ەلوردادا «استانا كەشتەرى» ءحى حالىقارالىق فەستيۆالى قورىتىندىلاندى

ەلوردادا روك پەن سيمفونيالىق مۋزىكانىڭ تاماشا ۇيلەسىمىن كورسەتكەن ەرەكشە كونتسەرت ءوتتى. كورەرمەننىڭ زور ىقىلاسىنا بولەنگەن «روك مۋزىكاسىنىڭ التىن حيتتەرى» كونتسەرتى «استانا كەشتەرى» ءحى حالىقارالىق فەستيۆالىن قورىتىندىلادى.

«استانا بالەت» تەاترىنىڭ وركەسترى يتاليالىق ديريجەر روبەرتو مولينەلليدىڭ جەتەكشىلىگىمەن Queen، Beatles، Kiss، Pink Floyd، Metallica، Scorpions، Led Zeppelin، Europە توپتارىنىڭ اتاقتى اندەرىن ورىندادى.

ەلوردادا «استانا كەشتەرى» ءحى حالىقارالىق فەستيۆالى قورىتىندىلاندى

زاماناۋي مۋزىكانىڭ اڭىز تۇلعالارىنا ارنالعان ۇلكەن كونتسەرتتىك جوبالاردىڭ اۆتورى، كومپوزيتور، ديريجەر روبەرتو مولينەللي «استانا كەشتەرى» فەستيۆالىنە بۇدان بۇرىن دا بىرنەشە رەت قاتىسقان. جوبا اياسىندا ونىڭ «Queen» (2018 ج.) جانە «اۆۆا» (2021 ج.) توپتارىنا ارنالعان كونتسەرتتەرى جوعارى دەڭگەيدە ءوتتى.

ماەسترونىڭ ايتۋىنشا، «استانا كەشتەرى» الەمنىڭ ۇزدىك ورىنداۋشىلارىن توعىستىرعان ەرەكشە فەستيۆالگە اينالدى.

«بيىلعى فەستيۆالدىڭ مەن ءۇشىن باستى ەرەكشەلىگى – ءار ءتۇرلى مۋزىكالىق جانرلاردىڭ ۇيلەسىم تابۋى. روك حيتتەرى، سيمفونيالىق مۋزىكا مەن بالەت ساحناسىنىڭ قوسىندىسى جاڭا ەموتسيا سىيلادى. «استانا كەشتەرى» فەستيۆالىنە العىسىم زور»، – دەدى روبەرتو مولينەللي.  

ەلوردادا «استانا كەشتەرى» ءحى حالىقارالىق فەستيۆالى قورىتىندىلاندى

ساحنادا يوگان بودينگ (شۆەتسيا)، سيمونە روماناتو (يتاليا)، گيتاريست ريككاردو بەرتوتستسيني (يتاليا) سىندى بەلگىلى ەۋروپالىق ارتىستەر ونەر كورسەتتى. الەمدىك ونەر جۇلدىزدارى ناعىز مۋزىكالىق شوۋ جاسادى.

 «بۇل مەنىڭ قازاقستان ەلىنە العاش رەت كەلۋىم. العان اسەرىم تاماشا. ەۋرازيا تورىندە ورنالاسقان مەملەكەتتە مۋزىكانىڭ جاڭا فورماتتارىن زور ىقىلاسپەن قابىلدايتىن تىڭدارمانداردىڭ كوپ بولۋى مەنى تاڭعالدىردى»،- دەپ ءبولىستى كونتسەرتتەن كەيىن شۆەتسيالىق ءانشى يوگان بودينگ.

انشلاگپەن وتكەن كونتسەرت «The Show Must Go On» انىمەن اياقتالدى.

ەسكە سالساق، «دەگدار» گۋمانيتارلىق قورى ۇيىمداستىرعان «استانا كەشتەرى» فەستيۆالى بيىل تىڭدارماندارعا  4 جاڭا كونتسەرت ۇسىندى. بەلگىلى كومپوزيتور پەر تيللۋانىڭ شىعارماشىلىق كەشى، بەرلين كونتسەرتتىك وركەسترىنىڭ سۇيەمەلدەۋىمەن وتكەن اتاقتى ۆيولونچەليست نارەك احنازاريان مەن تانىمال پيانيست ۆاديم حولودەنكونىڭ كونتسەرتتەرى ەلوردا كورەرمەندەرىن تامساندىردى.

جوبا اياسىندا كورەرمەندەر كلاسسيكا، حالىق، ەسترادا مۋزىكاسىن قازاقستانعا جانە بارشا الەمگە تانىتىپ جۇرگەن ۇزدىك ورىنداۋشىلاردىڭ ونەرىن تەگىن تاماشالاي الادى. فەستيۆالدىڭ قوناقتارى الەمدىك ساحنالاردى باعىندىرعان ونەر جۇلدىزدارى بولعانىنا قاراماستان، كونتسەرتتەرگە بارلىق بيلەتتەر تەگىن تاراتىلدى.

ەلوردادا «استانا كەشتەرى» ءحى حالىقارالىق فەستيۆالى قورىتىندىلاندى

 

ۇقساس جاڭالىقتار

Back to top button