پرەزيدەنت بۇۇ باس حاتشىسىنىڭ ءبىرىنشى ورىنباسارىن قابىلدادى

مەملەكەت باسشىسى قاسىم-جومارت توقاەۆ ورتالىق ازياعا ساپارى اياسىندا قازاقستانعا كەلگەن بۇۇ باس حاتشىسىنىڭ ءبىرىنشى ورىنباسارى امينا مۇحاممەدتى قابىلدادى دەپ حابارلادى turkystan.kz اقورداعا سىلتەمە جاساپ.

كەزدەسۋ بارىسىندا قازاقستان مەن بۇۇ اراسىنداعى ىنتىماقتاستىقتىڭ باسىم باعىتتارى قاراستىرىلدى. ورنىقتى دامۋ ماقساتتارىنا قول جەتكىزۋ، كليماتتىڭ وزگەرۋىنە قارسى كۇرەس، پاندەمياعا قارسى ءىس-قيمىل جانە گەندەرلىك تەڭدىك پەن ادام قۇقىقتارىن قامتاماسىز ەتۋ جونىندەگى بىرلەسكەن كۇش-جىگەرگە ەرەكشە نازار اۋدارىلدى.

قاسىم-جومارت توقاەۆ امينا مۇحاممەدكە ءىلتيپات بىلدىرە وتىرىپ، لاۋازىمدى قىزمەتكە قايتا سايلانۋىمەن قۇتتىقتادى. ونىڭ بۇل ساپارى ەلىمىزدىڭ تاريحىنداعى بەتبۇرىس كەزەڭ – جالپىۇلتتىق رەفەرەندۋم وتكىزۋمەن تۇسپا-تۇس كەلگەنىن اتاپ ءوتتى. سونداي-اق رەفەرەندۋم قورىتىندىلارى جاڭا قازاقستاندى قۇرۋ ىسىنە كىرىسۋگە مۇمكىندىك بەرەتىنىن ايتتى.

پرەزيدەنت كوپجاقتىلىق قاعيداتى مەن حالىقارالىق ديپلوماتيانى قالىپتاستىرىپ، دامىتۋدا دۇنيەجۇزىلىك ۇيىمنىڭ ەرەكشە ءرول اتقاراتىنىن اتاپ ءوتتى. قاسىم-جومارت توقاەۆ قازاقستاننىڭ بۇۇ-مەن اراداعى ىنتىماقتاستىقتى ودان ءارى جان-جاقتى نىعايتۋعا بەيىلدى ەكەنىنە توقتالىپ، ونىڭ جاھاندىق پروبلەمالاردى شەشۋ جونىندەگى كۇن ءتارتىبىن تولىق قولدايتىنىن جەتكىزدى.

قازاقستان پرەزيدەنتى بۇۇ باس حاتشىسى انتونيۋ گۋتەرريشتىڭ بەيبىتشىلىك پەن جاھاندىق قاۋىپسىزدىك ماسەلەلەرى جونىندەگى جاڭا كۇن ءتارتىبىن ازىرلەۋ ءۇشىن 2023 جىلى جوعارى دەڭگەيدەگى «بولاشاقتىڭ ءسامميتىن» شاقىرۋ تۋرالى باستاماسىن قۇپتادى.

مەملەكەت باسشىسى قازىرگى زاماننىڭ كۇردەلى سىن-قاتەرلەرى جاعدايىندا ورنىقتى دامۋ سالاسىنداعى ماقساتتارعا قول جەتكىزۋ ءۇشىن كەزەك كۇتتىرمەيتىن جانە اۋقىمدى شارالار قابىلداۋدىڭ ماڭىزدى ەكەنىن اتاپ ءوتتى.

سونىمەن قاتار مەملەكەت باسشىسى ازىق-ت ۇلىك قاۋىپسىزدىگىن قامتاماسىز ەتۋ، مۇقتاج ەلدەرگە گۋمانيتارلىق كومەك كورسەتۋ ءۇشىن قازاقستان تاراپىنان قابىلدانىپ جاتقان شەشىمدەر تۋرالى ايتتى.

قاسىم-جومارت توقاەۆ ايەلدەر مەن قىزدارعا قاتىستى زورلىق-زومبىلىقتىڭ بارلىق ءتۇرىن جويۋ جونىندەگى ورتالىق ازيا مەن اۋعانستانعا ارنالعان SpotLight Initiative وڭىرلىك باعدارلاماسىن جۇزەگە اسىرۋ ىسىندەگى امينا مۇحاممەدتىڭ كوشباسشىلىعىن جوعارى باعالادى.

ءوز كەزەگىندە امينا مۇحاممەد مەملەكەت باسشىسىنا بۇۇ باس حاتشىسىنىڭ جۇرەكجاردى سالەمىن جەتكىزدى. سونداي-اق قاسىم-جومارت توقاەۆتىڭ باسشىلىعىمەن ەلىمىزدە جۇزەگە اسىرىلىپ جاتقان اۋقىمدى رەفورمالاردى قولدايتىنىن ايتىپ، رەفەرەندۋمنىڭ ءساتتى وتۋىمەن قۇتتىقتادى.

بۇۇ باس حاتشىسىنىڭ ءبىرىنشى ورىنباسارى قازاقستان مەن بۇۇ-نىڭ 30 جىل ىشىندە ورناتقان كوپجاقتى سەرىكتەستىگىنىڭ دەڭگەيىنە جوعارى باعا بەردى.

سونىمەن قاتار اڭگىمەلەسۋ بارىسىندا اۋعانستان ماسەلەسى قاراستىرىلدى. امينا مۇحاممەد اۋعانستاندى الەۋمەتتىك-ەكونوميكالىق تۇرعىدان قايتا قالپىنا كەلتىرۋگە بايلانىستى پروبلەمالاردى شەشۋدە حالىقارالىق كۇش-جىگەردى جانداندىرۋدىڭ ماڭىزدى ەكەنىن ايتتى.

ۇقساس جاڭالىقتار

Back to top button