«AMANAT» پارتياسىنىڭ جاستار قاناتى ينتەرنەتكە تاۋەلدىلىك ماسەلەسىن قوزعادى

«AMANAT» پارتياسىنىڭ جاستار قاناتى ينتەرنەتكە تاۋەلدىلىك پەن قۇمار ويىندارىمەن كۇرەس جۇمىسىن جانداندىرۋعا شاقىردى.

«AMANAT» پارتياسىنىڭ قوعامدىق ساياسات ينستيتۋتى ديرەكتورىنىڭ ورىنباسارىنىڭ ايتۋىنشا، 2019 جىلعى مالىمەتتەرگە سايكەس قازاقستاندىقتاردىڭ 73،8 پايىزى لۋدومانيانى وزەكتى ماسەلە دەپ سانايدى، ال قاتىسۋشىلاردىڭ 11 پايىزى ءوز وتباسىلارىندا قۇمار ويىندارىنا تاۋەلدى ادامداردىڭ بار ەكەنىن جەتكىزدى.

«عالامتور كوپتەن بەرى ادام ءومىرىنىڭ ايىرىلماس بولشەگىنە اينالدى، اسىرەسە بالالار مەن جاستار اراسىندا. بىراق، قۇمار ويىندارى ونلاين بولعاننان بەرى، ونىڭ ارتىقشىلىقتارىمەن قاتار، قاۋىپتى جاقتارى دا كوبەيدى. بۇل ماسەلە ەندى عانا زەرتتەلىپ باستالۋدا، عىلىمي زەرتتەۋلەرگە بارىنشا دەن قويىلۋى ءتيىس»، – دەپ اتاپ ءوتتى جاستار قاناتى توراعاسىنىڭ ورىنباسارى ايسۇلۋ ەرنيازوۆا.

ال پسيحولوگ ايدا تۇرعازى قۇمار ويىنعا تاۋەلدىلىكتىڭ تۇبىندە بۇتىندەي جيناقتالعان فاكتورلار جاتىر دەيدى.

«وسىلايشا ادام وزىندەگى وتباسىلىق، كارەراعا قاتىستى، ماحاببات جانە وزگە دە ماسەلەلەرىنەن الشاقتاۋعا تىرىسادى. كەز كەلگەن جاعدايدا تاۋەلدى ادام ەڭ باسىندا ماسەلەنىڭ بارلىعىن مويىنداپ، مىندەتتى تۇردە ماماندارعا جۇگىنۋى مىندەتتى. جاقىن تۋىستارى، دوستارى العاش بولىپ دابىل قاققانى ءجون»،- دەدى ا. تۇرعازى.

ءوز كەزەگىندە ەۋرازيا ۇلتتىق ۋنيۆەرسيتەتىنىڭ دوتسەنتى وڭايگۇل تۇرجان بۇكىلالەمدىك جەلىنىڭ كەسىرىنەن ادامداردا ويلاۋ، سويلەۋ جانە جازۋ مادەنيەتى وزگەرگەندىگىنە نازار اۋداردى.

«اقپاراتتىق يممۋنيتەتتىڭ جيناقتالماۋىنا بايلانىستى اقپاراتتى تالداي المايتىن جاستاردىڭ سانى كوبەيدى. جاستاردىڭ پوتەنتسيالىن ءتۇرلى پاندىك وليمپيادالارعا، عىلىمي زەرتتەۋلەرگە باعىتتاۋ كەرەك، باسقا سوزبەن ايتقاندا زياتكەرلىك جەتىستىگىن كەڭەيتۋ قاجەت»، – دەيدى و. تۇرجان.

ايتا كەتسەك، پارتيانىڭ جاستار قاناتى ايماقتاردا ينتەرنەتكە تاۋەلدىلىك پەن قۇمار ويىندار دەڭگەيىن تالداۋ، وسى سالاداعى قازاقستاندىق جانە شەتەلدىك زاڭناماعا ساپالى تالداۋ جۇرگىزۋ، سونداي-اق قۇمار ويىندارى بار سايتتاردىڭ ءتىزىمىن جاريالاۋ ءۇشىن بىرقاتار فوكۋس-توپتاردى جيناقتاۋدى جوسپارلاپ وتىر.

«AMANAT» پارتياسىنىڭ جاستار قاناتى ينتەرنەتكە تاۋەلدىلىك ماسەلەسىن قوزعادى

ۇقساس جاڭالىقتار

Back to top button