ەرلان سايروۆ: رەفەرەندۋم – ەلىمىز ءۇشىن ساياسي پليۋراليزمگە التەرناتيۆا جوق ەكەنىن دالەلدەدى

ءماجىلىس دەپۋتاتى ەرلان سايروۆ كونستيتۋتسياعا ەنگىزىلەتىن وزگەرىستەر مەن تولىقتىرۋلار بويىنشا وتكەن رەفەرەندۋمعا قاتىستى ءوز پىكىرىن ءبىلدىردى دەپ حابارلادى turkystan.kz.

«كونستيتۋتسياعا وزگەرىستەر ەنگىزۋ جونىندەگى رەفەرەندۋم اياقتالدى. حالىقتىڭ باسىم كوپشىلىگى، 78 پايىزى كونستيتۋتسياعا وزگەرىستەردى قولداپ داۋىس بەردى. بارلىق حالىقارالىق ۇيىمدار، ەۋرووداق ەلدەرى رەفەرەندۋمنىڭ قورىتىندىلارىنا وڭ باعا بەرىپ جاتىر. ءبىزدىڭ ساياسي تاريحىمىزدا ءبىرىنشى رەت وبسە، ەۋرووداق قازاقستانداعى ساياسي ءىس-شاراعا وڭ باعاسىن بەرىپ وتىر. قازاقستان حالقى بۇل رەفەرەندۋمدى پرەزيدەنت قاسىم-جومارت توقاەۆتىڭ ساياسي كۋرسىنا سەنىم ۆوتۋمى دەپ قابىلداپ وتىر»، – دەدى ەرلان سايروۆ.

ونىڭ ايتۋىنشا، رەفەرەندۋم – ەلىمىز ءۇشىن دەموكراتيا مەن ساياسي پليۋراليزمگە التەرناتيۆا جوق ەكەنىن دالەلدەدى.

«رەفەرەندۋم ەندى رەۆانشيستتىك كۇشتەر مەن رەۆيزيونيستتەردىڭ جىمىسقى ءىس-ارەكەتىنىڭ ءىس-جۇزىنە اسپايتىنىن انىق كورسەتتى. بۇل ءىس-شارا ءبىزدىڭ ەلىمىزدە دەموكارتيا مەن ءپليۋراليزمنىڭ تەك قانا باسى دەپ ءبىلۋ قاجەت. ەندى پارلامەنت وسى وزگەرىستەرگە بايلانىستى 20 كونستيتۋتسيالىق زاڭدارعا وزگەرىستەر جاسايدى. بۇل – اۋقىمدى، كەشەندى ماسەلە. رەفەرەندۋم، سونىمەن بىرگە، ەلىمىزدەگى وليگارحتاردىڭ قولىنا زاڭسىز وتكەن حالىق يگىلىگىن مەملەكەتكە قايتارۋ، تابيعات رەسۋرستارىنان حالقىمىزدىڭ ەنشىسىن ارتتىرۋ پروتسەسىن باستايتىنى انىق»، – دەدى ءماجىلىس دەپۋتاتى.

ەرلان سايروۆ شەتكە زاڭسىز كەتكەن وتاندىق كاپيتالدى قايتارۋ ماسەلەسى دە وتە وزەكتى ەكەندىگىن ايتتى.

«كونستيتۋتسياعا وزگەرىستەر وسى ماسەلەنى شەشۋدى تەزدەتەتىن لوكوموتيۆ. ياعني، وتكەن رەفەرەندۋم حالقىمىزعا «ءوز بيلىگىن قايتارىپ»، ەلىمىزدە حالىقتىق دەموكراتيا قۇرۋدىڭ باستاپقى نۇكتەسى دەپ ءبىلۋ كەرەك. ەندى جاڭا تۇرپاتتاعى ساياسي مادەنيەتتى قالىپتاستىرۋ، ءاربىر شەشىمنىڭ حالىقپەن اقىلداسا وتىرىپ، ازاماتتاردىڭ مۇڭ-مۇددەسى تۇرعىسىنان قابىلدايتىن جۇيەگە كەلەرىمىز انىق. ەڭ باستى ماسەلە – اتالعان وزگەرىستەر دەموكراتيا مەن ءپليۋراليزمدى قالىپتاستىرا وتىرىپ، حالقىمىزدىڭ ءال-اۋقاتىن جۇيەلى تۇردە ارتتىرۋعا قابىلەتتى قوعامدىق-ساياسي جۇيە جاساۋ»، – دەدى ول.

 

ۇقساس جاڭالىقتار

Back to top button