AMANAT-تىڭ اتقارۋشى حاتشىسى ازاماتتاردى قابىلدادى

AMANAT پارتياسىنىڭ اتقارۋشى حاتشىسى اسحات ورالوۆ پارتيانىڭ رەسپۋبليكالىق قوعامدىق قابىلداۋ بولمەسىندە ازاماتتاردى قابىلدادى. ول ءتۇرلى وڭىرلەردەن تۇسكەن وتىنىشتەردى وفلاين جانە ونلاين فورماتتا قارادى. تۇرعىندار كوتەرگەن جەكە جانە جۇيەلى سيپاتتاعى ماسەلەلەردى شەشۋ زاڭناماعا وزگەرىستەر ەنگىزۋدى تالاپ ەتەدى.

اقمولا وبلىسى ەگىندىكول اۋىلىنىڭ تۇرعىنى سۆەتلانا گۋربانوۆا سۋمەن جابدىقتاۋدا ۇشىراسىپ وتىرعان پروبلەمالارى تۋرالى ايتتى.

AMANAT-تىڭ اتقارۋشى حاتشىسى ازاماتتاردى قابىلدادى

«سۋ ماسەلەسى شەشىلمەي كەلەدى. ۇڭعىما دا، قۇدىق تا جوق، بار ءۇمىتىمىز تەك نۇرا كانالىندا. مۇنداعى جاعداي قيىن، اۋدان جويىلۋدىڭ از-اق الدىندا تۇر. ادامداردىڭ كوبى بۇل جەردەن كوشىپ كەتپەك، سۋسىز قالاي ءومىر سۇرەدى؟ ماسەلە وتكەن جىلى، ءبىز جاز بويى سۋسىز وتىرعان كەزدە شەگىنە جەتتى. اپتاسىنا 1-2 رەت سۋ الىپ كەلىپ، ءار ۇيگە شامامەن 200-250 ليتردەن بەرەدى. بىراق بارلىعىندا بىردەي سۋدى ۇزاق ۋاقىت ساقتايتىن بوشكە دە جوق»، – دەدى ول.

بۇعان جاۋاپ رەتىندە ەكولوگيا مينيسترلىگى سۋ رەسۋرستارى كوميتەتىنىڭ توراعاسى نۇرلان الدامجاروۆ بيىل جوبالىق-سمەتالىق قۇجاتتاما ازىرلەنەتىنىن، ال نۇرا توپتىق سۋ قۇبىرىن جوندەۋگە 2023 جىلى كىرىسەتىندەرىن جەتكىزدى.

وسىعان ۇقساس ماسەلەمەن ماڭعىستاۋ وبلىسى وڭدى اۋىلىنىڭ تۇرعىنى باسشى كوبەنتاەۆ تا پارتياعا جۇگىندى.

باتىس قازاقستان وبلىسى پودستەپنوە اۋىلىنىڭ تۇرعىنى بايان تولەۋتاەۆا ءوز اۋىلىندا بالالار ءۇش اۋىسىمدا وقۋعا ءماجبۇر ەكەنىن العا تارتتى.

«اۋىلىمىز ورالدان 12 شاقىرىم جەردە ورنالاسقان. حالىق سانى 15 مىڭ ادامعا جەتتى. جىل سايىن 1-سىنىپقا باراتىن بالالاردىڭ سانى ارتىپ كەلەدى. جاڭا مەكتەپتىڭ جوبالىق-سمەتالىق قۇجاتتاماسى دايىن، ءبىز قۇرىلىستى بارىنشا جىلدامداتۋدى سۇرايمىز»، – دەدى ول.

ءوز كەزەگىندە قوستاناي قالاسىنان كەلگەن ايىمگۇل احمەتوۆا دەنساۋلىق ساقتاۋ جۇيەسىندە جۇمىس ىستەيتىن، بىراق مەديتسينالىق قىزمەتكەرلەر قاتارىنا كىرمەيتىن تاربيەشىلەردى پەداگوگتارعا تەڭەستىرۋ قاجەت دەپ ەسەپتەيدى. بۇل شارا وسى سالاداعى ەڭبەكاقى مولشەرىن ارتتىرۋعا مۇمكىندىك بەرەدى.

قازاقستاندىق بىرىڭعاي ستوماتولوگتار قاۋىمداستىعىنىڭ پرەزيدەنتى نازىم بەكتۇرعانوۆا بالالار مەن جۇكتى ايەلدەرگە پروفيلاكتيكالىق ستوماتولوگيالىق قىزمەت كورسەتۋ بويىنشا مەملەكەتتىك باعدارلاما ازىرلەۋدى ۇسىندى.

