ەلوردادا تاكسي جۇرگىزۋشىسى پاتەر توناپ كەتتى

پاتەر ۇرلىعىن جاسادى دەگەن كۇدىكپەن ەلوردا اۋماعىندا جەكە تاسىمالداۋمەن اينالىسقان 41 جاستاعى تاجىكستان ازاماتى ۇستالدى دەپ حابارلادى turkystan.kz قالالىق پوليتسيا دەپارتامەنتىنە سىلتەمە جاساپ.

اقپاراتقا سۇيەنسەك، پوليتسياعا جۇگىنگەن قالا تۇرعىنى ءبىر كۇن بۇرىن قوناقتا بولعان جانە ماساڭ كۇيدە ساعات 23.00-دە ول ۇيىنە جەتۋ ءۇشىن تاكسي شاقىرعان.

«كورسەتىلگەن مەكەن-جايعا جەتكەندە تاكسي جۇرگىزۋشىسى كليەنتتەن سۋ ءىشۋدى وتىنگەن. جۇرگىزۋشىمەن ۇيگە بىرگە كىرگەن ماس جولاۋشى پاتەردە ۇيىقتاپ قالعان. ەر ادامنىڭ جاعدايىن كورىپ، جۇرگىزۋشى ۇرلىق جاساۋعا شەشىم قابىلداپ، پاتەردى ءتىنتي باستاعان. تاكسي جۇرگىزۋشىسى ۇيالى تەلەفوندى، «سامسۋنگ» ماركالى پلانشەتتى، 100 مىڭ تەڭگە كولەمىندە اقشالاي قاراجاتتى ولجا قىلعان. سونىمەن قاتار، ءۇي يەسىنىڭ كروسسوۆكالارى مەن فليپ-فلوپتارىن دا وزىمەن بىرگە الىپ كەتكەن»، – دەلىنگەن حابارلامادا.

كۇدىكتىگە قاتىستى سوتقا دەيىنگى تەرگەۋ امالدارى جۇرگىزىلۋدە. ۇستالعان ازامات ءوز كىناسىن مويىنداپ، زاتتاي ايعاق تاركىلەنىپ، يەسىنە قايتارىلدى.

ەلوردا اۋماعىندا بۇرىن جاسالعان وسىعان ۇقساس قىلمىستارعا قاتىستىلىعى تەكسەرىلۋدە.

ۇقساس جاڭالىقتار

Back to top button