ءانشى Qanay مەن ءبىرجان حاسانعاليەۆ ىمىراعا كەلدى

الەۋمەتتىك جەلىدە ءبىرجان حاسانعاليەۆ پەن Qanay-دىڭ اراسىنداعى ماسەلە تۋرالى ءتۇرلى قاۋەسەت تاراعان ەدى. ماسەلە Qanay لاقاپ اتىمەن تانىلعان ءانشى نۇربولات قانايدىڭ «بوزتورعايىم» انىن ورىنداۋىنا قاتىستى تۋىنداعان بولاتىن. وسى جاعدايعا قاتىستى ءانشىنىڭ پروديۋسەرى پىكىر ءبىلدىردى دەپ حابارلادى turkystan.kz massaget.kz-كە سىلتەمە جاساپ.

«بىرنەشە كۇن بويى ءبىرجان حاسانعاليەۆ پەن ءبىزدىڭ ارامىزدا ءاندى رۇقساتسىز ورىنداۋعا قاتىستى ماسەلە تۇردى. كەلىسەمىز، ءبىزدىڭ تاراپىمىزدان بۇل دۇرىس بولمادى. قالاي جانە نەگە بۇلاي بولعانىن تۇسىندىرمەيمىن، نەگىزگى ءارى جاعىمدى جاعىن ايتايىن. ءبىرجان اعانىڭ اشىقتىعى مەن تۇسىنىگىنىڭ ارقاسىندا ءبارى ويداعىداي شەشىلدى. كومپانيا، ءوزىمنىڭ، ءانشى Qanay-دىڭ اتىنان رەسمي تۇردە كەشىرىم سۇرايمىن. شارتتار بويىنشا انىقتاپ الدىق. ءبىرجان اعا بىزگە مول تاجىريبەسى بار مامان رەتىندە ورىنداۋدا جىبەرىلگەن قاتەلىكتەردى كورسەتتى. ەندى ءاندى تۇپنۇسقاعا سايكەس تۇزەتىپ، شىعارۋدى جوسپارلاپ وتىرمىز. اندەگى كاسىبي تۇرعىدان بارلىق تۇزەتۋدى قۋانا-قۋانا تانىسىپ، قابىلدادىق. تۇسىنىستىككە قول جەتكىزگەنىمىز قاتتى قۋانتادى»، – دەدى ءانشى Qanay-دىڭ پروديۋسەرى اسحات سابىروۆ.

بۇل جاعدايعا قاتىستى ءبىرجان حاسانعاليەۆ تە Instagram-پاراقشاسىندا پىكىر ءبىلدىردى.

«Qanay ىنىممەن جانە ونىڭ پروديۋسەرى اسحاتپەن وتە جاقسى كەزدەسۋلەر وتكىزدىك. جىگىتتەر ءبارىن ءتۇسىندى، قاتەلىكتەرىن مويىندادى، مەن ولارعا ريزامىن. اعاسى رەتىندە، قاناي ءىنىمنىڭ انشىلىك ونەرىنە ساتتىلىك، ۇلكەن بيىكتەرگە جەتۋىن تىلەدىم. تالانتتى جاستار وسە بەرسىن، جەتە بەرسىن. ءبىز تىلەكشىمىز! ەڭ باستىسى، جۋىق ارادا شىعاتىن ەسكەندىر حاسانعاليەۆ جازعان Boztorgaiym ءانىنىڭ تۇپنۇسقا نۇسقاسىن تىڭدارماندار تىڭدايدى. اسىعا كۇتەمىز! ەلىمىز امان، جۇرتىمىز تىنىش بولسىن»، – دەدى ول.

 

ۇقساس جاڭالىقتار

Back to top button