پرەزيدەنت ءماجىلىس توراعاسى ەرلان قوشانوۆتى قابىلدادى

ءماجىلىس سپيكەرى پرەزيدەنتكە كونستيتۋتسيالىق رەفورمالاردى ودان ءارى ناقتى جۇزەگە اسىرۋعا قاتىستى الداعى زاڭ شىعارۋ جۇمىستارى جونىندە باياندادى دەپ حابارلادى turkystan.kz.

پارلامەنتتىڭ تومەنگى پالاتاسىنىڭ توراعاسى مەملەكەت باسشىسىنا ءماجىلىس دەپۋتاتتارى مەن «AMANAT» پارتياسىنىڭ مۇشەلەرى رەفەرەندۋمنىڭ ءمان-ماڭىزىن ءتۇسىندىرۋ ناۋقانى بارىسىندا ازاماتتاردان 20 مىڭنان استام ءوتىنىش جيناعانىن ايتتى. ۇكىمەتپەن بىرلەسە وتىرىپ، قازاقستاندىقتاردىڭ بارلىق ۇسىنىسى مەن كوتەرگەن ماسەلەلەرى پىسىقتالادى جانە زاڭ شىعارۋ جۇمىسى كەزىندە ەسكەرىلەدى.

سونىمەن قاتار ەرلان قوشانوۆ قاسىم-جومارت توقاەۆقا قازاقستان دەلەگاتسياسىنىڭ 6 ماۋسىمدا ەرەۆاندا وتكەن ۇقشۇ پارلامەنتتىك اسسامبلەياسى كەڭەسىنىڭ كوشپەلى وتىرىسىنا قاتىسقانى جونىندە ايتتى.

اتالعان جيىن بارىسىندا ۇقشۇ پارلامەنتتىك اسسامبلەياسى حالىقارالىق باقىلاۋشىلار ميسسياسى جۇمىسىنىڭ قورىتىندىسى جاريالاندى جانە ەلىمىزدە وتكەن رەفەرەندۋم ۇلتتىق زاڭناماعا تولىق ساي كەلەدى دەپ تانىلدى.

سونىمەن قاتار پارلامەنتتىك اسسامبلەيا حالىقارالىق جانە ايماقتىق دەڭگەيدە قاۋىپسىزدىك ماسەلەسىن شەشۋ ءۇشىن بۇۇ اياسىندا ۇجىمدىق قاۋىپسىزدىك شارت ۇيىمى بىتىمگەرلىك الەۋەتىنىڭ دامۋ بارىسىن تالقىلادى.

ۇقساس جاڭالىقتار

Back to top button