پرەزيدەنت جارلىعى كۇشىنە ەندى: قازاقستاندا جاڭادان ءۇش وبلىس قۇرىلدى

قازاقستاندا رەسمي تۇردە ءۇش جاڭا وبلىس پايدا بولدى دەپ حابارلادى turkystan.kz.

بۇگىن، 8 ماۋسىمدا قر پرەزيدەنتىنىڭ 3 جاڭا ءوڭىردى قۇرۋ تۋرالى جارلىعى كۇشىنە ەندى. ەندى ەلىمىزدە رەسمي تۇردە 17 وبلىس جانە ءۇش مەگاپوليس بار.

4 مامىردا قر پرەزيدەنتى قازاقستاندا جاڭادان ءۇش وبلىس قۇرۋ تۋرالى جارلىققا قول قويدى.

ۇلىتاۋ وبلىسى – ەڭ ۇلكەن وڭىرلەردىڭ ءبىرى. ول ەكى اۋداننان تۇرادى – جاڭارقا جانە ۇلىتاۋ. ال وبلىستاعى ءۇش قالا – جەزقازعان، قاراجال جانە ساتباەۆ. جەزقازعان – مىس ونەركاسىبىنىڭ ورتالىعى، ول ايماقتىڭ اكىمشىلىك ورتالىعىنا اينالعان. جاڭا وبلىستىڭ حالقى شامامەن 226 مىڭ ادام بولۋى ءتيىس.

اباي وبلىسى شىعىس قازاقستان وبلىسىنان بولىنگەن. كەڭەس زامانىندا ونىڭ اۋماعىندا سەمەي وبلىسى ورنالاسقان. ءوڭىر ورتالىعى سەمەي قالاسى بولدى. وبلىسقا سەگىز اۋدان كىردى: اقسۋات، اباي، اياگوز، بەسقاراعاي، بورودۋليحا، جارما، كوكپەكتى جانە ءۇرجار، سونداي-اق، ەكى قالا – سەمەي جانە كۋرچاتوۆ. وبلىس حالقى شامامەن 640 مىڭ ادام بولۋى ءتيىس.

الماتى وبلىسى قۇرامىنان بولىنگەن وبلىس – جەتىسۋ وبلىسى. وندا 650 مىڭعا جۋىق ادام تۇرادى. وبلىستىڭ اكىمشىلىك ورتالىعى الماتى وبلىسىنىڭ بۇرىنعى ورتالىعى – تالدىقورعاندا ورنالاسقان. وبلىسقا سەگىز اۋدان جانە ەكى قالا كىردى – اقسۋ، الاكول، ەسكەلدى، قاراتال، كەربۇلاق، كوكسۋ، پانفيلوۆ، سارقان اۋداندارى، تالدىقورعان جانە تەكەلى قالالارى.

بۇعان دەيىن قازاقستاندا جاڭا وبلىستار پايدا بولعاننان كەيىن ەل اكىمشىلىك جاعىنان 20 اۋماققا بولىنەتىنى بەلگىلى بولعان: 17 وبلىس جانە رەسپۋبليكالىق ماڭىزى بار ءۇش قالا.

ەسكە سالساق، بۇعان دەيىن پرەزيدەنت قاسىم-جومارت توقاەۆ جولداۋىندا ەلىمىزدىڭ اكىمشىلىك-اۋماقتىق قۇرىلىمىن جەتىلدىرۋ قاجەت ەكەنىن مالىمدەگەن ەدى.

ۇقساس جاڭالىقتار

Back to top button