ەلوردادا بالا كۇتۋشى ءۇي يەسىنىڭ 3 مىڭ دوللار اقشاسىن ۇرلاپ كەتتى

ەسىل اۋدانى پب كريمينالدىق پوليتسيا قىزمەتكەرلەرى جەدەل-ىزدەستىرۋ ءىس-شارالارىن جۇرگىزۋ كەزىندە، ءۇي يەلەرىنەن اقشا قاراجاتىن ۇرلادى دەگەن كۇدىكپەن كۇتۋشى بولىپ جۇمىس ىستەگەن ايەلدى ۇستادى دەپ حابارلادى turkystan.kz قالالىق پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.

تەرگەۋ بارىسىندا 31 جاستاعى ايەلدىڭ اتالعان وتباسىعا بالا كۇتۋشىسى بولىپ جۇمىسقا ورنالاسقانى انىقتالدى. ول ءبىر اي جۇمىس ىستەگەننەن كەيىن شكافتا جاتقان اقشانى بايقايدى، كەيىن يەلەرىنىڭ جوقتىعىن پايدالانىپ، مەزگىل-مەزگىلىمەن ۇرلىق جاساعان. جالپى العاندا، ول 3000 اقش دوللارىن ۇرلاعان.

بالا كۇتۋشىسى تاراپىنان ەشقانداي شاعىمدار بولماعان، بىراق ءبىر كۇنى ءۇيدىڭ يەسى اقشانىڭ جوعالعانىن بايقاپ، پوليتسياعا جۇگىنگەن.

اتالعان فاكتىگە بايلانىستى قر قك 188-بابى بويىنشا سوتقا دەيىنگى تەرگەۋ امالدارى جۇرگىزىلۋدە. كۇدىكتى ءوز كىناسىن مويىندادى. ونىڭ ەلوردا اۋماعىندا بۇرىن جاسالعان وسىعان ۇقساس قىلمىستارعا قاتىستىلىعىنا تەكسەرۋ جۇرگىزىلۋدە.

«نۇر-سۇلتان قالاسىنىڭ پوليتسيا دەپارتامەنتى جۇمىس بەرۋشىلەرگە بوگدە ادامداردى جۇمىسقا قابىلداماس بۇرىن ولاردىڭ وتكەن ومىرىنە قىزىعۋشىلىق تانىتۋدى، قۇجاتتاردىڭ كوشىرمەلەرىن، ۇسىنىس حاتتاردى تالاپ ەتۋدى، سونداي-اق قىراعى بولۋدى، قۇندى زاتتاردى قاراۋسىز قالدىرماۋدى جانە بەيتانىس ادامدارعا سەنبەۋ كەرەكتىگىن ەسكە سالادى»، – دەلىنگەن نۇر-سۇلتان قالاسىنىڭ پوليتسيا دەپارتامەنتى.

ىڭكار سەرىكقىزى

ۇقساس جاڭالىقتار

Back to top button