«مۇنارا» گازەتى جۋرناليستەر اراسىندا ۇستەل تەننيسىنەن تۋرنير وتكىزدى

بۇگىن ەلوردادا «مۇنارا» رۋحاني-تانىمدىق گازەتىنىڭ ۇيىمداستىرۋىمەن باق قىزمەتكەرلەرىنىڭ مەرەكەسى قارساڭىندا جۋرناليستەر اراسىندا ۇستەل تەننيسىنەن تۋرنير ءوتتى دەپ حابارلادى turkystan.kz.

وسىمەن ەكىنشى رەت جۋرناليستەر مەرەكەسىنە وراي ۇيىمداستىرىلعان سپورتتىق شارانىڭ ماقساتى – جۋرناليستەرمەن تىعىز بايلانىس ورناتىپ، سالاۋاتتى ءومىر سالتىن ناسيحاتتاۋ جانە مەرەكەلىك كوڭىل-كۇي قالىپتاستىرۋ.

«اقپارات سالاسى وكىلدەرىن جيناپ تۋرنير وتكىزۋدى بىلتىر قولعا العان ەدىك. جىل سايىن جۋرناليستەردىڭ ءتول مەرەكەسىنە وراي تۇراقتى تۇردە وتكىزىپ تۇرۋدى داستۇرگە اينالدىرىپ كەلەمىز. ءوزىمىز كۋا بولعانداي، بيىل كىل مىقتى جينالىپ وتە تارتىستى ويىن كورسەتىپ وتىر. تەك قىزمەت بابىمەن ەمەس، وسىنداي پايدالى ءىس-شارالاردا ارىپتەستەردىڭ باسى قوسىلىپ، ەرەكشە كوڭىل-كۇيگە بولەنىپ جاتسا، ماقساتىمىزدىڭ ورىندالعانى دەپ بىلەمىز»، – دەيدى «مۇنارا» گازەتىنىڭ باس رەداكتورى سەرىكبول حاسان.

بىلتىر ۇستەل تەننيسى تۋرنيرىنە ەلىمىزدىڭ باس قالاسىندا قىزمەت ەتىپ جۇرگەن ءباسپاسوز سالاسىنىڭ  16 وكىلى قاتىسسا، بيىل 22 ۇمىتكەر قاتىسىپ، قىزىقتى ءارى تارتىستى ويىن ورنەگىن كورسەتتى. ءتورت توپتان پلەي-وفف كەزەڭىنە جولداما العان 8 مىقتى ءوزارا باس جۇلدەنى ساراپقا سالدى.

قورىتىندىلاي كەلە، باس جۇلدەنى «كتك» ارناسىنىڭ بەينەينجەنەرى رۇستەمبەك يساەۆ جەڭىپ السا، اۋىل شارۋاشىلىعى مينيسترلىگىنىڭ ءباسپاسوز قىزمەتكەرى ناريمان امانجولوۆ جەڭىس تۇعىرىنىڭ ەكىنشى ساتىسىنان كورىندى. ال بىلتىرعى تۋرنيردە توپ جارعان «قازاق راديوسىنىڭ» ديكتورى مۇحامەدالي بولات ۇلىنا جۇلدەلى ءۇشىنشى ورىن بۇيىردى. سونداي-اق توپتىق كەزەڭنەن وتكەن 5 قاتىسۋشى ىنتالاندىرۋ سىيلىقتارىمەن ماراپاتتالدى.

ۇقساس جاڭالىقتار

Back to top button