ۇلتتىق قۇرىلتاي ۇلت ۇياسى ۇلىتاۋدان باستاۋ الدى
بۇگىن ۇلىتاۋدا ۇلتتىق قۇرىلتاي جۇمىسىن باستايدى. مەملەكەت باسشىسىنىڭ 16 ناۋرىزداعى جولداۋىندا ۇلتتىق قوعامدىق سەنىم كەڭەسىنىڭ تاراتىلاتىنى ايتىلعان ەدى. پرەزيدەنت ونىڭ ورنىنا اۋقىمى كەڭىرەك، جاڭادان قۇرامدالعان ۇلتتىق قۇرىلتاي قۇرۋدى ۇسىنعان بولاتىن. ال وتكەن اپتادا ۇلتتىق قۇرىلتايدىڭ العاشقى وتىرىسى 16 ماۋسىمدا جاڭادان قۇرىلعان ۇلىتاۋ وبلىسىندا وتەتىنى بەلگىلى بولدى.
ۇلتتىق قۇرىلتايدان ءۇمىت كوپ
قۇرىلتايدىڭ العاشقى وتىرىسى وتەتىن كۇننەن ءبىر كۇن بۇرىن ۇلتتىق قۇرىلتايدى قۇرۋ تۋرالى مەملەكەت باسشىسىنىڭ جارلىعى شىقتى. جارلىقتا ۇلتتىق قۇرىلتايدىڭ ەرەجەسى مەن قۇرامى، نەگىزگى ءمىندەتتەرى، سونىمەن قاتار جۇمىس ءتارتىبى بەكىتىلدى. جارلىققا سايكەس، ۇلتتىق قۇرىلتاي پرەزيدەنت جانىنداعى كونسۋلتاتيۆتىك-كەڭەسشى ورگان دەپ بەكىتىلدى.
جاڭادان قۇرىلاتىن ۇلتتىق قۇرىلتايدىڭ باعىتى مەن ەرەكشەلىگى قانداي بولماق؟ ونى قۇرۋدىڭ قانداي ماڭىزى بار؟
قۇرىلتايدىڭ توراعاسى – پرەزيدەنت قاسىم-جومارت توقاەۆ، ءتوراعانىڭ ورىنباسارلارى – مەملەكەتتىك كەڭەسشى ەرلان قارين، «باس رەداكتورلار كلۋبى» رەسپۋبليكالىق قوعامدىق بىرلەستىگىنىڭ پرەزيدەنتى بيبىگۇل جەكسەنباي، ال حاتشى قىزمەتىنە پرەزيدەنت اكىمشىلىگى باسشىسىنىڭ ورىنباسارى ايدا بالاەۆا بەكىتىلدى. ودان بولەك، قۇرىلتايعا مۇشە 113 ادامنىڭ ءتىزىمى جاريالاندى. ولاردىڭ ءبىرازى – قوعامدىق سەنىم كەڭەسىنە مۇشە بولعاندار. قۇجاتقا سايكەس، توراعا ۇلتتىق قۇرىلتايدىڭ قىزمەتىن باسقارادى، قۇرىلتايدىڭ وتىرىستارىن وتكىزۋ ورنى مەن ۋاقىتىن ايقىندايدى، ءتوراعانىڭ ورىنباسارلارىنا، ۇلتتىق قۇرىلتايدىڭ مۇشەلەرىنە جانە حاتشىسىنا تاپسىرما بەرەدى. توراعا ورىنباسارى مەملەكەتتىك كەڭەسشى قۇرىلتاي وتىرىستارىنىڭ كۇن ءتارتىبىن بەكىتەدى جانە توراعانىڭ تاپسىرمالارىن ورىندايدى.
حاتشى بەلگىلى ءبىر ماسەلەگە بايلانىستى بەلگىلەنگەن تارتىپپەن ساراپشىلار، عالىمدار مەن مامانداردىڭ باسىن قوسادى، ۇلتتىق قۇرىلتاي وتىرىستارىن ۇيىمداستىرىپ، ءوتكىزەدى، وعان قوسا توراعانىڭ جانە توراعا ورىنباسارلارىنىڭ تاپسىرمالارى بويىنشا باسقا دا جۇمىستاردى اتقارادى.
