توقاەۆ ترانسۇلتتىق كومپانيانىڭ باسشىلارىمەن بىرقاتار كەزدەسۋ وتكىزدى

قازاقستان پرەزيدەنتى جانىنداعى شەتەلدىك ينۆەستورلار كەڭەسىنىڭ XXXIV وتىرىسىنىڭ قارساڭىندا مەملەكەت باسشىسى Chevron كورپوراتسياسىنىڭ اتقارۋشى ۆيتسە-پرەزيدەنتى دجەيمس دجونسونمەن، Exxon Mobil كورپوراتسياسىنىڭ اعا ۆيتسە-پرەزيدەنتى نيل چاپمانمەن، سونداي-اق قازاقستاننىڭ كاناداداعى قۇرمەتتى كونسۋلدارى – كانادالىق Cameco ۋران كومپانياسىنىڭ پرەزيدەنتى تيموتي گيتتسەلمەن جانە Condor Petroleum كومپانياسىنىڭ پرەزيدەنتى دون ستريۋمەن جەكە-جەكە كەزدەسۋ وتكىزدى دەپ حابارلادى turkystan.kz اقورداعا سىلتەمە جاساپ.

دجەيمس دجونسونمەن اڭگىمەلەسۋ بارىسىندا قاسىم-جومارت توقاەۆقا كورپوراتسيانىڭ ەلىمىزدە اتقارىپ جاتقان جۇمىستارىنىڭ قازىرگى ناتيجەلەرى مەن الداعى كەزەڭگە ارنالعان جوسپارى تۋرالى مالىمەت بەرىلدى. اتاپ ايتقاندا، تەڭىز كەن ورنىن بولاشاقتا كەڭەيتۋ جوباسى بويىنشا قۇرىلىس-مونتاج جۇمىستارىن تەزىرەك اياقتاۋ ماسەلەسى ءسوز بولدى.

سونىمەن قاتار، قاراشىعاناق كەن ورنىنىڭ ءوندىرىس قۋاتىن ارتتىرۋ ماسەلەسى، قازاقستاندا وتاندىق ونىمدەردى قولداۋعا جانە قورشاعان ورتانى قورعاۋعا باعىتتالعان Chevron كورپوراتسياسىنىڭ تىكەلەي ينۆەستيتسيا سالاتىن قورىنىڭ قىزمەتى تالقىلاندى.

نيل چاپمان مەملەكەت باسشىسىنا قاراشىعاناق كەن ورنىنداعى گاز وڭدەۋ زاۋىتى قۇرىلىسىنىڭ بارىسى، تەڭىز كەن ورنىنان ەكسپورتتالاتىن گاز كولەمىن ىشكى نارىققا قايتا تاسىمالداۋ جانە بالاما باعىتتار ارقىلى قازاقستان مۇنايىن جەتكىزۋ مۇمكىندىكتەرى جونىندە ايتتى.

تيموتي گيتتسەلمەن جانە دون ستريۋمەن اڭگىمەلەسۋ كەزىندە قازاقستاندا بىرلەسكەن ينۆەستيتسيالىق جوبالاردىڭ جۇزەگە اسىرىلۋ بارىسى ءسوز بولدى. اتاپ ايتقاندا، Cameco كومپانياسىنىڭ پرەزيدەنتى قاسىم-جومارت توقاەۆقا ەلىمىزدەگى ۋران كومپانياسىنىڭ جۇمىسى مەن الداعى جوسپارى جونىندە مالىمەت بەردى. Condor Petroleum كومپانياسىنىڭ پرەزيدەنتى سۇيىتىلعان تابيعي گاز وندىرەتىن ءمودۋلدى زاۋىتتار سالۋ جوسپارى جونىندە مالىمەت بەردى. سونىمەن قاتار «قازاقستان – كانادا» ىسكەرلىك كەڭەسىنىڭ جۇمىسى اياسىندا قازاقستان مەن كانادا اراسىنداعى ىنتىماقتاستىقتى دامىتۋدىڭ پەرسپەكتيۆالارىنا نازار اۋدارىلدى.

ۇقساس جاڭالىقتار

Back to top button