«حالىقتان ۇرلانعان اكتيۆتەردى ەلگە قايتارۋىمىز كەرەك» – پرەزيدەنت

قاسىم-جومارت توقاەۆ ەكونوميكالىق رەسۋرستاردىڭ زاڭسىز شوعىرلانۋىنا قارسى ءىس-قيمىل ماسەلەلەرى جونىندەگى ۆەدومستۆوارالىق كوميسسيانىڭ وتىرىسىن وتكىزدى، دەپ حابارلادى turkystan.kz اقورداعا سىلتەمە جاساپ.

پرەزيدەنت جيىنعا قاتىسۋشىلار الدىندا سويلەگەن سوزىندە حالىقتىڭ كونستيتۋتسياعا ەنگىزىلەتىن تۇزەتۋلەردى رەفەرەندۋمدا قابىلداعانىن جانە ونىڭ زاڭدى تۇردە كۇشىنە ەنگەنىن اتاپ ءوتتى. وسىلايشا، ازاماتتارىمىز جاڭا، ادىلەتتى قازاقستان قۇرۋدى قولدادى.

– رەفەرەندۋم اۋقىمدى جاڭعىرتۋلاردى جالعاستىرۋعا جول اشتى. ءبىز ەلدىڭ ءۇمىتىن جانە سەنىمىن  اقتاۋعا ءتيىسپىز. بارلىق سالادا  بارىنە بىردەي مۇمكىندىك بەرىلەتىن قوعام قۇرۋىمىز قاجەت. تۇرعىندار ەكونوميكالىق ءوسىمنىڭ يگىلىگىن شىن مانىندە كورۋى  كەرەك. مەملەكەتتىڭ بايلىعى بەلگىلى ءبىر ادامدارعا ەمەس، بارشا حالىققا تيەسىلى. سوندىقتان، بۇكىل حالىقتىڭ ءال-اۋقاتىن ارتتىرۋ – الدىمىزدا تۇرعان اسا ماڭىزدى مىندەت، – دەدى پرەزيدەنت.

مەملەكەت باسشىسى ەكونوميكا سالاسىن تارتىپكە كەلتىرىپ، تۇسىنىكتى ءارى ءادىل ويىن ەرەجەسىن بەكىتۋ قاجەت دەپ سانايدى. ونىڭ ايتۋىنشا، بۇل باعىتتا قوردالانعان پروبلەمالار مەن ولقىلىقتار بار.

قاسىم-جومارت توقاەۆ جاڭا قازاقستاندا ەكونوميكالىق دامۋدىڭ باستى قاعيداتى تابىستىڭ ءادىل ءبولىنۋى جانە ازاماتتاردىڭ تۇرمىس ساپاسىن ارتتىرۋ بولۋعا ءتيىس ەكەنىن اتاپ ءوتتى.

– جۋىردا مەنىڭ جارلىعىممەن ەكونوميكالىق رەسۋرستاردىڭ زاڭسىز شوعىرلانۋىنا قارسى كوميسسيا قۇرىلدى. بۇل كوميسسيا زاڭسىز جىلىستاتىلعان قاراجاتتى ەلگە قايتارۋمەن اينالىسادى. ونىڭ جۇمىسى ۇدايى قوعام نازارىندا بولادى. حالىق بىزدەن بوس ۋادە ەمەس، ناقتى ناتيجە كۇتەدى، – دەدى پرەزيدەنت.

پرەزيدەنتتىڭ پىكىرىنشە، ىنتىماقتى، زاڭدىلىقتى جانە جاۋاپكەرشىلىكتى ءمىنسىز ساقتاۋ ماڭىزدى.

– بارلىق ءىس-ارەكەت قۇقىقتىق نورمالارعا تولىق ساي بولۋعا جانە زاڭعا قاتاڭ ءارى مۇلتىكسىز نەگىزدەلۋگە ءتيىس. پروكۋراتۋرا قاداعالاۋشى ورگان رەتىندە قابىلداناتىن بارلىق راسىمدەردىڭ زاڭعا تولىقتاي سايكەس كەلۋىن قامتاماسىز ەتۋگە مىندەتتى. بۇل ماسەلەدە قاتەلەسۋگە جانە بىلىكسىزدىك تانىتۋعا بولمايدى، – دەدى قاسىم-جومارت توقاەۆ.

سونىمەن قاتار مەملەكەت باسشىسى ۆەدومستۆوارالىق كوميسسيانى بەلسەندى ءارى ناتيجەلى جۇمىس ىستەۋگە شاقىردى.

– كوميسسيا جۇمىسىنىڭ ناتيجەسى ناقتى ءارى ساپالى بولۋى كەرەك، – دەدى قاسىم-جومارت توقاەۆ.

مەملەكەت باسشىسىنىڭ ايتۋىنشا، ەلىمىزدەن زاڭسىز شىعارىلعان كاپيتالدى بارلىق زاڭدى راسىمدەردى ساقتاي وتىرىپ قايتارۋ ءۇشىن بەلگىلى ءبىر ۋاقىت كەرەك ەكەنىن ءتۇسىنۋ قاجەت.

قاسىم-جومارت توقاەۆتىڭ پىكىرىنشە، باستى ماقسات – سوتقا بەرىلگەن قىلمىستىق ىستەردىڭ سانى ەمەس، ەكونوميكانى ناقتى ساۋىقتىرۋ.

پرەزيدەنت كوميسسيانىڭ قىزمەتى جونىندە جۇرتشىلىققا جۇيەلى تۇردە حابار تاراتىپ وتىرۋدى تاپسىردى.

– ءبىزدىڭ ماقساتىمىز – ايقىن. حالىقتان ۇرلانعان اكتيۆتەردى ەلگە قايتارىپ، ادىلدىك ورناتۋىمىز كەرەك. قازىر، ەڭ باستىسى، جۇمىستى ءتيىمدى ۇيىمداستىرۋ قاجەت. كوميسسيا مۇشەلەرى وسى مىندەتتى ابىرويمەن اتقارادى دەپ سەنەمىن. پرەزيدەنت اكىمشىلىگى بارلىق جۇمىستى باقىلاۋدا ۇستايدى، – دەدى مەملەكەت باسشىسى.

سونىمەن قاتار جيىندا پرەمەر-مينيستر ءاليحان سمايىلوۆ جانە باس پروكۋرور بەرىك اسىلوۆ بايانداما جاسادى.

ۇقساس جاڭالىقتار

Back to top button