ۇبت-دان 139 بالل جيناعان ەكى تالاپكەردىڭ ناتيجەسى جويىلدى

بيىلعى ۇبت باستالعالى بەرى 139 بالل جيناعان ەكى تالاپكەر تىركەلدى. دەگەنمەن قايتا تەكسەرۋ كەزىندە اتالعان وقۋشىلاردىڭ ەرەجە بۇزعانى انىقتالعان دەپ حابارلادى turkystan.kz.

بۇل جايىندا ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ مالىمدەدى.

«سىزدەر ۇبت-دا ءوز بىلىمىڭىزبەن جوعارى ۇپاي جيناساڭىزدار، ءبىز قاتتى قۋانامىز. بىراق اكادەميالىق ادالدىق قاعيدالارىن ساقتاماي، وڭاي تاپسىرۋ جولدارىنا جۇگىنەتىن تالاپكەرلەر بار. سوندىقتان سىزدەرگە قۋانىشتى جاڭالىقتى ايتار الدىندا قوسىمشا تەكسەرىس جۇرگىزۋدى ءجون كوردىك. وكىنىشكە قاراي، تالاپكەرلەردىڭ بەينەجازباسىن قايتا تەكسەرۋ بارىسىندا ەرەجە بۇزۋ فاكتىلەرى انىقتالدى. ءتيىستى شارالار قولدانىپ، تەستىلەنۋشىلەردىڭ ۇپايىن جويدىق»، – دەيدى رۋسلان ەمەلباەۆ.

ونىڭ ايتۋىنشا، اكادەميالىق ادالدىق بارىنەن جوعارى تۇرۋى ءتيىس.

«ءوزىڭىزدى دە، وزگەلەردى دە الداۋدىڭ قاجەتى جوق. ەڭ دۇرىسى، ارماندارىڭىزعا ادال جولمەن جەتىڭىزدەر. ۇبت-دا تەرەڭ ءبىلىمىنىڭ ارقاسىندا 140 بالل جينايتىن تەست تاپسىرۋشى تابىلادى دەپ سەنەمىز. ول ءدال ءسىز بولۋىڭىز مۇمكىن، ءبىز ءسىزدى كۇتەمىز. مەنىڭ جەكە ءنومىرىم اشىق جاريالانعان، سىزدەر الەۋمەتتىك جەلىلەردە جازىپ جاتقان ءار حابارلامانى وقيمىن. وسىعان دەيىن جازعانىمداي، ءدال قازىر ءبىز 100-دەن اسا ەرەكشە جوعارى بالل (20+ بالدان 90+ بالعا دەيىن) جيناعان تالاپكەرلەردىڭ بەينەجازباسىن قوسىمشا تەكسەرىستەن وتكىزىپ جاتىرمىز. ەرەجە بۇزۋشىلىقتىڭ ارقاسىندا قول جەتكەن بۇكىل ناتيجە جويىلادى»، –  دەپ اتاپ ءوتتى ورتالىق ديرەكتورى.

ۇقساس جاڭالىقتار

Back to top button