ەلوردادا ات جارىسىنىڭ جازعى ماۋسىمى اشىلدى

ءداستۇرلى ءىس-شارا ەلوردانىڭ ماڭىندا ورنالاسقان «قازانات» اتشابارىندا بايگەنىڭ ءتورت تۇرىنەن جانە جامبى اتۋ مەن تەڭگە ءىلۋ جارىسىنىڭ اشىلۋىمەن ءوتتى دەپ حابارلادى turkystan.kz نۇر-سۇلتان قالاسى اكىمدىگىنىڭ رەسمي سايتىنا سىلتەمە جاساپ.

اتشاباردا وتكىزىلىپ جاتقان ۇلتتىق سپورت تۇرلەرىنەن جارىسقا ەلىمىزدىڭ تۇكپىر-تۇكپىرىنەن كەلگەن 150-دەن اسا سپورتشى مەن 60-قا جۋىق كەلىستى جىلقى قاتىستى.

ءدۇبىرلى دودا الدىمەن مادەنيەت جانە سپورت ۆيتسە-ءمينيسترى سەرىك جاراسباەۆتىڭ قۇتتىقتاۋ سوزىمەن اشىلدى.

«2022 جىلعى جازعى سپورتتىق ماۋسىمنىڭ اشىلۋىنا ارنالعان ات سپورت جارىستارى ءوز باستاۋىن الدى. تاۋەلسىزدىك جىلدارى ءبىزدىڭ ەلىمىزدە، حالقىمىزدىڭ ەجەلگى داستۇرلەرىمەن بىرگە ۇلتتىق سپورت تۇرلەرى دە جاڭعىرا باستادى. ولارعا قازىرگى تاڭدا ەرەكشە نازار اۋدارىلۋدا. سپورت تۇرلەرى ىشىندە ۇلتتىق سپورت باسىمدىققا يە. ولار – قازاق حالقىنىڭ رۋحى. سپورتشىلارعا جوعارى ناتيجە كورسەتىپ تىلەيمىن. ات سپورت تۇرلەرىنىڭ جارىستارىن اشىق دەپ جاريالايمىن»، – دەدى ۆيتسە-ءمينيسترى سەرىك جاراسباەۆ.

سالتاناتتى اشىلۋ راسىمىنەن كەيىن ءۇش شاقىرىمدىق تاي جارىسى، ارتىنشا جەتى شاقىرىمدا قۇنان بايگە ءوتتى.

ات جارىسىنىڭ كوركىن 18 شاقىرىمدىق الامان بايگە قىزدىردى. باس جۇلدە نۇر-سۇلتان قالاسىنىڭ «العىر» اتتى قاراكەرىنە بۇيىردى. ەكىنشى ورىندى ماڭعىستاۋ وبلىسىنىڭ اقتاۋ قالاسىنان كەلگەن بەس جاسار «قاناتىقارا» قارا ايعىر ەنشىلەدى. ءۇشىنشى ورىنعا شىعىس قازاقستان وبلىسىنان كەلگەن تازا قاندى بەس جاسار «اقماڭداي» تورى تابان تىرەدى.

ۇزدىك شاباندوزدار مەن ەڭ جۇيرىك اتتاردىڭ يەلەرىنە نۇر-سۇلتان قالاسىنىڭ ۇلتتىق سپورت تۇرلەرى قاۋىمداستىعىنىڭ دەمەۋشىلىگى ەسەبىنەن اقشالاي جانە باعالى سىيلىقتار، سونداي-اق مەدالدار تابىستالدى.

ايتا كەتەيىك، جامبى اتۋ مەن تەڭگە ىلۋدەن ەرەسەكتەر، جاستار جانە جاسوسپىرىمدەر اراسىنداعى قازاقستان چەمپيوناتى 19 ماۋسىمعا دەيىن جالعاسادى.

ياعني، جامبى اتۋ جانە تەڭگە ىلۋدەن ەرەسەكتەر اراسىنداعى قازاقستان چەمپيوناتى 3-6 ماۋسىم كۇندەرى، جاستار چەمپيوناتى ماۋسىمنىڭ 9-13، جاسوسپىرىمدەر چەمپيوناتى 15-18 ماۋسىمعا دەيىن «قازانات» اتشابارىندا وتەدى.

ۇقساس جاڭالىقتار

Back to top button