روبوتوتەحنيكا ەندى قازاقشا سويلەيدى

ەلىمىزدەگى تەحنيكالىق سالا تەرميندەرى اعىلشىنشا نە ورىسشا عانا قولدانىلاتىنىنا قاتىستى سىن كوپتەن ايتىلىپ ءجۇر. ەندى بۇل سالا دا ءتول تىلدە سويلەيتىن بولادى دەپ حابارلادى turkystan.kz.

ناقتىراق ايتساق، قازاق ءتىلىنىڭ تەرمينولوگياسىندا جاساندى ينتەللەكت پەن روبوتوتەحنيكاعا قاتىستى 672 ءسوز بەكىتىلدى.

ەندى جاساندى ينتەللەكت، دەرەكتەردى تالداۋ، روبوتوتەحنيكا جانە كومپيۋتەرلىك عىلىمدار سالاسىندا قولدانىلاتىن كوپتەگەن تەرميندەر مەن سوزدەردىڭ اۋدارمالارى بار. عالىمدار تەرميندەردى اعىلشىن تىلىنەن قازاق تىلىنە اۋدارۋدىڭ ءارتۇرلى نۇسقالارىن قامتيتىن گلوسساري ازىرلەدى. ونى ءتىل ساياساتى جونىندەگى كوميتەتكە بەكىتۋگە جىبەردى.

«ءبىز جاساندى ينتەللەكت، دەرەكتەر تالداۋ جانە روبوتوتەحنيكا سالاسىنداعى كوپتەگەن تەرميندەردىڭ رەسمي بەكىتىلگەن قازاق تىلىندەگى اۋدارماسى جوق ەكەنىن بايقادىق. سوندىقتان تەرميندەردى قازاقشاعا اۋدارۋدى باستادىق. جاساندى ينتەللەكت پەن روبوتوتەحنيكا سالاسى ەلىمىزدە كەڭ تارالعاندىقتان، تەرميندەردىڭ اۋدارماسىن ۇسىندىق»، – دەدى ISSAI-ءدىڭ نەگىزىن قالاۋشى ديرەكتورى، پروفەسسور اتاكان ۆارول.

لينگۆيستيكا سالاسىنداعى ساراپشىلار مەن ISSAI ماماندارىنىڭ قاتىسۋىمەن وتكەن رەسپۋبليكالىق تەرمينولوگيالىق كوميسسيانىڭ وتىرىسىندا كەيبىر سوزدەر اۋدارماسىز قابىلداندى جانە وزىندىك اعىلشىن تىلىندەگى ايتىلۋىن ساقتاپ قالدى. قالعاندارى رەسمي تۇردە قازاقشاعا اۋدارىلدى. مىسالى، artificial neural network تەرمينى «جاسىل نەيروندىق جەلى» دەپ اۋدارىلسا، boosting تەرمينى قارىزعا الىنعان ءسوز – بۋستينگ رەتىندە پايدالانۋعا شەشىم قابىلداندى. بارلىعى 672 ءسوز رەسمي تۇردە بەكىتىلدى.

 «ءبىز تسيفرلىق ورتادا قازاق ءتىلىنىڭ دامۋىنا ۇلەس قوسا العانىمىزعا وتە قۋانىشتىمىز»، – دەپ قوستى پروفەسسور ۆارول.

بەكىتىلگەن تەرميندەردى ISSAI مەن termincom.kz سايتتارىنان تابۋعا بولادى.

 

 

ۇقساس جاڭالىقتار

Back to top button