكىمىنىڭ ورىنباسارى ەرمەك كەنجەحان ۇلى اكىمدەرگە جاڭا قازاقستاندى قۇرۋ ءۇشىن وزگەرىستەردى وزدەرىنەن باستاۋ قاجەت ەكەنىن ايتتى. جاڭا باعىتتا جۇمىس جاساۋعا وسىنداي سەميناردىڭ ۇلەسى مول ەكەنىن جەتكىزدى.

«پارتيا تاراپىنان جانە جالپى مەملەكەت تاراپىنان بارلىق جاعداي جاسالۋدا. ءبىز ولاردى ءتيىمدى پايدالانۋىمىز كەرەك. العان ءبىلىمىمىزدى دۇرىس باعىتتاپ، ءتيىمدى قولدانساق الدىمىزعا قويعان ماقساتتارعا جەتەمىز دەگەن ويدامىن»، – دەدى ەرمەك كەنجەحان ۇلى.

سەمينارعا قاتىسۋشىلار بيزنەس-جوسپارلاردى دايىنداۋدى ۇيرەنىپ، جوبالاردى قارجىلاندىرۋدىڭ، سەرتيفيكاتتاۋ مەن ستاندارتتاۋدىڭ كوزدەرى تۋرالى تولىق اقپارات الۋدا. وقۋ پراكتيكالىق ساباقتارمەن ۇشتاستىرىلعان.

«اۋىل – ەل بەسىگى، اۋىل وركەندەسە، مەملەكەت تە وركەندەيدى. سوندىقتان حالىقتىڭ ەكونوميكالىق بەلسەندىلىگىن ارتتىرۋ ماڭىزدى. وسى تۇرعىدا سەميناردىڭ پايداسى مول دەپ ەسەپتەيمىن. اكىمدەر اۋىلعا جاڭا سەرپىن، تىڭ تىنىس بەرەتىندەي مالىمەت العانى ءسوزسىز»، – دەپ قورىتىندىلادى پارتيانىڭ وبلىستىق فيليالى اتقارۋشى حاتشىسى ەربول داناعۇلوۆ.

 

ۇقساس جاڭالىقتار

Back to top button