ءبىز سۋ رەسۋرستارىن بەيبەرەكەت جانە ۇنەمسىز پايدالانىپ وتىرمىز - جاڭبىرشين

سۋمەن قامتاماسىز ەتۋ جانە سۋ رەسۋرستارىن پايدالانۋ پروبلەماسى قازىردىڭ وزىندە مەملەكەتىمىزدىڭ ۇلتتىق قاۋىپسىزدىگىنە ناقتى قاتەر توندىرەتىن فاكتورلاردىڭ ءبىرى. ءماجىلىس دەپۋتاتى، «قازاقستاننىڭ سۋ سالاسىن دامىتۋ پەرسپەكتيۆالارى» پارلامەنتتىك تىڭداۋدى  دايىنداۋ جونىندەگى ارنايى ۋاقىتشا كوميسسيانىڭ جەتەكشىسى ەدىل جاڭبىرشين وسى باعىتتا ۇكىمەتتىڭ جۇمىسى كوڭىلدەن شىقپاي وتىرعانىن جەتكىزدى دەپ حابارلادى turkystan.kz.

ءماجىلىس دەپۋتاتى بايانداماسىنىڭ باسىندا ۆەدومستۆولار قانشاما تۇجىرىمداما مەن باعدارلامالار قابىلداپ جاتسا دا ءالى كۇنگە دەيىن شەشىمىن تاپپاعان سۇراقتار بار ەكەنىن ايتتى.

«پارلامەنتتىك تىڭداۋعا دايىندىق كەزىندە ءبىز وڭىرلەردىڭ جانە ەكونوميكالىق سەكتورلاردىڭ بولاشاقتا دامۋ تەندەنتسياسى ەسكەرىلگەن، كەشەندى عىلىمي زەرتتەۋلەردىڭ نەگىزىندە جاساقتالعان سۋ رەسۋرستارىنا قاتىستى ستراتەگيالىق جوسپاردى كورە المادىق. بولاشاقتا سۋ قورىمىزدىڭ پوتەنتسيالى قالاي وزگەرەدى جانە سۋعا دەگەن سۇرانىستىڭ دەڭگەيى قانداي بولماق؟ جۇيەلى تۇردە بولجانعان تالداۋلار بار ما؟ الداعى ونجىلدىقتا ەلىمىزدە سۋمەن قامتاماسىز ەتۋ قالاي ىسكە اسپاق؟ سۇراق كوپ»، – دەدى ول.

ەدىل ءجاڭبىرشيننىڭ ايتۋىنشا، قازىرگى ۋاقىتتا ەكونوميكا سالالارىن جانە تۇرعىنداردى سۋمەن قامتاماسىز ەتۋ ءۇشىن ەلىمىزدىڭ سۋ رەسۋرستارىنىڭ پوتەنتسيالى ءالى تولىق زەرتتەلمەگەن جانە باعالانباعان. وسىعان وراي ول ەكولوگيا مينيسترلىگىندە دايىندالىپ جاتقان سۋ تۇجىرىمداماسىن 2030 جىلعا دەيىن ۇزارتۋدى ۇسىندى.

سونداي-اق ءماجىلىس دەپۋتاتى سۋ ماسەلەسىمەن اينالىسىپ جاتقان ءۇش مينيسترلىكتىڭ دە جۇمىسىنا توقتالدى.

«سۋ سالاسىنىڭ باعىتتارىن باسقارۋ مەن رەتتەۋ ءۇش مينيسترلىككە ءبولىنىپ بەرىلگەن. ءتىپتى ترانسشەكارالىق سۋ رەسۋرستارىمەن سىرتقى ىستەر مينيسترلىگى دە اينالىسىپ وتىر. باقتاشى كوپ، ناتيجە ماردىمسىز. كورشى مەملەكەتتەردى الىپ قاراساق، ولاردا سۋ شارۋاشىلىعىمەن ءتيىستى مينيسترلىك نەمەسە اگەنتتىك اينالىسىپ وتىر. سوندىقتان سۋ سالاسىنا جاۋاپتى جانە قر اتىنان حالىقارالىق دەڭگەيدە ءتيىستى مينيسترلىك قۇرۋدىڭ ۋاقىتى كەلدى»، – دەدى ەدىل جاڭبىرشين.

دەپۋتات قازاقستانداعى سۋعا تاپشى وڭىرلەردى اتاپ، ونداعى ماسەلەلەردىڭ شەشۋ جولدارىن ايتتى.

«مىسالى ەلىمىزدىڭ باتىس وڭىرلەرىندە تەك اقتوبە وبلىسىندا عانا جەر استى سۋلارىنىڭ قورى مول جانە ولاردى سۋعا تاپشى اتىراۋ مەن ماڭعىستاۋ وبلىستارىنا جەتكىزۋگە بولادى. بىراق، بۇل جوبالار ۇلكەن قارجاتتى قاجەت ەتەدى. تاعى ءبىر ماسەلە، اۋىز سۋ قورى مول كەن ورىندارىنىڭ اينالاسىندا، ءار ءتۇرلى قازبا بايلىقتاردىڭ يگەرىلۋىنە بايلانىستى، جەراستى سۋلارى زياندى زاتتارمەن لاستانۋدا. مىسالى، اقتوبە وبلىسىنداعى «كوكجيدە» سۋ كەن ورنىنىنىڭ قاسىندا بىرنەشە مۇناي كومپانياسى جۇمىس جاساۋدا جانە كەيبىرەۋى جەر استى سۋلارىن لاستاعان. وسىعان وراي ستراتەگيالىق ماڭىزى بار سۋ كەن ورىندارىنىڭ اينالاسىندا قازبا بايلىقتاردى يگەرۋ وپەراتسيالارىنا زاڭمەن تيىم سالىنۋى قاجەت. ال، «كوكجيدە» ماڭىنداعى مۇناي وپەراتسيالارى توقتاتىلۋى ءتيىس»، – دەپ اتاپ ءوتتى دەپۋتات.

تاعى وقي وتىرىڭىز: ەلىمىزدە جاڭادان سۋ كودەكسى قابىلدانادى

ۇقساس جاڭالىقتار

Back to top button