الماتىدا جۇمىسشىلار 4 ايدان بەرى جالاقى الماعان

الماتىدا 300-گە جۋىق جۇمىسشى 4 ايدان بەرى جالاقىلارىن الا الماي ءجۇر دەپ حابارلادى turkystan.kz almaty.tv ارناسىنا سىلتەمە جاساپ. 

ايتۋلارىنشا، جاۋاپتى كومپانيا وكىلدەرى قۇرىلىسشىلاردىڭ ماڭداي تەرمەن تاپقان اقشالارىن بەرمەگەن. بۇگىندە جولايرىق سالۋمەن اينالىساتىن مەردىگەر ۇيىم ولارعا 99 ميلليون تەڭگە قارىز.

شىدامى تاۋسىلعان جۇمىسشىلار وسىمەن 4 رەت باس كوتەرىپ وتىر. ولار ءاۋ باستان سەيفۋللين – جانسۇگىروۆ كوشەلەرىنىڭ قيىلىسىنداعى جولايرىقتى سالۋ بويىنشا جاۋاپتى كومپانيامەن كەلىسىمگە وتىرعان. بىراق، نەگە ەكەنى بەلگىسىز، اقپان ايىنان بەرى جول قۇرىلىسشىلارىنا جالاقى تولەنبەپتى.

«ءار اپتا سايىن جۇما كۇنى، جۇما كۇنى دەيدى. ءبىزدىڭ دە بالا-شاعامىز بار. بۇگىن دە كۇتىپ وتىرمىز. ەندى تاعى دا 15 كۇن كۇتىڭدەر دەيدى»، – دەدى جۇمىسشى بەيسەنعالي نۇرباەۆ.

ەلىمىزدىڭ ءار وڭىرىنەن جينالعان جۇمىسشىلار قازىر ۇيلەرىنە قايتا الماي وتىر. ەڭ قيىنى، تولەنبەگەن نەسيەنىڭ ءوسىمپ ۇلى كۇن سايىن ءوسىپ بارادى دەيدى.

«قازىر جۇمىستاعىلار نوتاريۋس ارقىلى ءبىزدىڭ اقشامىزدى ەسەپتەيتىن ادام پايدا بولدى دەپ جاتىر. ول دەگەنىمىز – قايتادان ۋاقىت سوزۋ. ال ءبىزدىڭ نەسيەمىز بار، بانكتەن كۇندە حابارلاسادى، نەسيەنىڭ ءوسىمى بار عوي. ۇيدە بالا-شاعامىز اش وتىر»، – دەدى جۇمىسشى ەرلان شەگىرتكەنوۆ.

كومپانيا باسشىسى بۇل جولى دا جالاقىلارىن تولەيتىنىنە سەندىرىپ باقتى.

«بۇگىندە 286 ادامعا 99 ميلليون تەڭگە قارىزبىز. ءبىز مۇنى اي سوڭىنا دەيىن وتەيمىز دەپ جوسپارلاپ وتىرمىز»، – دەدى جاۋاپتى كومپانيانىڭ ديرەكتورى مالىك سىزدىقوۆ.

جۇمىسشىلار ەگەر اقشامىزدى بەرمەسە، ءبىراۋىزدان قۇزىرلى ورگاندارعا ارىزدانامىز دەپ وتىر.

ۇقساس جاڭالىقتار

Back to top button