قازۇۋ جاھاندىق سەرتيفيكات يەگەرى اتاندى

ءال-فارابي اتىنداعى قازاق ۇلتتىق ۋنيۆەرسيتەتى QS WUR جاھاندىق رەيتينگى بويىنشا 150-ورىنعا يە بولدى دەپ حابارلادى turkystan.kz.

رەيتينگ قورىتىندىسى 8 ماۋسىمدا جاريالانعان ەدى. وسىعان وراي، ءبىلىم ورداسىنداعى «ءال-فارابي» كىتاپحاناسىندا ۋنيۆەرسيتەتكە QS  رەيتينگىسىنىڭ سەرتيفيكاتىن تاپسىرۋ سالتاناتى ءوتتى.

ماراپاتتى تمد جانە ورتالىق ازيا ەلدەرى بويىنشا QS رەيتينگتىك اگەنتتىگىنىڭ ايماقتىق ديرەكتورى سەرگەي حريستوليۋبوۆ ۋنيۆەرسيتەت رەكتورى جانسەيىت تۇيمەباەۆقا تابىستادى.

اگەنتتىك وكىلى قازۇۋ-ءدىڭ سوڭعى جىلدارداعى جەتىستىگىن اتاپ ءوتىپ، QS جاھاندىق رەيتينگىندەگى تالاپتارعا توقتالدى. ۋنيۆەرسيتەتتىڭ الداعى دامۋ جوسپارىمەن، عالىمداردىڭ عىلىمي-يننوۆاتسيالىق جوبالارىمەن تانىسقان ول ۇجىمنىڭ الداعى جۇمىستارىنا ساتتىلىك تىلەدى.

«ءال-فارابي اتىنداعى قازۇۋ بيىل كوپتەگەن تالاپتار بويىنشا ءوز كورسەتكىشتەرىن ەداۋىر جاقسارتتى. حالىقارالىق دەڭگەيدەگى رەيتينگتە 150-ورىنعا جايعاسۋ – ۇلكەن كورسەتكىش. مۇنداي قازۇۋ تاريحىندا بولماعان. ۋنيۆەرسيتەتتىڭ دامۋىنا سۇبەلى ۇلەس قوسىپ، ەڭبەك ەتكەن وقىتۋشى-پروفەسسورلار قۇرامى، عالىمدار مەن بارلىق ۇجىمعا العىسىمدى بىلدىرگىم كەلەدى. سىزدەردىڭ ءبىلىم وردالارىڭىز دامىعان مەملەكەتتەردىڭ ۋنيۆەرسيتەتتەرى اراسىنان وزا شىعىپ، الدىڭعى قاتارعا جايعاستى. بۇل – سىزدەردىڭ ەڭبەكتەرىڭىز»، – دەدى سەرگەي حريستوليۋبوۆ.

قازۇۋ جاھاندىق سەرتيفيكات يەگەرى اتاندى

ءوز كەزەگىندە ۋنيۆەرسيتەت باسشىسى جانسەيىت تۇيمەباەۆ حالىقارالىق رەيتينگ قازاقستاندىق جوعارى وقۋ ورىندارى ءۇشىن جىل سايىن ءوز كورسەتكىشتەرىن جەتىلدىرۋگە مۇمكىندىك بەرەتىنىن جەتكىزدى.

«ءبىر جىل ىشىندە وقۋ ورنىمىز 175-ورىننان 25 پوزيتسياعا جوعارىلادى. QS WUR جاھاندىق رەيتينگىندەگى جاڭا كورسەتكىشىمىز – 150-ورىن. بۇل – ءبىز ءۇشىن ۇلكەن جەتىستىك ءارى جوعارى جاۋاپكەرشىلىك. قازۇۋ – «QS Stars Rating System» حالىقارالىق رەيتينگىسىندە «بەس جۇلدىز» ماراپاتىن العان ورتالىق ازياداعى  العاشقى جانە جالعىز جوعارى وقۋ ورنى.  سونداي-اق، QS by Subject پاندىك رەيتينگىسىندە ۋنيۆەرسيتەت 4 ءپان سالاسى مەن 16 دايىندىق باعىتى بويىنشا ۇزدىكتەر قاتارىنا كىرەدى. ۋنيۆەرسيتەتتىڭ 137 ءبىلىم بەرۋ باعدارلاماسىنىڭ حالىقارالىق دەڭگەيدەگى باسەكەگە قابىلەتتىلىگىن دالەلدەيدى»، – دەپ اتاپ ءوتتى رەكتور.

ۋنيۆەرسيتەت باسشىسى بارلىق عالىمداردى، وقىتۋشى-پروفەسسورلار قۇرامى مەن قىزمەتكەرلەردى قۇتتىقتاپ، بۇل جەتىستىكپەن توقتاپ قالماي، مەجەلى ماقساتتارعا جەتۋ جولىندا تابىستى ەڭبەك ەتۋگە شاقىردى.

سونىمەن قاتار، ءىس-شارا بارىسىندا حيميا جانە حيميالىق تەحنولوگيا فاكۋلتەتىنىڭ پروفەسسورى زۇلحاير مانسۇروۆ،  Instituto Universitário de Lisboa  پروفەسسورى پوستولاح وكتاۆيان، حالىقارالىق ءبىلىم بەرۋ امەريكالىق كەڭەستەر ۇيىمىنىڭ جوعارى ءبىلىم بەرۋ باعدارلامالارىنىڭ باسقارۋشى ديرەكتورى گرەم حەتتلينگەر، كولۋمبيا ۋنيۆەرسيتەتىنىڭ دوكتورى ماماتا حانۋماپپا، حيميا جانە حيميالىق تەحنولوگيا فاكۋلتەتىنىڭ اعا وقىتۋشىسى گەميل احمات، فيزيكا-ماتەماتيكا عىلىمدارىنىڭ دوكتورى، پروفەسسور مۋززامميل يلاحي جانە  دوكتورانت اريفيوگلۋ ابدۋرراحمان زەكي قازۇۋ ۇجىمىن قۇتتىقتاپ، جىلى لەبىزدەرىن ءبىلدىردى.

ايتا كەتسەك، QS WUR الەمنىڭ ۇزدىك ۋنيۆەرسيتەتتەرىنىڭ ءتىزىمى 2004 جىلدان بەرى جاريالانىپ كەلەدى. اعىمداعى جىلى رەيتينگكە الەمنىڭ 100 ەلىنەن 2،5 مىڭعا جۋىق جوو قاتىسقان بولاتىن.

ۇقساس جاڭالىقتار

Back to top button