كورشى ەلدە قايتىس بولعان قازاق ساربازىنىڭ قانىنان سپيرت پەن ەسىرتكى تابىلدى

قىرعىز رەسپۋبليكاسىندا قايتىس بولعان قازاق ساربازىنىڭ قانىنان سپيرت پەن ەسىرتكى تابىلدى. الايدا مارقۇم بولعان ساربازدىڭ اتا-اناسى العاشقى ساراپتامانىڭ قورىتىندىسىمەن مۇلدە كەلىسپەيدى دەپ حابارلادى turkystan.kz. 

19 جاستاعى ۇلىقبەك بەردىشوۆ جامبىلداعى شەكارا بەكەتىندە وتان الدىنداعى بورىشىن وتەپ ءجۇرىپ، 40 كۇندەي ءىزىم-عايىم جوعالىپ كەتكەن ەدى. كەيىن ساربازدى قىرعىز رەسپۋبليكاسى شەكاراسىندا جارتاسقا اسىلىپ تۇرعان جەرىنەن تاپقان.

ساربازدىڭ ءوز-وزىنە قول جۇمساۋى مۇمكىن ەمەس دەگەن اتا-انا، ۇلىمىز ادام قولىنان قازا بولدى دەپ كۇدىكتەنەدى. مايىتكە تاراز قالاسىندا جاسالعان ساراپتاما ناتيجەسى جاقىندا شىقتى. وندا مارقۇمنىڭ بۇلشىق ەتىندە 0،12 پايىز ەتيل ءسپيرتى، ىشكى قۇرىلىسىندا 3-مونواتسەتيلمورفين دەپ اتالاتىن ەسىرتكى تابىلعان. سونداي-اق ساراپتاما ورتالىعىنداعىلار ۇلىقبەكتىڭ كوز جۇمار الدىندا ەسىرتكىگە ەلىتۋى مۇمكىن دەگەن قورىتىندىعا كەلگەن.

بىراق، مارقۇمنىڭ اتا-اناسى ۇلدارىنىڭ ەسىرتكى قولدانباق تۇگىلى، شىلىم تارتپايتىنىن ايتقان. سوندىقتان ۇلىقبەكتىڭ جۇمباق ولىمىنەن قارا جامىلعان وتباسى ساراپتاما ناتيجەسى جالعان دەپ ەسەپتەيدى.

«بۇلاي قورىتىندى بەرگەندەرى تەرگەۋدى ودان ءارى شيەلەنىستىرۋ دەپ ويلايمىن. ويتكەنى بارلىق كىنانى كوز جۇمعان بالامنىڭ وزىنەن كورە سالعىلارى كەلەدى. ول اسكەردە ءجۇرىپ، قالاي ەسىرتكى قولدانۋى مۇمكىن؟ وتىرىك ءبارى»، – دەدى مارقۇمنىڭ اكەسى ايداربەك بەردىشوۆ.

قورىتىندىعا كۇمان كەلتىرگەن مارقۇمنىڭ وتباسىنداعىلار ەندى كورشى ەلدە تاعايىندالعان ساراپتامانىڭ شەشىمىن كۇتەمىز دەپ وتىر. ونىمەن قوسا، ولار تەرگەۋدىڭ ءادىل جۇرگىزىلۋىن تالاپ ەتتى.

 

ۇقساس جاڭالىقتار

Back to top button