21 ملن تەڭگە پارا العان انتيكور قىزمەتكەرى 7 جىلعا سوتتالدى

اتىراۋدا 21 ملن تەڭگە پارا العان انتيكور قىزمەتكەرى 7 جىلعا سوتتالدى دەپ حابارلادى turkystan.kz.

اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا سىبايلاس جەمقورلىققا قارسى ءىس-قيمىل اگەنتتىگى اتىراۋ وبلىسى بويىنشا دەپارتامەنتىنىڭ قىزمەتكەرىنە قاتىستى قىلمىستىق ءىس قارالدى.

سوتتالۋشى م.-عا قىلمىستىق كودەكستىڭ 24-بابىنىڭ 3-بولىگى، 28-بابىنىڭ 4-بولىگى، 367-بابىنىڭ 4-بولىگى، 190-بابىنىڭ 4-بولىگى 2-تارماعى بويىنشا ايىپ تاعىلعان.

«سوتتا مىنا جايتتار انىقتالدى: 2021 جىلدىڭ ءساۋىر ايىندا سوتتالۋشى م.-عا «پ.پ» جشس باسقارما توراعاسى ب.-عا قاتىستى دەپارتامەنت قىزمەتكەرلەرىنىڭ جەدەل-ىزدەستىرۋ ءىس-شارالارى جۇرگىزىلگەنى بەلگىلى بولعان. م. 26 ماۋسىمدا جابىرلەنۋشى ب.-مەن كەزدەسىپ، وعان قاتىستى تەكسەرۋدى توقتاتۋعا ىقپال ەتە الاتىنىن ايتقان. دەپارتامەنت پەن اگەنتتىكتىڭ باسشىلىعى ارقىلى ونىڭ پايداسىنا وڭ شەشىم شىعاراتىنىن، بۇل ءۇشىن 30 ملن تەڭگە تالاپ ەتكەن. م. سول جىلعى 30 ماۋسىمدا سوتتالۋشى جابىرلەنۋشىمەن قايتا كەزدەسۋ كەزىندە 21 ملن تەڭگەگە كەلىسكەن. بۇل اقشانى سوتتالۋشى م. تانىسىنان ب.-نىڭ پاتەرىنەن الىپ كەتۋىن سۇراعان. سول كۇنى م.-نىڭ تانىسى جابىرلەنۋشىنىڭ پاتەرىنەن اقشانى العان»، – دەپ حابارلادى قىلمىستىق ىستەر جونىندەگى مامانداندىرىلعان اۋدانارالىق سوتتىڭ ءباسپاسوز قىزمەتى.

سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى اقشا بەرۋ كەزىندە كۋاگەردى ۇستاعان. كورسەتىلگەن ءمان-جايلار جانە سوتتالۋشىنىڭ كىناسى جابىرلەنۋشىنىڭ، كۋاگەرلەردىڭ ايعاقتارىمەن، وقيعا بولعان جەردى تەكسەرۋ حاتتامالارىمەن، Whatsapp مەسسەندجەرىندەگى حات الماسۋمەن، اۋديو، بەينە جازبالارمەن، ساراپتاما قورىتىندىلارىمەن راستالعان. پروكۋرور م.-عا 10 جىلعا باس بوستاندىعىنان ايىرۋ جازاسىن تاعايىنداۋدى سۇراعان.

«سوت سوتتالۋشى م.-نى قىلمىستىق كودەكستىڭ 24-بابىنىڭ 3-بولىگى، 190-بابىنىڭ 4-بولىگى، 2-تارماعى، 28-بابىنىڭ 4-بولىگىمەن، 367-بابىنىڭ 3-بولىگىنىڭ 2-تارماعىمەن كىنالى دەپ تانىدى. سوتتالۋشى م.-نىڭ قابىلداعان انتتى بۇزۋ ارقىلى قىلمىس جاساعانىن جازانى اۋىرلاتاتىن جاعداي رەتىندە قاراستىردى. سوتتالۋشىنىڭ جاسى مەن وتباسىلىق جاعدايى ەسكەرىلدى»، – دەپ ءمالىم ەتتى سوتتىڭ ءباسپاسوز قىزمەتى.

سوت ۇكىمىمەن سوتتالۋشى م.-عا مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا، 7 جىلعا باس بوستاندىعىنان ايىرۋ جازاسى تاعايىندالدى. سونداي-اق، سوتتالۋشى 5 ساناتتى بىلىكتىلىك سىنىبىنان ايىرىلدى. سوت ۇكىمى زاڭدى كۇشىنە ەنگەن جوق.

ىڭكار سەرىكقىزى

ۇقساس جاڭالىقتار

Back to top button