«باسىن كەسىپ تاستاعان»: 219 يتبالىقتىڭ ولەكسەسى تابىلدى

كاسپي تەڭىزىندە 200-دەن اسا يتبالىقتىڭ ولەكسەسى تابىلدى دەپ حابارلادى turkystan.kz.

ولاردىڭ دەنەسى ىدىراپ كەتكەندىكتەن ناقتى نەدەن قىرىلعانىن انىقتاۋ مۇمكىن ەمەس. بۇل تۋرالى بالىق شارۋاشىلىعى كوميتەتى توراعاسىنىڭ ورىنباسارى ايان باحيانوۆ مالىمدەدى.

«عىلىمي ۇيىمدار زەرتتەۋ جۇرگىزگەنىمەن، ناقتى سەبەبىن بىلە الماي وتىر. تەك جاناما بولجامدار بار. ماماندار يتبالىقتار ءساۋىر-مامىر ايلارىندا ەمەس، قاڭتار-اقپاندا ولگەن دەگەن قورىتىندى شىعاردى. تاعى ءبىر بولجام، ول – قىس مەزگىلىنىڭ وتە جىلى بولۋى. ياعني، اتالعان سۋ جانۋارلارى مۇزدىڭ ۇستىنە كۇشىكتەيدى. بيىل اۋا رايى جىلى بولىپ، مۇز ەرىپ كەتكەندىكتەن كۇشىكتەر سۋعا تۇسكەن. ال جاڭا تۋعان يتبالىقتاردىڭ تەرىسىندە سۋدان قورعايتىن قابىرشىق بولمايدى. بۇگىندە 220 ولەكسە تابىلدى. سونىڭ 50 پايىزى – جاڭا تۋعان يتبالىقتار»، – دەدى بالىق شارۋاشىلىعى كوميتەتى توراعاسىنىڭ ورىنباسارى.

ايان باحيانوۆتىڭ مالىمەتىنشە، تابىلعان ولەكسەلەردىڭ دەنە مۇشەسىندە قولدان جاسالعان جاراقاتتار بار.

«تابىلعان بىرنەشە يتبالىقتىڭ باسى جانە وزگە دە مۇشەلەرى قاساقانا كەسىپ الىنعان. ءبىزدىڭ بولجام بويىنشا، جانۋارلار براكونەرلەردىڭ قولىنا تۇسكەن. ال ولار ءوز قىلمىسىن جاسىرۋ ءۇشىن يتبالىقتاردىڭ باسىن كەسىپ تاستاعان»، – دەدى ايان باحيانوۆ.

ايتا كەتسەك، بيىل 5 ايدىڭ ىشىندە كاسپي جاعالاۋىنان 219 يتبالىقتىڭ ولەكسەسى تابىلعان ەدى.

ۇقساس جاڭالىقتار

Back to top button