«30-50 تۇرعىنى بار اۋىلدارعا ينتەرنەت تارتۋ ءتيىمسىز» – بقو اكىمى

بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا وبلىس اكىمى عالي ەسقاليەۆ ايتتى دەپ حابارلادى turkystan.kz baq.kz سايتىنا سىلتەمە جاساپ.

«30-50 ادامنان تۇراتىن شاعىن اۋىلدارىمىز بار. ول جەرلەرگە مەملەكەتتىك تۇرعىدان دا، موبيلدىك وپەراتورلاردىڭ ەرەجەلەرى بويىنشا دا ينتەرنەتتى جەتكىزۋ مۇمكىن ەمەس، ويتكەنى ءتيىمسىز»، – دەدى ول ءوز سوزىندە.

ەسقاليەۆتىڭ سوزىنشە، ينتەرنەت تارتۋ ماسەلەسىن تۇرعىندارىنىڭ سانى 100-دەن اساتىن اۋىلداردا عانا شەشۋ قاراستىرىلعان.

«باتىس قازاقستان وبلىسىندا 416 اۋىل بار. ءبىزدىڭ ماقساتىمىز – ءبىرىنشى كەزەكتە 100-دەن استام حالقى بار اۋىلدارعا ينتەرنەت جانە موبيلدىك بايلانىس وتكىزۋ. بىلتىر ءتيىستى جوسپاردى بەكىتىپ، سول جوسپار بويىنشا قازىر جۇمىستار اتقارىپ جاتىرمىز. بىلتىر ءموبيلدى وپەراتورلارمەن بىرلەسىپ، 72 اۋىلدىق ەلدى مەكەنگە ءموبيلدى بايلانىستى جەتكىزدىك نەمەسە ينتەرنەت ساپاسىن ارتتىردىق. ەندى بيىلعى جىلدىڭ جوسپارى كەم دەگەندە 134 اۋىلدىق ەلدى مەكەنگە ينتەرنەت پەن موبيلدىك بايلانىستى جەتكىزۋ نەمەسە ساپاسىن ارتتىرۋ. ەڭ ۇلكەن اۋىلداردىڭ ماسەلەسىن بيىل شەشۋىمىز كەرەك»، – دەدى ول.

ايتا كەتسەك، باتىس قازاقستان وبلىسىنىڭ اكىمى عالي ەسقاليەۆ بۇل ماسەلەنى اۋىلدا ينتەرنەت ساپاسىن كۇشەيتۋ باعىتىندا جوبالار جۇزەگە اسىرىلا ما دەگەن جۋرناليست سۇراعىنا جاۋاپ بەرۋ بارىسىندا ايتتى.

ۇقساس جاڭالىقتار

Back to top button