ۇلىتاۋدا ۇلتتىق قۇرىلتاي وتەدى - پرەزيدەنت

ۇلىتاۋدا ۇلتتىق قۇرىلتاي وتەدى، وعان قوعامنىڭ ءتۇرلى توپ وكىلدەرى، بەدەلدى ءارى بەلسەندى ازاماتتار شاقىرىلادى. بۇل تۋرالى پرەزيدەنت قاسىم-جومارت توقاەۆ قازاقستان حالقىنا ۇندەۋىندە مالىمدەدى دەپ حابارلادى turkystan.kz.

«قاستەرلى تاۋەلسىزدىگىمىزدى، ەل بىرلىگىن جانە قوعامدىق كەلىسىمدى نىعايتۋ – ءبىزدىڭ نەگىزگى مىندەتىمىز. بۇل رەفورمالار قۇر اتاق-ابىروي ءۇشىن قولعا الىنعان جوق. مۇنىڭ ءبارىن جاڭا، ادىلەتتى قازاقستان قۇرۋ ءۇشىن جاساپ جاتىرمىز. حالقىمىزدا «كەڭەسىپ پىشكەن تون كەلتە بولمايدى» دەگەن ءسوز بار. بابالارىمىز ماڭىزدى ماسەلەنى القالى جيىندا شەشكەن. مەن وسى ءداستۇردى جاڭعىرتىپ، ۇلتتىق قۇرىلتاي قۇرۋ تۋرالى باستاما كوتەردىم. وعان قوعامنىڭ ءتۇرلى توپ وكىلدەرى، بەدەلدى ءارى بەلسەندى ازاماتتار شاقىرىلادى»، – دەدى مەملەكەت باسشىسى.

پرەزيدەنتتىڭ ايتۋىنشا، قۇرىلتايدىڭ العاشقى وتىرىسى ۇلت ۇياسى – ۇلىتاۋدا وتكىزىلەدى. وسىلايشا، ازاماتتاردىڭ مەملەكەت ىسىنە اتسالىسۋ مۇمكىندىگى ارتا تۇسەدى.

«شىن مانىندە، ەلىمىزدىڭ تاعدىرى – ارقايسىمىزدىڭ قولىمىزدا. ءبىز قوعامدىق جانە جەكە قۇندىلىقتار جۇيەسىن تۇبىرىمەن جاڭعىرتا ءبىلۋىمىز كەرەك. سوندا عانا بارلىق سالادا تۇبەگەيلى وزگەرىس جاساي الامىز. جاڭا قازاقستاننىڭ ەڭ باستى بايلىعى – حالىق. ال، ەڭ نەگىزگى ماقساتى – ازاماتتاردىڭ باقىتتى ءومىر ءسۇرۋىن قامتاماسىز ەتۋ. ءاربىر ازاماتىمىز ساياسي وزگەرىستەر مەن ەكونوميكالىق ءوسىمنىڭ جەمىسىن كورۋى قاجەت. قۇرعاق ۋادە مەن بوس ءسوز ەشقايدا اپارمايدى. مەن ءۇشىن ناقتى ءىس پەن شىنايى وزگەرىس بارىنەن ماڭىزدى. بۇل ماقساتقا قول جەتكىزۋ ءۇشىن بار كۇش-جىگەرىمدى سالامىن»، – دەدى ق.توقاەۆ.

ۇقساس جاڭالىقتار

Back to top button