بەلگىلى مەملەكەت جانە قوعام قايراتكەرلەرىنىڭ، ساياسي پارتيالار، ۇكىمەتتىك ەمەس سەكتور، بيزنەس-قاۋىمداستىقتار، ساراپشىلار قوعامداستىعى جانە وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ قوعامدىق كەڭەستەرى وكىلدەرىنەن جاساقتالعان قۇرىلتايدىڭ قۇرامى كەزەڭ-كەزەڭمەن، روتاتسيا جۇرگىزۋ تارتىبىمەن جاڭارتىلىپ تۇراتىنى دا ايتىلعان. ۇلتتىق قۇرىلتاي مۇشەلەرى جۇمىس جوسپارى، وتىرىستاردىڭ كۇن ءتارتىبى مەن تالقىلاۋعا ۇسىنىس ايتا الادى، ماتەريالداردى دايىنداۋعا قاتىسۋعا، قۇرىلتايدىڭ وتىرىسىندا قارالاتىن ماسەلەلەردى قوعاممەن تالقىلايدى جانە تۇسىندىرەدى. قۇرىلتاي مۇشەلەرى ءوز قۇزىرەتىن باسقا ازاماتتارعا بەرە المايدى.
قۇجاتتا قۇرىلتايدىڭ نەگىزگى 3 مىندەتى ايقىندالعان: قوعام بىرلىگىن دامىتۋ، جالپىۇلتتىق قۇندىلىقتاردى نىعايتۋعا بايلانىستى ۇسىنىستاردى تۇجىرىمداۋ جانە ەنگىزۋ; جۇرتشىلىقتىڭ، ساياسي پارتيالاردىڭ، ۇكىمەتتىك ەمەس سەكتور مەن مەملەكەتتىك ورگانداردىڭ وكىلدەرى اراسىندا سىندارلى ديالوگتى قامتاماسىز ەتۋ; زاڭناماعا قايشى كەلمەيتىن وزگە دە قىزمەتتى جۇزەگە اسىرۋ.
قۇرىلتايدىڭ ءوتۋ ءتارتىبى بويىنشا ونىڭ وتىرىستارى قاجەتتىگىنە قاراي، جىلىنا كەمىندە ءبىر رەت وتكىزىلۋگە ءتيىس. ەگەر ۇلتتىق قۇرىلتايدىڭ وتىرىسىنا ونىڭ مۇشەلەرىنىڭ جالپى سانىنىڭ كەمىندە جارتىسى قاتىسسا، ونىڭ قۇقىقتىق كۇشى بار دەپ سانالادى. سونىمەن قاتار وتىرىستارعا توراعانىڭ شەشىمى بويىنشا قۇرىلتايعا مۇشە ەمەس لاۋازىمدى تۇلعالار، سونداي-اق قوعامدىق ۇيىمداردىڭ، بۇقارالىق اقپارات قۇرالدارىنىڭ وكىلدەرى شاقىرىلۋى مۇمكىن ەكەنى جازىلعان.
ۇلتتىق قۇرىلتايدا ايتىلعان ۇسىنىستار مەن باستامالار ايتىلعان كۇيى قالمايدى، سول ماسەلەنىڭ باعىتىنا بايلانىستى مەملەكەتتىك ورگاندار، قوعامدىق بىرلەستىكتەرگە جولدانادى. جاۋاپتى ورگاندار ولاردى قاراپ، شارا قابىلداپ، جۇمىس ناتيجەسى تۋرالى مالىمەتتى قۇرىلتاي مۇشەلەرىنە بەلگىلەنگەن تارتىپپەن جولدايدى. قۇرىلتايدىڭ جۇمىسى، وندا ايتىلعان، قارالعان، تالقىلانعان ماسەلەلەر بۇقارالىق اقپارات قۇرالدارىندا جاريالانىپ وتىرادى.
ءاۋ باستا ايتىپ وتكەنىمىزدەي، قۇرىلتايدىڭ العاشقى جيىنى جاڭادان قۇرىلعان ءۇش وبلىستىڭ ءبىرى – ۇلىتاۋدا وتەدى. ۇلىتاۋ قازاقتىڭ ەرتە كەزدەگى ساياسي ورتالىعى رەتىندە ماڭىزدى بولعانى تاريحتان، تاريحشىلاردىڭ ناقتى زەرتتەۋ ەڭبەكتەرىنەن بەلگىلى.
