قازاقستان الەم ەلدەرىن يادرولىق قارۋدان تۇبەگەيلى باس تارتۋعا شاقىردى

بۇل تۋرالى سىرتقى ىستەر ءمينيسترى مۇحتار تىلەۋبەردى ۆەنادا يادرولىق قارۋعا تىيىم سالۋ تۋرالى شارتقا قاتىسۋشى مەملەكەتتەردىڭ كەزدەسۋىنە ارنالعان ماقالاسىندا مالىمدەدى دەپ حابارلادى turkystan.kz.

 ول ءوز ماقالاسىندا رەسەي مەن ۋكراينا اراسىنداعى اسكەري قاقتىعىس كەزەڭىندە قازاقستان الەم ەلدەرىن يادرولىق قارۋدى تولىق جويۋ جوسپارىن ازىرلەۋگە شاقىراتىنىن ايتقان.

«ءبىز بارلىق مەملەكەتتەردى، سونىڭ ىشىندە يادرولىق دەرجاۆالاردى بۇل قارۋدى تولىعىمەن جويۋدىڭ كەزەڭ-كەزەڭىمەن جوسپارىن ازىرلەۋگە شاقىرامىز»، – دەپ مالىمدەگەن تىلەۋبەردى.

ونىڭ ايتۋىنشا، بۇل ماقساتقا جەتۋ ءۇشىن قازاقستان الدىندا كوپتەگەن ساياسي جانە تەحنيكالىق كەدەرگىلەر تۇر. بىراق، بۇل قادام – يادرولىق قارۋسىز كەلەشەككە باستايتىن جول.

«ءبىز بۇل باعىتتا پراكتيكالىق جۇمىستى باستاۋ قاجەت دەپ سانايمىز»، – دەدى سىرتقى ىستەر ءمينيسترى.

يادرولىق قارۋعا تىيىم سالۋ تۋرالى شارتقا 86 مەملەكەت، ونىڭ ىشىندە قازاقستان دا قول قويدى. بۇل شارتقا قول قويماعان ەلدەر قاتارىندا يادرولىق دەرجاۆالار بار.

ايتا كەتسەك، الداعى 21-23 ماۋسىمدا ۆەنادا شارتقا قاتىسۋشى ەلدەردىڭ العاشقى كەزدەسۋى وتەدى.

ۇقساس جاڭالىقتار

Back to top button