«پاتەر الىپ بەرەمىن»: شىمكەنتتە الاياق ايەل سوتتالدى

پاتەر الىپ بەرەمىن دەپ 21 شىمكەنتتىكتى الداعان ايەل 4 جىلعا سوتتالدى دەپ حابارلادى turkystan.kz polisia.kz سايتىنا سىلتەمە جاساپ.

شىمكەنت قالاسىنىڭ تۇرعىنى مەملەكەتتىك باعدارلامامەن پاتەر الۋعا كومەكتەسەمىن دەپ ەكى جىل بويى ازاماتتاردى الداپ كەلگەن. الاياقتىڭ ارباۋىنا 21 تۇرعىن تۇسكەن. ولار الاياققا 34 ميلليون تەڭگە اقشا بەرگەن.

«الاياقتىقتى كاسىپ ەتكەن 27 جاستاعى ايەل قالا اۋماعىندا سوعىلىپ جاتقان كوپقاباتتى تۇرعىن ۇيلەردەن تانىسى ارقىلى پاتەر الىپ بەرە الاتىندىعىن ايتىپ، تۇرعىنداردىڭ سەنىمىنە كىرىپ، اقشانى ءوز پايداسىنا جاراتىپ وتىرعان. سونداي-اق بالالارىنا قاراۋ ءۇشىن ۇيىنە جۇمىسقا العان ايەلدىڭ بانك كارتوچكاسىن قولدانۋعا الداپ سۇراپ الىپ، ۇيالى تەلەفونىنا ونىڭ قوسىمشاسىن ورناتىپ العان»، – دەلىنگەن حابارلامادا.

ءتارتىپ ساقشىلارى جەدەل-ىزدەستىرۋ جۇمىستارى بارىسىندا كۋالەردەن جاۋاپ الىپ، سۇراستىرۋ جۇمىستارىن جۇرگىزگەن. بانكتىك اۋدارىمدار تەكسەرىلىپ، كۇدىكتىنىڭ الاياقتىق ءىسى دالەلدەنگەن. ول قىلمىستىق ءىستى جاساعانى ءۇشىن 4 جىلعا سوتتالدى.

ۇقساس جاڭالىقتار

Back to top button