اسحات ورالوۆ دارىگەرلەردى كاسىبي مەرەكەمەن قۇتتىقتادى

AMANAT پارتياسىنىڭ اتقارۋشى حاتشىسى اسحات ورالوۆ قازاقستاندىق دارىگەرلەردى مەديتسينا قىزمەتكەرلەرى كۇنىمەن قۇتتىقتادى دەپ حابارلادى turkystan.kz.

«ادام جانىنىڭ اراشاشىسى – دارىگەرلەر بارلىق ۋاقىتتا ۇلكەن ابىرويعا يە، قانداي قۇرمەتكە دە لايىق. دۇنيەنى دۇربەلەڭگە سالعان قاتەرلى ىندەت كەزىندە قىزمەتىنە ادال، ەلگە جاناشىر دəرىگەرلەر ۋاقىتپەن ساناسپاي، ەڭبەگىن بۇلداماي مىلتىقسىز مايداننىڭ الدىڭعى شەبىنەن تابىلدى. ولاردىڭ وسى اۋىر كەزەڭدەگى قىزمەتى ەرلىكپەن تەڭ. دەرتكە ءدارۋ، جۇرەككە جىلۋ سىيلاعان، ءاربىر ناۋقاستىڭ ءومىرى مەن ساۋلىعى ءۇشىن جان اياماي ارپالىسقان ابزال جاندارعا ايتار العىسىمىز شەكسىز»،– دەدى ول.

مەرەكە قارساڭىندا پارتيانىڭ اتقارۋشى حاتشىسى وتاندىق دەنساۋلىق ساقتاۋ سالاسى ارداگەرلەرىنىڭ ۇيىنە باردى. ولاردىڭ اراسىندا 40 جىلدان استام ۋاقىتىن اكۋشەرلىك جانە گينەكولوگيا سالاسىنا ارناعان كۇمىسكۇل بايتىلەۋوۆا، 15 جىل بويى ەلوردالىق اۋرۋحانالاردىڭ بىرىندە باس دارىگەر بولعان گۇلجان بەيبىتوۆا جانە ۇلتتىق دەنساۋلىق ساقتاۋ پالاتاسىنىڭ نۇر-سۇلتان قالاسىنداعى فيليالىنىڭ باسشىسى قارشىعا قۇلمۇقانوۆ بار.

ايتا كەتسەك، AMANAT پارتياسى دەنساۋلىق ساقتاۋ سالاسىنا ەرەكشە كوڭىل بولەدى. اتاپ ايتقاندا، سايلاۋالدى ۋادەلەردى ىسكە اسىرۋ اياسىندا دارىگەرلەردىڭ جالاقىسى 30%-عا، ال ورتا مەديتسينالىق قىزمەتكەرلەردىڭ جالاقىسى 20%-عا ۇلعايتىلدى.

وتكەن جىلى مەديتسينا قىزمەتكەرلەرىن، ونىڭ ىشىندە بالالار دارىگەرلەرىن قوسا العاندا، تار شەڭبەرلى مامانداردى دايارلاۋعا 4،6 مىڭنان استام گرانت ءبولىندى. ەلىمىز بويىنشا العاشقى مەديتسينالىق-سانيتارلىق كومەك كورسەتەتىن 30 نىسان اشىلدى. ال ءمامس-دى ەنگىزۋ جانە كۆوتالاردى ۇلعايتۋ ەسەبىنەن حالىققا شامامەن 1 ملن. قىمبات تۇراتىن مەديتسينالىق قىزمەت كورسەتىلدى.

2023 جىلعا قاراي دارىگەرلەردىڭ جالاقىسىن 2،5 ەسەگە ارتتىرۋ، ال دەنساۋلىق ساقتاۋدى قارجىلاندىرۋ كولەمىن بارلىق كوزدەردەن ءىجو-ءنىڭ 5%-ىنا دەيىن جەتكىزۋ جوسپارلانۋدا.

ۇقساس جاڭالىقتار

Back to top button