ۇلتتىق قۇرىلتاي جالپىحالىقتىق ديالوگ پلاتفورماسىنا اينالۋعا ءتيىس ەكەنى، وسىلايشا تاريحىمىزداعى دالا دەموكراتياسى ءداستۇرى، ۇلىتاۋ، ورداباسى مەن كۇلتوبەدەگى كەلەلى كەڭەستەر جاڭعىراتىنىن مەملەكەت باسشىسى وسى قۇرىلتايدى قۇرۋ تۋرالى العاش باستاما كوتەرگەندە ايتىپ وتكەن بولاتىن.
– ءبىز بىرلىكتىڭ باستاۋى بولعان دالا دەموكراتياسىنىڭ باستاۋىن جالعاستىرۋىمىز كەرەك. قۇرىلتاي قوعامدىق ديالوگتىڭ ءبىرتۇتاس ينستيتۋتتسيونالدىق مودەلىن قالىپتاستىرۋعا ءتيىس. ءسويتىپ، بيلىك پەن حالىقتىڭ اراسىنداعى دانەكەرگە اينالاتىن بولادى. قازىرگى قوعامدىق كەڭەستىڭ ءبارىن ءوز اينالاسىنا توپتاستىرادى. ۇلتتىق قۇرىلتايدىڭ قۇرامىندا بارلىق ايماقتىڭ وكىلدەرى بولادى. سونداي-اق وعان پارلامەنتتىڭ ءبىرقاتار دەپۋتاتى، قازاقستان حالقى اسسامبلەياسى، ازاماتتىق اليانس، قوعامدىق كەڭەس پەن ۇيىمداردىڭ مۇشەلەرى، بەلگىلى مەملەكەت قايراتكەرلەرى جانە تاعى باسقالار كىرەدى، – دەگەن ەدى مەملەكەت باسشىسى.
بۇگىن وتەتىن قۇرىلتايدىڭ نەگىزگى باعىتى مەن باعىت-باعدارى تۋرالى ۇلتتىق قۇرىلتاي مۇشەلەرىنەن سۇراپ كوردىك. ولاردىڭ ايتۋىنشا، قۇرىلتايدىڭ نەگىزگى ماقساتى – قوعامدى جۇدىرىقتاي جۇمىلدىرۋ، بىرلىك پەن ىنتىماقتى نىعايتىپ، ءبىر جاعادان باس، ءبىر جەڭنەن قول شىعارۋ، تەك سوندا عانا ەل جاڭارىپ، وشكەنىمىز جاڭعىرادى، بولاشاعىمىز ايقىندالادى.
ەرلان سايىروۆ،
ءماجىلىس دەپۋتاتى،
ۇلتتىق قۇرىلتاي مۇشەسى:
ۇلتتىق قۇرىلتايدىڭ ەڭ نەگىزگى مىندەتى – ەلدىڭ بىرلىگىن، ىنتىماعىن نىعايتۋ
– ۇلتتىق قۇرىلتايدىڭ ەڭ نەگىزگى مىندە-ءتى – قازىرگى وتە كۇردەلى، شيەلەنىسىپ تۇرعان گەوساياسي جاعدايدا ءبىزدىڭ ەلدىڭ بىرلىگىن، ىنتىماعىن نىعايتۋ، ۇلتتىق كونسوليداتسيا تەتىكتەرىن ازىرلەۋ. ياعني، ەڭ نەگىزگى ماقسات – مەملەكەتىمىزدىڭ مورالدىق، رۋحاني، ساياسي دامۋى ءۇشىن قانداي العىشارتتار كەرەك ەكەنىن انىقتاۋ. بولاشاق ۇرپاققا مىعىم، مىزعىماس مەملەكەتتى اماناتتاپ تاپسىرۋ ءۇشىن ەلىمىزدىڭ تۇعىرناماسى قانداي بولۋى كەرەك ەكەنىن انىقتاۋعا تىرىسۋ. دۇنيەجۇزىندە قۇندىلىقتار قاقتىعىسى بولىپ جاتىر. ۇلتتىق قۇرىلتاي سىرتقى وقيعالاردىڭ ەلىمىزدەگى احۋالعا اسەرىن ازايتىپ، ءارتۇرلى ساياسي كوزقاراستاعى جانداردىڭ باسىن قوسۋدى كوزدەۋى كەرەك. ءبىزدىڭ ۇستانىمىمىز، كەيبىر ماسەلەگە قاتىستى پىكىرىمىز باسقاشا بولعانىمەن، ورتاق قۇندىلىعىمىز – قازاقستاننىڭ تاۋەلسىزدىگىن ساقتاپ قالۋدا بىرىگۋىمىز كەرەك. ەڭ الدىمەن الەۋمەتتىك ادىلەتسىزدىك، ەكونوميكاداعى مونوپوليا سەكىلدى وزەكتى ءماسەلەلەردى شەشىپ الماي، قوعامدى تۇتاستاي بىرىكتىرۋ مۇمكىن ەمەس.
