توقاەۆ «قازاقستان حالقىنا» قورىنىڭ توراعاسىن قابىلدادى

مەملەكەت باسشىسى «قازاقستان حالقىنا» قورىنىڭ توراعاسى بولات جامىشەۆتى قابىلدادى دەپ حابارلادى turkystan.kz  اقورداعا سىلتەمە جاساپ.

پرەزيدەنتكە قوردىڭ ازاماتتارعا كورسەتكەن كومەگى بويىنشا ەسەبى، سونداي-اق قايىرىمدىلىق قىزمەتتى ۇيىمداستىرۋ جولدارى جونىندە اقپارات بەرىلدى.

بولات جامىشەۆتىڭ ايتۋىنشا، قازىرگى تاڭدا قور 10 قايىرىمدىلىق باعدارلاما مەن جوبانى جۇزەگە اسىرىپ جاتىر. اتاپ ايتقاندا، ولاردىڭ سەگىزى مەديتسينالىق كومەك كورسەتۋگە، بىرەۋى اۋىل بالالارى ءۇشىن سپورت سالاسىنداعى الەۋمەتتىك جاعدايدى جاقسارتۋعا باعىتتالسا، تاعى ءبىرى اۋىلدىق جەرلەردەن شىققان تالاپكەرلەر مەن از قامتىلعان وتباسىلاردىڭ ستۋدەنت بالالارىنا ءبىلىم گرانتتارىن بەرۋدى قاراستىرادى.

قاسىم-جومارت توقاەۆ قوردىڭ ماقساتتى باعىتتارىن انىقتاۋعا قوعام مەن قوعامدىق ينستيتۋتتاردى بەلسەندى تۇردە تارتۋ قاجەت ەكەنىنە باسا ءمان بەردى.

بولات جامىشەۆتىڭ ايتۋىنشا، قور جاڭادان تولىقتىرىلعان تۇجىرىمدامانى جانە قايىرىمدىلىق باعىتىنداعى باعدارلامالار مەن جوبالار ازىرلەۋدى قولعا الدى. بۇل جۇمىسقا كوممەرتسيالىق ەمەس سەكتوردىڭ وكىلدەرى، ءماسليحات دەپۋتاتتارى، قور مەتسەناتتارى بولىپ تابىلاتىن بيزنەس وكىلدەرى مەن ساراپشىلار كەڭىنەن تارتىلادى.

قور توراعاسىنىڭ ايتۋىنشا، بارلىق اتقارىلىپ جاتقان جۇمىستار تۋرالى تولىق اقپارات قوعام نازارىنا ۇسىنىلادى. قىركۇيەك ايىندا وتەتىن ۇلتتىق قايىرىمدىلىق كونفەرەنتسياسى وسى ۋاقىت ارالىعىندا اتقارىلعان جۇمىستىڭ قورىتىندى ەسەبى بولماق.

ۇقساس جاڭالىقتار

Back to top button