ҰБТ нәтижесіне қатысты мәліметтер жарияланды

ҰБТ нәтижесіне қатысты мәліметтер жарияланды

ҰБТ нәтижесіне қатысты мәліметтер жарияланды
ашық дереккөзі
Қазақстанда негізгі Ұлттық бірыңғай тестілеуге қатысуға 290 мыңға жуық өтініш түсті. Бүгінгі күнге дейін  215 талапкер емтихан тапсыру мүмкіндігінен айырылды деп хабарлады turkystan.kz. ҰБТ-ның аралық нәтижесін ұсынған Ұлттық тестілеу орталығының мәліметінше, бүгінге дейін түлектердің 75%-ы – қазақ тілінде, 24,8%-ы - орыс тілінде, 0,1%-ы ағылшын тілінде емтиханнан өтті. Шекті балды 67%-ға жуық талапкер ғана жинай алды. Орташа балл – 66 балды құрады. Осы уақытқа дейін смартфон, шпаргалка және басқа да тыйым салынған заттарды алып өтпек болған 215 талапкер тест тапсыру мүмкіндігінен айырылды. Тестілеу кезінде ережелерді бұзғаны үшін аудиториядан 199 адам шығарылып, нәтижелері жойылды.
«Тестілеудің бесінші аптасы аяқталды, барлығы штатты режимде өтіп жатыр. Жалпы, негізгі Ұлттық бірыңғай тестілеуге қатысуға 290 мыңға жуық өтініш келіп түсті, олардың ішінде 160 мың өтініш бірінші мүмкіндікке, 130 мың өтініш екінші мүмкіндікке берілген. Қазіргі таңда 170 мың рет тест тапсырылды, яғни талапкерлер екінші мүмкіндігін пайдалана бастады. Өткен аптамен салыстырғанда орташа балл 1 балға жоғарылады», – деді Ұлттық тестілеу орталығының директоры Руслан Емелбаев.
Еске салсақ, ҰБТ-ға кіргізу кезінде үш деңгейлі жүйе қолданылады: Face ID жеке басын сәйкестендіру арқылы, жеке куәлік бойынша, сондай-ақ отырғызу орнында жеке басын сәйкестендіру. Биыл тестілеу «1 компьютер – 2 камера – 1 тестіленуші» қағидатымен өтеді. Егер бұған дейін тестілеу процесін әр компьютердің жоғарғы жағынан бақылап отыратын бір камера ғана болса, енді тестіленушінің жеке басын сәйкестендіруге және бөгде адамдардың кіруіне жол бермеуге мүмкіндік беретін екінші (фронталды) камера орнатылған. Талапкерлер тестілеу аяқталғаннан кейін 30 минут ішінде апелляцияға бере алады.