سۆەتقالي نۇرجان،
اقىن،
ۇلتتىق قۇرىلتاي
مۇشەسى:
ءتۇپ قازىعىمىزعا ورالىپ، بولاشاقتى باعدارلايتىن كەلەلى جيىن وتەتىنىنە سەنەمىن
– ۇلتتىق قۇرىلتايدان ءۇمىتىم ۇلكەن. ەڭ الدىمەن ايتا كەتەتىن نارسە – بۇل باستامانىڭ ىم-يشارا، ىرىمىنىڭ ءوزى ەرەكشە. جيىننىڭ باياعى بابالارىمىزدىڭ ءىزىن جالعاستىرىپ، ۇلىتاۋ جەرىندە جوشى حاننىڭ باسىندا وتكىزىلگەلى وتىرعانىنىڭ ءوزى مەملەكەتىمىزدىڭ شىنىمەن دە ءوز ءتۇپ قازىعىنا ورالىپ، سول ارقىلى بولاشاققا باعىتىن باعدارلايتىن ۇلكەن، كەلەلى جيىن بولادى دەگەن سەنىمنىڭ ۇشقىنىن ۇيالاتادى.
قازاق دالاسىندا تالاي-تالاي قۇرىلتاي وتكەنى بەلگىلى. ابىلقايىر حاندى باس ساردار سايلاعان 1710 جىلعى قاراقۇم قۇرىلتايى بار، مارتوبەدە وتكەن، كۇلتوبەدە، ورداباسىندا، ۇلىتاۋدا وتكەن جيىننىڭ بارلىعى ءبىزدىڭ تۇعىرلى كەزەڭدەرىمىزدە دە، سىندارلى كەزەڭدەرىمىزدە دە، قيىن-قىستاۋ كەزدەرىمىزدە دە كۇش الىپ، رۋح الىپ وتىراتىن قاسيەتتى وردالارىمىز بولعان عوي. ال بۇل قۇرىلتايدا ەلىمىزدىڭ مەملەكەتتىگىن باياندى ەتەتىن، ۇلتىمىزدى تۇعىرلى ەتەتىن، ەلگە رۋحاني سەرپىن بەرەتىن ماسەلەلەر قامتىلادى دەپ ەسەپتەيمىن، سوعان ءۇمىت ەتەتمىن.
سەنىم كەڭەسى سەنىمدى اقتاي الدى ما؟
ۇلتتىق قوعامدىق سەنىم كەڭەسىن قۇرۋ تۋرالى شەشىم پرەزيدەنت قاسىم-جومارت توقاەۆتىڭ ۇلىقتاۋ راسىمىندە ايتىلعان ەدى. كەڭەس پرەزيدەنت جانىنداعى كونسۋلتاتيۆتىك-كەڭەسشى ورگان رەتىندە جۇمىس ىستەدى. ۇلتتىق قوعامدىق سەنىم كەڭەسى نەسىمەن ەستە قالدى؟ ۇلتتىق دەگەن ءسوزدىڭ جۇگىن كوتەرەتىندەي نەندەي ماڭىزدى ماسەلەلەر كوتەرىلدى؟
سەنىم كەڭەسىنىڭ رەسمي سايتىندا ورگاننىڭ نەگىزگى ماقساتى حالىق، ساياسي پارتيالار، ازاماتتىق قوعام وكىلدەرىنىڭ تالقىلاۋىنان وتكەن مەملەكەت ساياساتىنداعى وزەكتى ماسەلەلەرگە بايلانىستى ۇسىنىستار مەن ۇستانىمداردى جيناۋ ەكەنى ايتىلعان.
جالپى، ورگاننىڭ ماقساتى مەملەكەتتىك باعدارلامالار جانە نورماتيۆتىك-قۇقىقتىق اكتىلەردىڭ جوباسىنا قوعامدىق ساراپتاما جاساۋ، ماڭىزدى ستراتەگيالىق پروبلەمالاردى تالقىلاۋ، وعان قاتىستى جۇرتشىلىقتىڭ پىكىرىن ەسكەرۋ، حالىق پەن بيلىك، مەملەكەتتىك ورگانداردىڭ اراسىندا ديالوگ ورناتۋعا ىقپال ەتۋ بولدى.
