«جايىلىم تاپشىلىعى ماسەلەسىن اۋىل اكىمدەرى شەشۋى كەرەك» - جۇماعازيەۆ

«AMANAT» پارتياسىنىڭ حاتشىسى ەلدار جۇماعازيەۆ پارلامەنت ماجىلىسىندەگى فراكتسيا مۇشەسى مەيرامبەك تولەپبەرگەنمەن بىرگە جامبىل وبلىسى، بايزاق اۋدانىنىڭ تۇرعىندارىمەن كەزدەستى.

ۇلگىلى اۋىلدىق وكرۋگىنىڭ تۇرعىندارى جايىلىم تاپشىلىعىنا شاعىمداندى. بۇگىندە وكرۋگتە 1400 باس ءىرى قارا، 13 مىڭعا جۋىق ۇساق مال، 700 باس جىلقى بار. اۋىل تۇرعىندارىنا مال جايۋ ءۇشىن شامامەن 8 مىڭ گەكتارداي جەر قاجەت، بىراق قازىر ولاردا بارى – 4 مىڭ گەكتار جەر.

«قازىرگى ۋاقىتتا حالىق تابىسىن ارتتىرۋ ماقساتىندا پيلوتتىق جوبا اياسىندا ءوڭىر تۇرعىندارى نەسيە الىپ، بارلىعى دەرلىك قوراسىن مالعا تولتىرىپ الدى. حالىقتىڭ نەگىزگى كۇنكورىسى ءتورت ت ۇلىك بولعان سوڭ، جايىلىم جەردىڭ تاپشىلىعى جانعا باتادى»، – دەدى جەرگىلىكتى تۇرعىن فازىل شالقاروۆ.

ءوز كەزەگىندە بايزاق اۋدانى اكىمىنىڭ ورىنباسارى بولات ساعىمبەكوۆ ۇلگىلى اۋىلى اكىمدىگى مەن «بانسەت» شارۋا قوجالىعى اراسىندا 680 گەكتار جايىلىمدى بىرلەسىپ پايدالانۋ تۋرالى مەموراندۋم جاسالعانىن اتاپ ءوتتى. شارۋاشىلىق باسشىسى اۋىل تۇرعىندارىنا مال جايۋ ءۇشىن قوسىمشا 1000 گەكتار جەردى پايدالانۋعا رۇقسات بەرگەن.

تۇيمەكەنت

وسى كۇنى پارتيالىقتار تۇيمەكەنت اۋىلدىق وكرۋگىنىڭ تۇرعىندارىمەن دە كەزدەستى. جەرگىلىكتى تۇرعىندار نەسيەگە 5200 باس مال ساتىپ العانىمەن، جايىلىمنىڭ جەتىسپەۋشىلىگىنە تاپ بولىپ وتىر.

«ارينە، اۋىلدىق جەرلەردە مال باسىن كوبەيتۋ كەرەك. بۇل حالىق تابىسىنىڭ وسۋىنە تىكەلەي اسەر ەتەدى. جايىلىم جەر تاپشىلىعى ماسەلەسىن اۋىل اكىمدەرى ءوز دەڭگەيىندە شەشۋى ءتيىس. بۇل ءۇشىن ولاردا ءتيىستى بيۋدجەت بولۋى قاجەت. وسىعان بايلانىستى «AMANAT» پارتياسى اتالعان ماسەلەنى جۇيەلى شەشۋ ماقساتىندا زاڭناماعا تۇزەتۋلەر ەنگىزۋ باستاماسىن كوتەرۋدى جوسپارلاپ وتىر»، – دەدى پارتيا حاتشىسى ەلدار جۇماعازيەۆ.

بۇدان سوڭ پارتيالىقتار جەرگىلىكتى اتقارۋشى ورگان وكىلدەرىمەن كەڭەس وتكىزدى. پارلامەنت ءماجىلىسىنىڭ دەپۋتاتى مەيرامبەك تولەپبەرگەن شەنەۋنىكتەرگە پايدالانىلماعان جەردى مەملەكەتكە قايتارۋ تەتىگىن بەلسەندى قولدانۋ كەرەك ەكەنىن ەسكە سالدى.

ەسكە سالسساق، بۇعان دەيىن «AMANAT» پارتياسىندا «اۋىل اماناتى» جوباسىن ىسكە اسىرۋ اياسىندا ارنايى جوبالىق كەڭسەنىڭ اشىلعانى تۋرالى حابارلانعان بولاتىن. ستاتيستيكالىق ەسەپتىڭ جاڭا ادىستەمەسىن ازىرلەپ، ءاربىر اۋىلدىڭ ەكونوميكالىق ماماندانۋىن انىقتايتىن دەرەكتەر جيناۋ جوسپارلانۋدا.

ۇقساس جاڭالىقتار

Back to top button