قوستاناي وبلىسىندا احمەت بايتۇرسىن ۇلى تۇرعان ءۇيدىڭ ىرگەتاسى ءسۇرىلىپ تاستالعان (ۆيدەو)

قوستانايدا بيىل 150 جىلدىعى اتاپ وتىلەتىن احمەت بايتۇرسىن ۇلىنىڭ تۋعان ءۇيىنىڭ ءىزى دە قالماعان. بۇعان دەيىن ىرگەتاسى تۇرعان. احاڭنىڭ كوزىندەي سول بەرىك ىرگەتاستى مەردىگەرلەر بۇزىپ تاستاپ، ورنىنا تەز ۇگىتىلەتىن تاسپەن قالاعان دەپ حابارلادى turkystan.kz حابار 24 تەلەارناسىنا سىلتەمە جاساپ.

ونىڭ وزىندە قيۋىن كەلتىرمەي، جۇرتتىڭ اشۋىن تۋعىزعان ەدى. بۇل ارەكەت جالپاق جۇرتقا ءمالىم بولدى.

«مىناۋ ارادا احمەتتىڭ بۇرىنعى ءۇيىنىڭ ءىزى بولعان. فۋندامەنتى بۇنىڭ قارا شىمنان – كەسەكتەن سالىنعان ەدى. مىنە، قاراپ وتىرساڭدار، جوباسى وسى جەردەن. مىناۋ ارادا پەشپەن بولىنگەن ەدى. سول پەشپەن بولىنگەن بۇرىشتا احمەت اتامىزدىڭ ۇيىندەگى اجەمىز احمەت اتامىزدى دۇنيەگە اكەلدى-اۋ دەپ ءوزىمىز ويلايتىن ەدىك. ەندى مىنە استاڭ-كەستەڭى شىققان. ءىزى دە، دىمى دا قالماعان. ەڭ سوڭعى احمەتتىڭ وزىمىزدە بار ەسكەرتكىشىنەن ايىرىلىپ قالىپ تۇرمىز»، – دەيدى احمەت بايتۇرسىن ۇلى اۋىلىنىڭ تۇرعىنى جاقسىبەك ابدىسالىق.

جەرمەن-جەكسەن بولعان اۋماقتا بىلتىر 2 بولمەلى ءۇي تۇرعان. جۇرت ۇلت ۇستازى سارىتۇبەكتەگى وسى ۇيدە دۇنيەگە كەلدى دەيدى. ونى ەسكەرتكىش رەتىندە تۇرعىندار 2009 جىلى باستاپقى كەيپىندەگى ىرگەتاستىڭ ۇستىنەن سالعان.

بيىل مامىر ايىندا ءۇي قايتا جاڭعىرتىلادى دەپ شەشىلدى. تەندەر جاريالانىپ، مەردىگەر جۇمىسقا كىرىسكەن.

بىراق 22 ملن تەڭگەنىڭ قۇرىلىسى ورتا جولدا توقتاپ قالدى. نىساندا ساپاسىز ماتەريالدار پايدالانعانى تۋرالى ۆيدەولار الەۋمەتتىك جەلىگە تاراپ، داۋ شىقتى.

قابىرعاسىنا دەگەن قۇم بلوكتارى كوپكە شىداۋى ەكىتالاي ەدى. جاۋاپسىز مەردىگەرمەن كەلىسىم ەكى جاقپەن ۇزىلگەن.

وعان ءبىر تيىن دا تولەنبەگەندىكتەن ءىس سوتقا جەتپەيتىن بولدى.

«سامان كىرپىشتەن قايتا قۇيىلعان ءۇي. بىلايشا ايتقاندا، كورىكسىز، زامان تالابىنا سايكەس كەلمەيتىن، ءارى قاراي قالپىنا كەلتىرۋگە مۇمكىندىگى جوق ءۇي بولاتىن. ول ءدال احمەت بايتۇرسىن ۇلىنىڭ تۋعان ءۇيى ەمەس. سونىڭ ىرگەسىنىڭ نەگىزىندە كوتەرىلگەن ءۇي. ۇلكەندەردىڭ ايتۋىنشا، اۋىل ادامدارىنىڭ قالاۋىمەن قالانعان ءۇي. سوندىقتان ونى احمەت بايتۇرسىنوۆتىڭ تۋعان ءۇيى جەر بەتىنەن ىسىرىلىپ تاستادى دەۋگە كەلمەيدى. تاريحي شىندىققا جاناسپايدى»، – دەيدى مادەنيەت باسقارماسىنىڭ باسشىسى ەرلان قالماقوۆ.

قازىر سۇرىلگەن اۋماق تەگىستەلىپ جاتىر. جاڭا ءۇيدىڭ قۇرىلىسى جوبالانىپ قويعان. قىركۇيەككە دەيىن سالىنىپ ءبىتۋى ءتيىس.

«جوبا بويىنشا 149 شارشى مەتر. تۇرعىن ءۇيدى مۋزەي ءۇي ەتىپ، قايتا قالپىنا كەلتىرۋ جۇمىستارىن جۇرگىزەدى. جوباسى 20 ماۋسىمدا الىنادى. جوبالىق قۇجاتىن جاساۋعا 1،2 ملن تەڭگە دەمەۋشىلەر اتىنان ىستەلەدى. ال ەندى ءۇيدىڭ قۇنى 37 ملن بوپ تۇر. ەكسپەرتيزاعا دەيىن ول وزگەرۋى مۇمكىن»، – دەيدى جانگەلدين اۋدانى قۇرىلىس ءبولىمىنىڭ باسشىسى ادىلبەك يمانعاليەۆ.

«قۇلاعان زات قايتىپ تۇرمايدى عوي. قانشا زارلاعانىمەن ول قايتىپ كەلمەيدى. ەندىگى سالاتىن ادام دۇرىستاپ سالسا، كورنەكى قىلىپ. بولىنگەن اقشا از ەمەس»، – دەيدى اقكول اۋىلىنىڭ تۇرعىنى كادىرجان ءبورىباي ۇلى.

ال ۇلت ۇستازىنا ارنالعان كەسەنە كەرىسىنشە جاڭاوزەننەن اكەلىنگەن ساپالى جانە قىمبات تەمىرتاستان سالىنىپ جاتىر.  اقكول مەن احمەت اۋىلى حالقىنىڭ باستاماسىمەن 10 ملن تەڭگەگە ەكى اپتادان كەيىن تۇرعىزىلىپ بىتەدى. نىساننىڭ اۋماعى 70 شارشى مەتر، بيىكتىگى 7 مەتردەن اسادى.

ۇقساس جاڭالىقتار

Back to top button