3 جىلدا سەنىم كەڭەسىنىڭ كوتەرگەن باستامالارىنىڭ ءبىرازى زاڭمەن بەكىتىلگەن ەكەن. رەسمي مالىمەتكە سۇيەنسەك، بەيبىت جيىنداردى وتكىزۋ ءتارتىبىنىڭ وزگەرگەنى، سايلاۋداعى پارتيا تىزىمىنە ايەلدەر مەن جاستاردىڭ 30 پايىز كۆوتاسىنىڭ ەنگىزىلگەنى، ءولىم جازاسىنا تىيىم سالىنعانى، پەدوفيلدەرگە قولداناتىن جازانىڭ كۇشەيگەنى، ساياسي پارتيالاردى تىركەۋ مەجەسى تومەندەتىلگەنى، سايلاۋ بيۋللەتەنىنە «بارىنە قارسىمىن» گرافاسى ەنگىزىلگەنى، ساياسي پارتيالاردىڭ ماجىلىسكە ءوتۋ شەگى تومەندەتىلگەنى، اۋىل اكىمدەرىن تىكەلەي سايلاۋ جانە ەڭ باستىسى – شەتەل ازاماتتارىنا جەردى ساتۋعا جانە جالعا بەرۋگە تىيىم سالىنعانى وسى كەڭەس جۇمىسىنىڭ ءناتيجەسى ەكەنى ايتىلادى.
ناقتى ساندارمەن دايەكتەيتىن بولساق، ۇلتتىق قوعامدىق سەنىم كەڭەسىندە ايتىلعان ماسەلەلەر بويىنشا 100-دەن استام نورماتيۆتىك-قۇقىقتىق اكتى قابىلدانعان ەكەن. سونىڭ ىشىندە پرەزيدەنت جارلىقتارى، ۇكىمەت قاۋلىلارى مەن زاڭدار بار.
ماسەلەن، پرەزيدەنتتىڭ بيىلعى جولداۋىندا ايتىلعان تاپسىرمالار مەن جۇكتەلگەن مىندەتتەردىڭ ءبىرازى، رەفەرەندۋمعا شىعارىلعان ۇسىنىستاردىڭ كەيبىرى سەنىم كەڭەسىندە باستاما رەتىندە كوتەرىلگەن.
سونىڭ ىشىندە پرەزيدەنتتىڭ پارتياعا جەتەكشىلىك ەتۋىنە تىيىم سالۋ، اكىمدەردىڭ پارتيا فيليالدارىن باسقارۋ قۇزىرەتىن شەكتەۋ، ءماجىلىس دەپۋتاتتارىن ارالاس جۇيەمەن سايلاۋ، سايلاۋداعى باقىلاۋشىلاردىڭ قۇقىقتارى مەن مىندەتتەرىن ايقىنداۋ، ساياسي پارتيانى تىركەۋگە قاجەت ادام سانىن ازايتۋ، ماجىلىستەگى اسسامبلەيانىڭ كۆوتاسىن قىسقارتۋ سياقتى كۇن تارتىبىندەگى وزەكتى بولىپ تۇرعان ماسەلەلەردى ايتىپ ءوتۋ كەرەك.
ياعني، وسىعان دەيىن تىزبەكتەپ ايتقان مالىمەتتەر ۇلتتىق قوعامدىق سەنىم كەڭەسىندە كوتەرىلگەن ماسەلەلەر جەتەر جەرىنە جەتىپ، ماقسات ورىندالدى دەپ ايتۋعا ءمۇمكىندىك بەرەتىن سياقتى. كەي ساراپشىلاردىڭ سوزىنە سۇيەنسەك، ورگان ءوز ميسسياسىن ءساتتى ورىنداعان، سونىمەن قاتار سەنىم كەڭەسى كونستيتۋتسيا رەفورماسىنا ىقپال ەتتى دەگەن دە پىكىر ايتىلىپ ءجۇر.
