ەل تاريحىندا جاڭا كەزەڭ باستالدى - اتىراۋ قالالىق ءماسليحاتىنىڭ دەپۋتاتى

اتىراۋ قالالىق ءماسليحاتىنىڭ دەپۋتاتى ايجان سارسەمباەۆا كونستيتۋتسياعا ەنگىزىلەتىن وزگەرىستەر مەن تولىقتىرۋلار بويىنشا وتكەن رەفەرەندۋمعا قاتىستى ءوز پىكىرىن ءبىلدىردى دەپ حابارلادى turkystan.kz.

«حالىق بولاشاعىمىز جارقىن بولۋى ءۇشىن تاڭداۋ جاسادى. ەلىمىزدىڭ بولاشاعىنىڭ دامۋى تىكەلەي وسى رەفەرەندۋمعا بايلانىستى. پرەزيدەنت حالىققا بارىنشا ەركىندىك بەرۋدى ماقسات ەتىپ، مۇمكىندىك بەردى. جاڭاشىلدىق ءار كەزدە دە كەرەك. اتا زاڭىمىزدىڭ ءبىر ەمەس، 33 بابىنا وزگەرىس ەنگىزىلمەك. ول – كونستيتۋتسيانىڭ ۇشتەن ءبىر بولىگى. وسىنداي ماڭىزدى شەشىمدى قابىلداۋ قۇزىرەتى تەك پارلامەنت قابىرعاسىندا قالماي، حالىقتىڭ قاتىسا الۋى مەملەكەتىمىز ءۇشىن وتە مارتەبەلى قادام»، – دەدى ايجان سارسەمباەۆا.

ونىڭ ايتۋىنشا، جاڭاراتىن، جاڭعىراتىن ۋاقىت كەلدى.

«ەگەمەن ەل اتانعانىمىزعا 30 جىلدان استى. جاڭاراتىن، جاڭعىراتىن ۋاقىتتىڭ كەلگەنى ءسوزسىز. قاي-قايسىمىز دا ەلىمىزدى وركەنيەتتى ەلدەر قاتارىنان كورگىمىز كەلىپ، ارماندايتىنىمىز اقيقات.  قازاقستاندىقتاردىڭ بارلىعى ءوز ويىن ايتۋ ارقىلى وزگەرىستەرگە ءۇن قوستى. ءبىزدىڭ تاڭداۋىمىز بولاشاق ۇرپاقتىڭ جولىن اشىپ، قوعامنىڭ دامۋىنا سەرپىن بەرەدى»، – دەدى اتىراۋ قالالىق ءماسليحات دەپۋتاتى.

ۇقساس جاڭالىقتار

Back to top button