ەرلان قوشانوۆ تۇركى مەملەكەتتەرىنىڭ جاستارىمەن كەزدەستى

بۇگىن ءماجىلىس سپيكەرى، تۇركپا-نىڭ ءىس باسىنداعى توراعاسى ەرلان قوشانوۆ جاستار قاناتىنىڭ العاشقى وتىرىسىنا قاتىسۋعا كەلگەن جاس پارلامەنتاريلەرمەن كەزدەستى دەپ حابارلادى turkystan.kz.

ءماجىلىس توراعاسى ءوز سوزىندە قازاقستان باستاماسىمەن قۇرىلعان تۇركىتىلدەس ەلدەر پارلامەنتتىك اسسامبلەياسىنىڭ ماڭىزدىلىعىنا جانە تۇركى مەملەكەتتەرىنىڭ ىنتىماقتاستىعىن تەرەڭدەتۋ جولىندا اتقارىلىپ جاتقان جۇمىستارعا توقتالدى.

ە. قوشانوۆ بيىل ەلدەرىمىز اراسىندا ديپلوماتيالىق قاتىناستىڭ ورناعانىنا 30 جىل تولعانىن اتاپ ءوتتى.

– قازىرگى ۋاقىتتا ءبىزدىڭ مەملەكەتتەر باسشىلارىنىڭ كۇش-جىگەرىنىڭ ارقاسىندا ەلدەر اراسىنداعى قاتىناستار بارلىق سالالاردا وتە جوعارى دەڭگەيدە دامۋدا. قازاقستان پرەزيدەنتى قاسىم – جومارت كەمەل ۇلى توقاەۆ تۇركى مەملەكەتتەرىمەن ىنتىماقتاستىقتى نىعايتۋعا ەرەكشە كوڭىل بولەدى، – دەدى.

ءماجىلىس توراعاسى تۇركى ەلدەرى اراسىنداعى تىعىز بايلانىستى تەرەڭدەتۋدە پارلامەنتتەردىڭ ءرولىنىڭ زور ەكەنىن العا تارتىپ، جاس پارلامەنتاريلەر توبىنىڭ قۇرىلۋى جانە ولاردىڭ العاشقى وتىرىسى تۇركى تامىرلاستىعى ءۇشىن تاريحي وقيعا دەپ باعالادى.

ەرلان قوشانوۆ جاس دەپۋتاتتاردى قازاقستاندا جۇرگىزىلىپ جاتقان ساياسي وزگەرىستەر مەن جاقىندا وتكەن رەسپۋبليكالىق رەفەرەندۋمنىڭ ماڭىزدىلىعى تۋرالى حاباردار ەتتى.

جۇزدەسۋدە ازەربايجاندىق جانە تۇركيالىق جاس دەپۋتاتتار ءسوز الىپ، جوعارى دەڭگەيدەگى كەزدەسۋ ءۇشىن ىستىق ىقىلاستارىن ءبىلدىردى.

جاستار توبى العاشقى كەزدەسۋلەرىندە «بالالار مەن جاستار – اقپاراتتىق تەحنولوگيا داۋىرىندەگى تۇركىلەردىڭ بولاشاعى» تاقىرىبىندا كەڭ كولەمدە تالقىلاۋ وتكىزبەك.

ۇقساس جاڭالىقتار

Back to top button