دوساەۆ: الماتىنىڭ باس جوسپارى جاڭادان ازىرلەنەدى

الماتى قالاسى مەن اگلومەراتسياسىن دامىتۋعا ارنالعان ورتاق جاڭا باس جوسپار جاسالادى. بۇل تۋرالى بۇگىن قالا اكىمى ەربولات دوساەۆ قالا قۇرىلىسشىلارى فورۋمىندا مالىمدەدى دەپ حابارلادى turkystan.kz.

ول 2040 جىلعا دەيىنگى مەرزىمدى قامتيدى. جاڭا قۇجاتتى جىل سوڭىنا دەيىن اياقتاۋ كوزدەلگەن. قالا اكىمى بىلىكتى ساۋلەتشىلەرمەن قالانى ودان ءارى دامىتۋ جايىن جانە الدا تۇرعان سىن-قاتەرلەردى تالقىلادى. قالا قۇرىلىسىنان بولەك، الماتى اگلومەراتسياسىنا ءمان بەرۋ كەرەكتىگى ايتىلدى.

اكىمنىڭ سوزىنشە، بۇگىندە قالا مەن قالا ماڭىنداعى اۋماقتاردى بىردەي دامىتۋ ماڭىزدى. اسىرەسە كولىك ينفراقۇرىلىمىن جەتىلدىرۋ كەرەكتىگى ءسوز بولدى. جاڭا باس جوسپاردا اگلومەراتسيانىڭ ۋرباندالۋ پروتسەسىن جەدەلدەتۋ تەتىكتەرى دە قاراستىرىلماق.

«بىرنەشە جىل بويى الماتى اكىمدىگى باس جوسپارعا تۇزەتۋلەر ەنگىزۋگە جۇمىس جاسادى. ۇلكەن جۇمىس اتقارىلدى. بىراق ول باس جوسپار بۇرىنعى 2002 جىلعى جوسپارلاردى بازا رەتىندە العان. ودان بەرى 20 جىل ءوتتى. قازىر قالا دا، ەكونوميكا دا، الماتى وبلىسى دا وزگەردى. سوندىقتان مەن جوسپاردى جاقسارتۋعا اتسالىسقان ازاماتتارعا العىس ايتقىم كەلەدى»، – دەدى  الماتى قالاسىنىڭ اكىمى ەربولات دوساەۆ.

الماتىدا قۇرىلىسشىلار كەڭەسى قايتا قۇرىلادى. ول اكىمدىككە تيەسىلى بولمايدى، بىراق كاسىبي مامانداردان جاساقتالىپ، قۇرىلىسقا قاتىستى كەڭەس بەرەتىن الاڭ بولماق. قالا قۇرىلىسشىلار وداعى پرەزيدەنتىنىڭ ايتۋىنشا، بۇل مەگاپوليستىڭ ماسەلەلەرىن شەشۋگە جانە تۇرعىندارعا جايلى ورتا قالىپتاستىرۋ ءۇشىن قىزمەت ەتەدى. دۇرىس قالا قۇرىلىسى ساياساتىن جۇرگىزۋگە مۇمكىندىك بەرمەك.

«اكىمدىك جانىندا بۇرىن قۇرىلىسشىلاردان قۇرىلعان كەڭەس بولاتىن. وندا كاسىبي ساۋلەتشىلەر قالا قۇرىلىسىنا قاتىستى جوبالارىن تالقىلاپ، ەلەكتەن وتكىزەتىن. ءۇش جىلدان كەيىن كەڭەس قايتا جۇمىسىن باستايتىن بولدى»، – دەدى «قازاقستان قالا قۇرىلىسشىلارى وداعى» قوعامدىق بىرلەستىگىنىڭ پرەزيدەنتى ليۋبوۆ نىسانباەۆا.

ۇقساس جاڭالىقتار

Back to top button