مارات ءباشىموۆ،
ەۋروپالىق
قۇقىق جانە
ادام
قۇقىقتارى جونىندەگى ينستيتۋت ديرەكتورى:
قوعامدىق ساياسي كەڭەس قۇرىلماعان بولسا، رەفەرەندۋم دا، رەفورمالار دا بولماس ەدى
– ۇلتتىق قوعامدىق سەنىم كەڭەسى ساياسي-قۇقىقتىق رەفورمالاردىڭ مودەلىنىڭ جاساقتالۋىنا ۇلكەن ۇلەسىن قوستى. وسىلايشا، تىزە بەرۋگە، جالعاستىرا بەرۋگە بولادى، ۇلتتىق كەڭەس ۇلكەن-ۇلكەن ماسەلەلەردى كوتەرىپ وتىردى. ونىڭ ىشىندە تۇتىنۋشىلاردىڭ قۇقىعىن قورعاۋ ماسەلەلەرى، جالپى ادام قۇقىقتارى ماسەلەلەرى قارالدى. ال قاراپايىم ازاماتتىڭ قۇقىعىن قورعايتىندار از. ءسوز بوستاندىعى ماسەلەسى كوتەرىلدى، ول دا دەموكراتيالىق دامۋدىڭ ءبىر تەتىگى ەكەنى انىق.
ودان بولەك، بەيبىت جينالىستار تۋرالى زاڭدى پرەزيدەنت وسى سەنىم كەڭەسى وتىرىسىندا ۇسىندى. زاڭ جوباسى حالىقارالىق ستاندارتتارعا، اتاپ ايتقاندا ازاماتتىق جانە ساياسي قۇقىقتار تۋرالى حالىقارالىق پاكتىنىڭ 21-بابىنا سايكەس كەلەدى، ءويتكەنى ەڭ باستىسى – ەرىك ءبىلدىرۋ قۇقىعى قامتاماسىز ەتىلدى.
كەڭەس قۇرامىندا ءبىرشاما ەڭبەك ەتكەن ازاماتتاردىڭ ءبىرازى ماجىلىسكە باردى، ەندى ولاردىڭ كەيبىرى ۇلتتىق قۇرىلتايدىڭ قۇرامىنا كىرىپ وتىر. قورىتا ايتقاندا، ورگان ءۇش جىل ىشىندە تابىستى دا جەمىستى جۇمىس اتقاردى. قوعامدىق ساياسي كەڭەس قۇرىلماعان بولسا، رەفەرەندۋم دا، رەفورمالار دا بولماس ەدى.
P.S.
ۇلتتىق قوعامدىق سەنىم كەڭەسى تاراتىلىپ، ورنىنا ۇلتتىق قۇرىلتاي قۇرىلادى دەگەننەن-اق ونىڭ ماڭىزدى ماسەلەلەردى تالقىلاۋ ءۇشىن تۇراقتى تۇردە شاقىرىلىپ وتىراتىنى ايتىلدى. ياعني، سەنىم كەڭەسىنىڭ جۇمىسى ودان ءارى كەڭەيتىلگەن تۇردە جالعاسىپ، تىڭ باستامالار كوتەرىلەدى، مارتەبەسى دە جوعارى بولادى. قۇرامىنا بەلگىلى قوعام قايراتكەرلەرى، ءوندىرىس جانە اۋىل شارۋاشىلىعى سالالارىندا ەڭبەك ەتەتىن ازاماتتار، كاسىپكەرلەر جانە باسقا دا قوعام بەلسەندىلەرى شاقىرىلاتىنى، ودان بولەك ايماقتاعى قوعامدىق كەڭەستەردىڭ اتىنان كەم دەگەندە ءبىر ادام مۇشە بولاتىنى سول كەزدەن بەلگىلى بولدى. ياعني، قوعامدىق كەڭەستەردىڭ ءبارى ۇلتتىق قۇرىلتايعا توپتاستىرىلماق. وسى ارقىلى حالىقتىڭ بيلىككە جەتپەي جاتقان بازىناسى مەن تالاپ-تىلەگى تەگىس تىڭدالادى دەگەن ءۇمىت بار.
اتىنا، ۇيىمداستىرىلۋ تارتىبىنە قاراپ، بۇل جيىننىڭ بۇرىنعى جيىننان وزگەشە بولاتىنىنا سەنىم ارتقاندار كوپ. نە دەسەك تە، بۇگىن ەل ءۇمىتىن ارقالاعان ازاماتتاردىڭ باسىن قوساتىن قۇرىلتاي بۇرىنعى اتا جولىن جالعاستىرىپ، سول ارقىلى بولاشاققا باعدار الاتىن، حالىقتىڭ ماسەلەسى كوتەرىلەتىن، كوتەرىلگەن ماسەلەلەر ەسكەرۋسىز-ەلەۋسىز قالمايتىن كەلەلى جيىنعا
اينالۋعا ءتيىس.
