8 جىل تۇرمەدە وتىرعان ۇقك-ءنىڭ ەكس-مايورى الپىسباەۆ اقتالىپ شىقتى

نۇر-سۇلتاندا القابيلەر سوتى تاپسىرىسپەن ادام ءولتىرۋ ءىسى بويىنشا ۇلتتىق قاۋىپسىزدىك كوميتەتىنىڭ (ۇقك) بۇرىنعى مايورى ايدىن الپىسباەۆتى كىناسىز دەپ تاپتى دەپ حابارلادى turkystan.kz.

سوت پروتسەسى نۇر-سۇلتان قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا سۋديا تامارا كورولەۆسكايانىڭ توراعالىعىمەن ءوتتى. قىلمىستىق ءىس ماتەريالدارىنا سايكەس، ايدىن الپىسباەۆ، مۇرات حاسەنوۆ جانە سەرگەي لوگۆينەنكو الدىن الا ءسوز بايلاسۋ بارىسىندا كاسىپكەر يگور كۋديندى ولتىرمەك بولعان، الايدا ويلارى ساتسىزدىككە ۇشىراعاننان كەيىن ولار ەكىنشى ارەكەتكە دايىندالىپ جاتقان.

ۇقك-ءنىڭ بۇرىنعى مايورى ايدىن الپىسباەۆتىڭ ءىسى 2014 جىلى باستالعان. كاسىپكەر يگور كۋدين بەلگىسىز بىرەۋلەردىڭ ومىرىنە قاستاندىق جاساماق بولعانى تۋرالى ارىزبەن قۇقىق قورعاۋ ورگاندارىنا جۇگىنەدى. ال ءبىر بەينەجازبانىڭ جانە كريمينالدىق پوليتسيا باسقارماسىنىڭ «ك» ءبولىمىنىڭ باستىعى ەرسەن وتەعاليەۆتىڭ وراسان جۇمىسىنىڭ ارقاسىندا قۇقىق قورعاۋ ورگاندارى قاستاندىق ارەكەتكە قاتىسۋشىلاردى انىقتاي الدى.

قورعاۋشى تاراپ، سونداي-اق سوتتالۋشىلاردىڭ وزدەرى دە ءىس تەرگەلىپ جاتقاندا ءتۇرلى زاڭ بۇزۋشىلىقتارعا بىرنەشە رەت نازار اۋدارعان. وسى كەزدە كۇن مەن ۋاقىت داتالارىنىڭ سايكەس كەلمەيتىنىن اڭعارعان. كوپتەگەن قۇجاتتاردا ورىنداۋشىنىڭ ءوزى، كۇنى، قولى جوق.

سوتتا ايىپتالۋشىلار قىسىم تۋرالى دا ايتىپ، ءبىرىنشى ايعاقتاردان باس تارتتى، وندا الپىسباەۆ حاسەنوۆتەن كاسىپكەردى ءولتىرۋدى ۇيىمداستىرۋدى سۇراعانى ايتىلعان ەدى. حاسەنوۆ ءوز كەزەگىندە كۇيەۋ بالاسى سەرگەي لوگۆينەنكونى ءولتىرۋشى رەتىندە جالداعان. ولاردىڭ ماقساتى اقشا الۋ جانە كاسىپكەردىڭ بيزنەسىن تارتىپ الۋ مۇمكىندىگى بولدى. پروكۋرورلار قانداي دا ءبىر قىسىم كورسەتۋ فاكتىسىن جوققا شىعاراتىن قولدا بار ساراپتاماعا سۇيەنىپ، مۇنداي مالىمدەمەلەرمەن كەلىسپەگەن.

ايدىن الپىسباەۆ 2014 جىلدان بەرى ءوزىنىڭ كىناسىزدىگىن ايتىپ، ونى جان-جاقتى دالەلدەۋگە تىرىسىپ كەلەدى. الپىسباەۆتىڭ ءوتىنىشى بويىنشا سوت القابيلەردىڭ قاتىسۋىمەن ءوتتى. سوتتالۋشى ۇستالعان ساتتەن باستاپ ايعاق بەرۋدەن باس تارتىپ، وسىعان بايلانىستى پسيحولوگيالىق قىسىمعا دا ۇشىراعان. 2016 جىلى سوت ساكەن سۇلەيمەنوۆتىڭ ءىسىنىڭ تەرگەۋشىسىن الپىسباەۆتى ازاپتاعانى ءۇشىن 3 جىلعا باس بوستاندىعىنان ايىردى.

ازاپتاۋ جانجالىنان بولەك، بۇل ءىس وزگە وقيعالارمەن دە ەستە قالدى. قازىرگى وتكەن سوت وتىرىسىندا ءۇشىنشى القابيلەر القاسى وتىردى. ءبىرىنشى قۇرامدا توراعالىق ەتۋشى سۋديا قايىروۆ تاراپىنان قىسىم بولعانى، ونىڭ ايىپتى ۇكىمدى شىعارۋعا ماجبۇرلەگەنى ايتىلعان. كەيىن جوعارعى سوت ۇكىمدى جويىپ، ءىستى قايتا قاراۋعا جىبەردى. تامارا كورولەۆسكايا كەڭەسۋ بولمەسىنىڭ قۇپياسىن اشامىز دەگەن جەلەۋمەن ەكىنشى قازىلار القاسىن تاراتىپ جىبەردى. ەندى قازىرگى قۇرام ايدىن الپىسباەۆ، سەرگەي لوگۆينەنكو جانە مۇرات حاسەنوۆتىڭ كىناسىز ەكەنىن ەسكەرىپ، ءوز ۇكىمىن شىعاردى.

ۇقساس جاڭالىقتار

Back to top button