دارحان مىڭباي: اتا زاڭ – ەلدىكتىڭ ولشەمى

پارلامەنت ءماجىلىسىنىڭ دەپۋتاتى دارحان مىڭباي كونستيتۋتسياعا ەنگىزىلەتىن وزگەرىستەر مەن تولىقتىرۋلار بويىنشا وتكەن رەفەرەندۋمعا قاتىستى پىكىرىن ءبىلدىردى دەپ حابارلادى turkystan.kz.

«وزگەرىستەر كۇتكەن ەلىمىزدىڭ ازاماتتارى رەفەرەندۋم ارقىلى ءوز ەرىك-جىگەرىن الەمگە جاريا ەتتى. قاتىسۋشىلاردىڭ 77،18 پايىزى جاڭارعان كونستيتۋتسيانى قولدادى. ەقىۇ/دياقب-نىڭ رەفەرەندۋمدى باعالاۋ جونىندەگى ميسسياسىنىڭ باسشىسى تاماش مەسەريچ وسىناۋ ساياسي شارانى ۇيىمداستىرۋشىلارعا رەفەرەندۋم كوميسسيالارىنىڭ بارلىق دەڭگەيلەرىندە ءتيىمدى ءوزارا ءىس-قيمىل جاساعانى ءۇشىن العىس ايتتى. الداعى ۋاقىتتا تىعىز ىنتىماقتاستىعىن جالعاستىرۋعا دايىندىعىن راستادى. شانحاي ىنتىماقتاستىق ۇيىمىنان، تۇركى مەملەكەتتەر ۇيىمىنان كەلگەن، وزگە دە حالىقارالىق بايقاۋشىلار قاتىسىپ، ەلىمىزدەگى جاعدايعا قانىق بولدى»، – دەدى دارحان مىڭباي.

ءماجىلىس دەپۋتاتى قاشاندا جاڭالىققا قۇمار حالقىمىزدىڭ ىشىنەن، اسىرەسە جاستاردىڭ ىنتاسى ەرەكشە بولعانىن اتاپ ءوتتى.

«باق-تا جاريالانعان داۋىس بەرۋ قورىتىندىسى تەك تسيفر مەن پايىز بولىپ قالماسىن دەسەك، قوعامدى تۇزەۋگە دەگەن قۇلشىنىس، ادام قۇقىعىن ساقتاۋ، سونىڭ ىشىندە ەڭبەك ادامىنا دەگەن قۇرمەت، سايلاۋ تۋرالى، وزگە دە زاڭنامانى كونستيتۋتسياعا سايكەستەندىرۋ، ونى بۇلجىتپاي ورىنداۋ ءبىر ءسات تە ۇمىت قالماۋعا ءتيىس.  ويتكەنى، حالىق سىنى قاتەسىز. ال اتا زاڭ – ەلدىكتىڭ ولشەمى. كەزىندە «جەتى جارعىنى» قابىلداعاننان كەيىن ءاز تاۋكە حان اتاقتى بيلەردەن: «داۋعا بيلىك ايتقاندا، الدىمەن جاسى ۇلكەننىڭ باستاۋى، جاسى كىشىنىڭ قوشتاۋى ءجون بە، الدە جاسى كىشى باستاپ، جاسى ۇلكەننىڭ قوشتاۋى ءجون بە؟ – دەپ سۇراپتى. سوندا بۇل سۇراقتىڭ سىن ەكەندىگىن ۇققان تولە بي بابامىز: «توبەدە تۇرعان كىسى ءتورت جاعىن تۇگەل كورگەندە، تومەندە تۇرعان ەكى جاعىن، بەتكەيدە تۇرعان ءبىر جاعىن ارەڭ كورەدى. سوندىقتان جاسى ۇلكەننىڭ، وڭى مەن سولىن، الدى-ارتىن بولجاعان اعانىڭ الدىمەن بيلىك ايتقانى دۇرىس قوي» – دەگەن جاۋابى قاي زاماندا دا كوكەيدە تۇرسا، اتا-داستۇردەن اينىمايتىن شىعارمىز»، – دەدى ول.

دارحان مىڭبايدىڭ  ايتۋىنشا، ەلىمىزدە ءداستۇردى جاڭعىرتۋ باعىتىندا ۇلتتىق قۇرىلتايدىڭ قۇرىلۋى دا حالىقتى مەملەكەت ىسىنە تارتۋعا مۇمكىندىك بەرەدى.

«ودان باسقا جاڭا قۇرىلىمدار – كونستيتۋتسيالىق سوت، ادام قۇقىقتارى جونىندەگى ۋاكىل، جوعارى اۋديتورلىق پالاتا ءوز دارەجەسىندە ەلىمىزدە ادىلەتتىلىكتى ورناتۋعا بارىنشا اتسالىسۋعا ءتيىس دەپ ويلايمىز. كونستيتۋتسيالىق رەفورما جاۋاپكەرشىلىگىن موينىنا العان بيلىكتىڭ بارلىق تارماقتارى وزدەرىنە جۇكتەلگەن وراسان زور مىندەتتەردى ادال ورىنداۋ ارقىلى عانا ەلىمىزدى وركەندەتىپ، دامىتۋعا ۇلەس قوسا الادى»، – دەدى ءماجىلىس دەپۋتاتى.

ىڭكار سەرىكقىزى

ۇقساس جاڭالىقتار

Back to top button