ەلىمىزدە 528،9 مىڭ ادامعا مۇگەدەكتىگىنە بايلانىستى جاردەماقى تولەنەدى

1 ماۋسىمداعى جاعداي بويىنشا قازاقستاندىقتارعا مۇگەدەكتىك جانە اسىراۋشىسىنان ايىرىلۋ بويىنشا 175،8 ملرد تەڭگەدەن استام قاراجات تولەندى دەپ حابارلادى turkystan.kz.

ونىڭ ىشىندە 2022 جىلدىڭ مامىر ايىندا رەسپۋبليكالىق بيۋدجەتتەن مۇگەدەكتىك بويىنشا مەملەكەتتىك الەۋمەتتىك جاردەماقى تولەۋگە 27،7 ملرد تەڭگە، اسىراۋشىسىنان ايىرىلۋىنا بايلانىستى جاردەماقى تولەۋگە 8،2 ملرد تەڭگە جۇمسالدى.

مۇگەدەكتىك بويىنشا مەملەكەتتىك الەۋمەتتىك جاردەماقى الۋشىلاردىڭ سانى 528،9 مىڭ، اسىراۋشىسىنان ايىرىلۋ جاعدايى بويىنشا 180،1 مىڭعا جەتتى.

«مۇگەدەكتىك جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىك توبىنا جانە سەبەبىنە، قايتىس بولعان (قازا تاپقان) اسىراۋشىنىڭ اسىراۋىنداعى ادام سانىنا، سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭدا بەلگىلەنەتىن ەڭ تومەنگى كۇنكورىس دەڭگەيىنە بايلانىستى بولادى»، – دەلىنگەن حابارلامادا.

1 ماۋسىمداعى جاعداي بويىنشا مۇگەدەكتىك جونىندەگى مەملەكەتتىك الەۋمەتتىك جاردەماقىنىڭ ورتاشا مولشەرى – 52 318 تەڭگە، اسىراۋشىدان ايىرىلۋ جاعدايى بويىنشا تولەنەتىن جاردەماقى – 45 906 تەڭگە.

 

ۇقساس جاڭالىقتار

Back to top button