كوكشەتاۋ قالاسىنىڭ تۇرعىنى فاريدا كوشەنوۆا «باقىتتى وتباسى» يپوتەكالىق باعدارلاماسىنا جەتىم بالالار ساناتىن قوسۋدى سۇرادى. ولار قازىرگى  ۋاقىتتا بۇل باعدارلاما بويىنشا باسپانا الا الامايدى. بۇعان جاۋاپ رەتىندە قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى تيمۋر قاراعويشين مۇنداي وزگەرىستەر ۇكىمەت قاۋلىسىمەن بەكىتىلگەنىن، جوبا قازىر مەملەكەتتىك ورگانداردا كەلىسۋ ساتىسىندا ەكەنىن اتاپ ءوتتى.

پاۆلودارلىق كاسىپكەر ۆيكتور پرياحين عيماراتتاردى پايدالانۋعا بەرۋ كەزىندە ورىن الاتىن كەلەڭسىزدىكتەرگە توقتالدى.

«كەز كەلگەن نىساندى پايدالانۋعا بەرۋ كەزىندە الەۋمەتتىك قورعاۋ ورگانى ءجۇرىپ-تۇرۋى شەكتەۋلى ادامدار ءۇشىن ىڭعايلى بولۋىن قامتاماسىز ەتۋ بولىگىنە سايكەس كەلەتىنى تۋرالى دەكلاراتسيانى كەلىسەدى. الايدا، بۇل دەكلاراتسيانى كەلىسۋدىڭ ناقتى الگوريتمى مەن مەرزىمى جوق. وسى فۋنكتسيانى مەملەكەتتىك قىزمەتتەر تىزىلىمىنە قوسىپ، ارنايى ستاندارت ازىرلەۋدى سۇرايمىز»، – دەدى ول.

الماتىلىق ەكوبەلسەندى سەرگەي سنەگيرەۆ جانۋارلارعا جاۋاپكەرشىلىكپەن قاراۋ تۋرالى زاڭ نورمالارىنىڭ ورىندالۋىنا قوعامدىق باقىلاۋ جۇرگىزۋ جوباسىن ىسكە قوسۋدى ۇسىندى.

ءاربىر ءوتىنىش بويىنشا پارتيانىڭ اتقارۋشى حاتشىسى بىرقاتار ناقتى تاپسىرما بەردى. وتىنىشتەردىڭ باسىم بولىگىن اسحات ورالوۆ جەكە باقىلاۋىنا الدى.

«AMANAT پارتياسىنىڭ XXI سەزىندە پرەزيدەنت قاسىم-جومارت توقاەۆ قوعامدىق قابىلداۋ بولمەلەرىنىڭ قىزمەتىن جانداندىرۋدى تاپسىردى. «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا، پارتيا  بيلىك پەن ازاماتتار اراسىنداعى كوپىر بولۋى ءتيىس. ولار ادىلدىك ىزدەپ، بىزگە كەلەدى. بىردە-ءبىر ءوتىنىش نازاردان تىس قالمايدى»، – دەپ اتاپ ءوتتى اتقارۋشى حاتشى.

AMANAT-تىڭ اتقارۋشى حاتشىسى ازاماتتاردى قابىلدادى

ايتا كەتەيىك، AMANAT پارتياسىنىڭ قوعامدىق قابىلداۋ بولمەلەرىنە جىل باسىنان بەرى 65 مىڭنان استام ادام جۇگىنگەن. تۇرعىنداردى نەگىزىنەن الەۋمەتتىك قامسىزداندىرۋ – 30%، تۇرعىن ءۇي-كوممۋنالدىق شارۋاشىلىق – 16%، تۇرعىن ۇيمەن قامتاماسىز ەتۋ جانە جەر ۋچاسكەلەرىن ءبولۋ – 11% تولعاندىرادى. مەملەكەتتىك ورگانداردىڭ باسشىلارى مەن ءتۇرلى دەڭگەيدەگى دەپۋتاتتار 13 مىڭنان استام قابىلداۋ وتكىزىپ، ونىڭ بارىسىندا 36 مىڭ ادامنىڭ تالاپ-تىلەگى تىڭدالدى.

«موبيلدىك قوعامدىق قابىلداۋلار» جوباسى اياسىندا 4 اي ىشىندە پارتيالىقتار ەلىمىز بويىنشا 578 اۋىلدى ارالاپ، 5 مىڭعا جۋىق ازاماتتى قابىلدادى.

 

ۇقساس جاڭالىقتار

Back to top button