«رەفەرەندۋم ناتيجەسى ۇلتىمىز ۇلكەن وزگەرىستەرگە دايىن ەكەنىن كورسەتتى» - سەنات توراعاسى

رەفەرەندۋمنىڭ ناتيجەسى ۇلتىمىز ۇلكەن وزگەرىستەرگە دايىن ەكەنىن كورسەتىپ بەردى. بۇل تۋرالى سەنات توراعاسى ماۋلەن اشىمباەۆ ايتتى دەپ حابارلادى turkystan.kz.

«5 ماۋسىم كۇنى ەلىمىزدە جالپىۇلتتىق رەفەرەندۋم ءوتتى. بۇل ەل تاريحىنداعى ەڭ ماڭىزدى ءارى شەشۋشى وقيعالاردىڭ ءبىرى بولعانى ءسوزسىز. رەفەرەندۋمعا قاتىسقان ازاماتتارىمىزدىڭ باسىم بولىگى كونستيتۋتسياعا ۇسىنىلعان تۇزەتۋلەردى قولداپ، داۋىس بەردى. وسىلايشا، قازاقستان حالقى پرەزيدەنت قاسىم-جومارت كەمەل ۇلى توقاەۆتىڭ «جاڭا قازاقستان» قۇرۋ جولىنداعى باستامالارىنا قولداۋ ءبىلدىردى. سونىمەن قاتار رەفەرەندۋمنىڭ ناتيجەسى ۇلتىمىز ۇلكەن وزگەرىستەرگە دايىن ەكەنىن كورسەتىپ بەردى. ەندىگى مىندەت – حالىقتىڭ وسى قالاۋىن ىسكە اسىرۋ. ويتكەنى ەلىمىزدى جاڭعىرتۋ ءۇشىن جۇرگىزىلىپ جاتقان رەفورمالار رەفەرەندۋممەن شەكتەلمەيتىنى تۇسىنىكتى. سوندىقتان ناعىز جۇمىس ەندى باستالادى دەسەك، ارتىق بولا قويماس. مەملەكەت باسشىسى رەفەرەندۋم قورىتىندىسى بويىنشا جاساعان ۇندەۋىندە وسى ماسەلەگە باسا ءمان بەرىپ، ەلىمىزدى جان-جاقتى جاڭعىرتۋ جالعاسا بەرەتىنىن ايتتى»، – دەدى م. اشىمباەۆ سەناتتىڭ جالپى وتىرىسىندا.

بۇل رەتتە ول زاڭنامالىق باعىتتا اتقارىلار ءىستىڭ اۋقىمى كەڭ، ماڭىزى زور ەكەنىن اتاپ ءوتتى.

«پرەزيدەنت ايتقانداي، كونستيتۋتسيالىق رەفورما بۇكىل قۇقىق سالاسىن جاڭعىرتۋعا جول اشادى. بۇل ءوز كەزەگىندە پارلامەنتكە ۇلكەن ءارى جاۋاپتى مىندەتتەر جۇكتەيدى. كونستيتۋتسياعا ەنگىزىلگەن وزگەرىستەرگە سايكەس، زاڭناماعا ءتيىستى تۇزەتۋلەر ەنگىزۋىمىز قاجەت. سەناتتىڭ دا جۇمىسىن جەتىلدىرۋ كەرەك. جالپى، ءبىزدىڭ باستى ماقساتىمىز – دەموكراتيالىق، قۇقىقتىق، ادىلەتتى جانە الەۋمەتتىك مەملەكەت قالىپتاستىرۋ. وسى جولدا سەنات دەپۋتاتتارى بەلسەندىلىك تانىتىپ، «جاڭا قازاقستان» قۇرۋ ىسىنە ۇلكەن ۇلەس قوسادى دەپ سەنەمىن»، – دەدى ماۋلەن اشىمباەۆ.

ۇقساس جاڭالىقتار

Back to top button